1 “Ad imsar xmi i ɣa tadfed ɣar temmurt nni d ac i ɣa iwc SIDI, AREBBI nnek, d řwart, uca ad tt tᵉṭṭfed uca ad dayes tzedɣed, 2 xenni ad teksid zi tmezwarut n kuř řɣiǧet i ɣa tessmuned zi temmurt nni i d ac ɣa iwc SIDI, AREBBI nnek, ad t tegged di tsuǧet uca ad traḥed ɣar wemcan i ɣa ixḍar SIDI maḥend ad din issezdeɣ Isem nnes. ^■   3 Uca ad dd-tased ɣar ukehhan, wenni din i ɣa yiřin deg wussan nni, ad as tinid: ‘Aqa ass-a ad barrḥeɣ i SIDI, AREBBI nnek, belli aqa udfeɣ ɣar temmurt nni x ijjuǧ SIDI i ibabaten nneɣ ḥima ad aneɣ tt iwc.’ 4 Uca ad iksi ukehhan tasuǧet zeg ufus nnek, ad tt issars zzat i uɛalṭar n SIDI, AREBBI nnek. 5 Ad tbarrḥed zzat i wudem n SIDI, AREBBI nnek, ad tinid: ‘Aramiyu nni tuɣa iǧan ɛřaḥař ad ifna aqa tuɣa-t d baba. Ssenni ihwa ɣar Miṣra uca izdeɣ din amecnaw abarrani ak-d ijj n wuru n yeryazen waha uca iyma, idweř d ijj n řgens imɣar, ijhed u idweř deg waṭṭas. ^■   6 Imiṣriyyen ḍeřmen u ḥṣaren aneɣ u ggin xaneɣ tasmuɣi teqseḥ. 7 Uca nesɣuyy ɣar SIDI, AREBBI n ibabaten nneɣ, uca isřa SIDI i tmijja nneɣ u iẓra arẓiyyet nneɣ d warber nneɣ d řmeḥnet nneɣ. 8 Issuffeɣ aneɣ-dd SIDI zi Miṣra s ufus ijehden, s uɣiř isswiẓẓaḍen, s tiggʷudi imɣaren, s řeɛřamat u s lmuɛjizat 9 uca issidef aneɣ ɣar wemcan-a uca iwca aneɣ tammurt-a, tammurt nni i ifeyyḍen s uɣi d tamment.

10 Uca řexxu, xzar, iwyeɣ-dd tamezwarut n řɣiǧet n temmurt nni i d ayi tewcid, a SIDI!’ Xenni ad t tegged zzat i wudem n SIDI, AREBBI nnek, ad taḍared zzat i wudem n SIDI, AREBBI nnek.

11 Zi marra řxař nni i ɣa iwc SIDI, AREBBI nnek, i cek u i aytbab n taddart nnek, ad zzayes tfarḥed cek d Ulawi d ubarrani i iǧan di řwest nnek.

12 Xmi i ɣa tkemmřed zeg uɛeccar n marra řeɛcur n řɣiǧet nnek deg useggʷas wiss třata wenni d aseggʷas n řeɛcur, xenni ad ten tewced i Ulawi, i ubarrani, i uyujiř, i tajjač, ḥima ad ccen daxeř i tewwura nnek u ad jjiwnen. ^■  

13 Uca ad tinid zzat i wudem n SIDI, AREBBI nnek: ‘Aqa ksiɣ min iǧan iqeddsen zi taddart inu uca ɛawed wciɣ t i Ulawi, i ubarrani, i uyujiř, i tajjač, am mammec marra i d ayi tumured. Necc war ɛeddiɣ uřa x icten zi tweṣṣa nnek u war ttuɣ walu. ^■  

14 War zzayes cciɣ deg wecḍan inu u war zzayes ksiɣ umi xemjeɣ uřa war zzayes wciɣ i yijj n umettin. Aqa sřiɣ i tmijja n SIDI, AREBBI inu, u ggiɣ marra min d ayi tumured.

15 Xzar zi Tzeddiɣt nnek iqeddsen, zeg ujenna, ɣar swadday uca barek řgens nnek Israil d temmurt nni i d aneɣ tewcid, am mammec tejjuǧed i ibabaten nneɣ, tammurt nni ittfeyyḍen s uɣi d tamment.’ ^■  

16 SIDI, AREBBI nnek, aqa yumur i cek ass-a, ad tegged tiweṣṣa aya d lfarayiḍ-a. Ḥḍa tent uca egg zzaysen s marra uř nnek d marra řeɛmar nnek.

17 Ass-a tennid belli SIDI ad yiři d AREBBI nnek, ad tuyured deg ibriden nnes, ad teḥḍid tiweṣṣa d řumurat nnes d lfarayiḍ nnes uca ad tesřed i tmijja nnes. ^■  

18 Ass-a inna ac SIDI aqa cek ad ɣares tiřid d ijj n řgens iɣřa aṭṭas, am mammec i d awem inna, u ittxeṣṣa ac ad teḥḍid marra tiweṣṣa nnes, ^■  

19 ḥima Netta ad cek issuɛřa x marra řegnus i usemɣar d yisem d řɛezz, ḥima ad tiřid d ijj n řgens iqeddsen i SIDI, AREBBI nnek, am mammec tuɣa inna.” ^■