1 “Xmi i ɣa yawi ijj n weryaz ict n temɣart uca imřec akides uca xenni war d as teɛjib umi dayes yufa ca n řefḍiḥet, xenni ad as yari tabrat n weǧaf, ad as tt iwc deg ufus nnes uca ad tt issufeɣ zi taddart nnes. ^■   2 Mařa teffeɣ zi taddart nnes, truḥ uca tedweř d tamɣart ɣar ijj n weryaz nneɣni 3 uca aryaz aneggaru icarh i-tt, xenni ad as yari tabrat n weǧaf uca ad as tt iwc deg ufus nnes uca ad tt issekk zi taddart nnes, niɣ aryaz aneggaru nni tt yiwyen d tamɣart nnes, immut, 4 xenni war iɛeddeř i weryaz nnes d amezwaru, wenni d as iṭellqen, ad tt yegg ɛawed d tamɣart i yixef nnes, awarni umi tᵉttwasexmej nettat, minzi man aya d jjɛifect zzat i wudem n SIDI. War iɛeddeř ad tᵉttwassefsad temmurt i d ac iwca SIDI, AREBBI nnek, d řwart. ^□  

5 Xmi i ɣa yiři ijj n weryaz ɛad am imřec, xenni war itteffeɣ ca ak-d řɛeskar u war xas tᵉttwagg uřa d ict n tmesřact. Ad yiři ijj n useggʷas i taddart nnes waha u ad issfarḥ tamɣart nnes i yiwi i yixef nnes. ^■  

6 War iɛeddeř ad teksid iẓra n tsirt s tnayen d aḍman niɣ aẓru nni zzaysen ittenhezzan waha, minzi aqa xenni ad yiři řeɛmar d aḍman.

7 Mařa ittwaf ijj n weryaz yucar ca n ijj zeg wawmaten nnes n ayt n Israil uca netta yarr i-t d ismeɣ uca izzenz i-t, xenni ad immet uceffar nni. Ittxeṣṣa ad tekksed řɣar zi řwest nnek. ^■  

8 Xmi din i teǧa jjriḥect n řbarṣ, ḥḍa ad teḥḍid u ad tegged nican ɛlaḥsab marra min i d ac ɣa ssřemden ikehhanen Ilawiyyen. Am mammec ten umureɣ, ad teḥḍam ad t teggem. ^■   9 Idar min igga SIDI, AREBBI nnek, ak-d Maryam deg webrid umi dd-teffɣem zi Miṣra. ^■  

10 Mařa tarḍřed ca i umqarreb nnek, xenni war ttidef ɣar taddart nnes ḥima ad zzayes teksid ca d aḍman i yixef nnek.

11 Ad teqqimed barra uca aryaz i umi tarḍřed, ad ac dd-yawi ddiyyet ɣar barra.

12 Mařa tuɣa d aryaz d amezřuḍ, xenni war ggur ad tᵉṭṭsed x werhan nnes am tassut.

13 Ad as dd-tarred ddiyyet nni nican ɣar uɣeǧi n tfuct ḥima ad iṭṭeṣ di tassut nnes uca ad ac ibarek. Man aya ad ac tiři d tasegda zzat i wudem n SIDI, AREBBI nnek. ^■  

14 War sḥissfem acewwař ameḥdaj amezřuḍ zeg aytmac niɣ zeg ibarraniyyen i izeddɣen di temmurt nnek u daxeř i tewwura nnek. ^■  

15 Ad as tewced řmunet nnes kuř ass. War xas tɣeǧi tfuct x man aya, minzi netta d amezřuḍ uca immeẓri dayes, ḥima netta war ittřiɣi i SIDI di ssibbet nnek uca ad xak yiři d ddenb.

16 Ibabaten war ttwaneqqen di ssibbet n iḥenjiren nsen u iḥenjiren war ttwaneqqen di ssibbet n ibabaten nsen. Kuř ijj ad ittwaneɣ di ssibbet n ddenb nnes. ^■  

17 War sfarraɣ řeḥkam n ubarrani d uyujiř niɣ ad teksid arruḍ n tajjač d aḍman. ^■  

18 Ad tɛeqřed belli tuɣa cek d ismeɣ di Miṣra uca ssenni cek ifdi SIDI, AREBBI nnek. S uya necc ttumureɣ cek ad tegged man aya. ^□  

19 Xmi tmejjared ṣṣabet nnek deg iyyar nnek uca tᵉttud ca n tqebbiḍt deg iyyar, xenni war dd-tᵉddikkʷiřed maḥend ad tt teksid. Ad tiři d tasɣart i ubarrani, i uyujiř u i tajjač, ḥima ad cek ibarek SIDI, AREBBI nnek, di marra řxedmet n ifassen nnek. ^■  

20 Xmi i ɣa tẓewḍed tacejjart nnek n zzitun, war ttic taynit ɛad i min iqqimen awarni ac. D man aya ad yiři i ubarrani, i uyujiř u i tajjač.

21 Awarni řami třeqḍed aḍiř n umarjuɛ nnek n uḍiř, war arezzu ad třeqḍed min iqqimen awarni ac ɛawed. Aqa man aya ad yiři i ubarrani, i uyujiř u i tajjač. 22 Ad tɛeqřed belli tuɣa cek d ismeɣ di temmurt n Miṣra. S uya necc ttumureɣ cek ad tegged man aya.”