1 “Mařa din ijj n umcubbec jar iryazen uca ittxeṣṣa asen ad uyuren ɣar řmeḥkama, ad xasen ḥekmen, xenni ad barrḥen x wenni ɣar iǧa řḥeqq uca ad ḥekmen x umednab. ^□   2 Mařa amednub issdaheǧ tiyyita, xenni řqaḍi ad yejj ad t ɣeḍřen ɣar temmurt uca ad t farcen zzat i wudem nnes anect itturs di řeḥsab n řɣecc nnes. 3 Iɛeddeř ad as iwc arebɛin n teyyita, war ɣarsent yarenni ca, minzi mařa ad t ifarc ɛad ktar sennej i tiyyita-ya, aqa umac ad ac dd-iban d ameḥgur jar tiṭṭawin nnek. ^■  

4 War tegged tacmant i ufunas xmi issarwat. ^■  

5 Xmi zeddɣen wawmaten ak-d wayawya uca immut ijj zzaysen, uca war dd-yejji bu mmis, xenni tamɣart n umettin war tmeǧec ca ak-d ubarrani. Ad xas yadef weřwes uca ad tt igg d tamɣart nnes uca ad as yegg xenni lwajib n weřwes. ^□  ■   6 Uca amenzu nni i dd ɣa taruw, ad ixřef isem n umas immuten, ḥima isem n wa war imeḥḥi ca zi Israil. 7 Maca mařa aryaz war ixs ad iksi tamɣart n umas, ad třah xenni temɣart n umas ɣar tewwart, ɣar imɣaren, ad tini: ‘Aḍeggʷař inu yugi ad ixřef ijj n yisem i umas di Israil, war ixs ad igg lwajib n weřwes.’ ^■   8 Xenni imɣaren n tendint nni ad as dd-řaɣan uca ad akides ssiwřen. Mařa netta imneɛ deg wawař nnes uca inna: ‘War xseɣ ca ad tt awyeɣ!’, 9 ad ɣares dd-tqarreb xenni tesřift zzat i tiṭṭawin n imɣaren, ad as tekkes tsiřit nnes zeg uḍar uca ad xas tessusef x uɣembub, ad tbarreḥ ad tini: ‘Ammu i ittwagg deg weryaz nni war ixsen ad ibna taddart n umas!’

10 Uca ad as wcen isem nnes di Israil: ‘Taddart n wenni umi tᵉttwakkes tsiřit.’

11 Mařa din iryazen mcubbucen uca treḥḥeg-dd temɣart n ca n ijj ḥima ad tessenjem aryaz nnes zeg ufus n wi t iccaten uca nettat tesswiẓẓeḍ afus nnes uca tᵉṭṭef i-t zi tfulin n useḍḥi nnes,

12 ad as tqessed xenni afus nnes, war d am ttezziǧiz.

13 War ɣarek ittiři di txancet nnek ijj n weẓru n řewzen d ijj n weẓru nneɣni, d ameqqran u d ameẓyan.

14 War ɣarek ittiři di taddart nnek, řmud n ijj n ifa uřa d ijj n ifa nneɣni, d ameqqran u d ameẓyan.

15 Ijj n weẓru n řewzen iwaṭa u iseggem ad ɣarek yiři uřa d ij n řmud n yijj n ifa nican u iwaṭa, ḥima ussan nnek ad zzuggarten x temmurt nni d ac i ɣa iwc, SIDI, AREBBI nnek.

16 Minzi marra wi i ɣa iggin man aya, marra wi i ɣa iggin řɣecc, aqa netta d nnɛi ɣar SIDI, AREBBI nnek. ^■  

17 Idar min zzayek igga Ɛamaliq deg webrid, umi dd-teffɣed zi Miṣra, ^■  

18 mammec dd-iffeɣ ɣar umsagar akidek deg webrid uca ihjem xak zi ḍeffar mani ǧan marra imeḍɛafen, umi cek tuɣa tuḥřed, tefnid uca netta war iggʷid ca AREBBI.

19 Ad imsar, xmi SIDI, AREBBI nnek, ad cek issareyyeḥ zi marra řɛedyan i d ac-dd innḍen di temmurt i d ac ɣa iwc SIDI, AREBBI nnek, d řwart, ḥima ad tt teksid, aqa ad temḥid řidaret n Ɛamaliq zi sadu ajenna. War t ttᵉttu!”