23
1 “War iɛeddeř i weryaz ad iksi tamɣart n babas u war iɛeddeř ad issɛarri x warruḍ n babas. X yinni war zemmaren ad adfen ɣar tmesmunt
2 War iɛeddeř i wenni umi ttwaddzen imeǧařen niɣ wenni umi ttwakksen imenyaren ad yadef ɣar wegraw n řgens n SIDI.
3 War iɛeddeř i mmis n řeḥram ad yadef ɣar wegraw n řgens n SIDI. Waxxa ař jjiř wiss ɛecra nnes ɛad uřa d ijj zzayes war d as iɛeddeř ad yadef ɣar tmesmunt n SIDI. 4 War iɛeddeř i yijj n Aɛmuni niɣ i yijj n Amu’abi ad yadef ɣar wegraw n řgens n SIDI. Waxxa ař jjiř wiss ɛecra nnes ɛad war iɛeddeř i uřa d ijj zzaysen ad yadef ɣar wegraw n řgens n SIDI i řebda,■ 5 minzi nitni war dd-ffiɣen ḥima ad kidwem msagaren ɣar webrid s weɣrum d waman umi dd-teffɣem zi Miṣra uca umi netta xak icra Balɛam, mmis n Baɛur, zi Fatur di Aram-Nahrayn, maḥend ad cek inɛeř. □ ■ 6 Maca SIDI, AREBBI nnek, war ixs ad iseř i Balɛam uca SIDI, AREBBI nnek, yarra nneɛřet d lbaraka minzi SIDI, AREBBI nnek, tuɣa ittexs i cek.
7 War tarezzud x řehna nsen d řxar nsen, marra ussan n tudart nnek, ař i řebda.
8 War carreh Adumi, minzi netta d umac, war carreh Amiṣri, minzi tuɣa cek d abarrani di temmurt nnes. 9 Iḥenjiren i dd asen ittwurwen zemmaren ad adfen ɣar wegraw n řgens n SIDI zi jjiř wiss třata.
Tiweṣṣa inneɣni
10 Umi dd ɣa teffɣed s řɛeskar ḍidd i řɛedyan nnek, ad teḥḍid ixef nnek zi marra řɣar.
11 Mařa din ijj n weryaz akidek, war iǧi ca d amezdag, ak-d min imsaren di ǧiřet, ad iffeɣ barra i řmargeḥ n řɛeskar. War d as iɛeddeř maḥend ad yadef ɣar daxeř n řmargeḥ.
12 Ƴar uweṭṭu n tmeddit, ad issird ixef nnes s waman u awarni i uɣeǧay n tfuct izemmar ad yadef ɛawed ɣar řmargeḥ.
13 Ittxeṣṣa ad ɣarek yiři wemcan barra i řmargeḥ n řɛeskar mani ɣar i ɣa teffɣed di barra.
14 Ad ɣarek yiři ɛawed jar řeqcuɛ nnek ijj n ujij uca xmi i ɣa teqqimed barra, ad zzayes txebced ijj n weḥfur, ad tenqeřbed u ad txemmřed isuffɣan nnek.
15 Minzi SIDI, AREBBI nnek, iggur di řmargeḥ nnek n řɛeskar ḥima ad cek issenjem u ḥima ad ac isellem řɛedyan nnek zzat i wudem nnek. Tasqift nnek at tiři tqeddes, ḥima Netta war dayek ittwiři ca n řefḍiḥet uca ad xak inneqřeb awarni ac.
16 Ismeɣ i ɣarek yarewřen zi bab nnes, war tzemmared ad t tsellmed ɛawed i bab nnes.
17 Ad kik izdeɣ di řwest nnek, deg wemcan nni i ɣa ixḍar ɣar daxeř i yict zi tewwura nnek, mani i ɣa yiři mliḥ. War iɛeddeř ad t tḍeřmed.
18 War tᵉttiři uřa d ict n temɣart n farq-ccɣeř n zzawect jar yessis n Israil uca war ittiři uřa d ijj n mmis n farq-ccɣeř n zzawect jar ayt n Israil.
19 Mammec ma tegga tmewcit n wawař, war iɛeddeř ad dd-tawyed řmunet n farq-ccɣeř niɣ ttaman n weqzin ɣar Taddart n SIDI, AREBBI nnek, minzi aqa aten s tnayen d ict n jjɛifect ɣar SIDI, AREBBI nnek. □
20 War ttegg arriba x umac, war iǧi arriba x nnuqart, war iǧi arriba x macca, war iǧi arriba x marra tamesřact nni izemmaren ad dd-tawi arriba. □ ■ 21 Tzemmared ad tegged arriba x ubarrani, maca war tzemmared ad tegged arriba x umac, ḥima ad ac ibarek SIDI, AREBBI nnek, di marra řxedmet n ifassen nnek di temmurt mani i ɣa traḥed ḥima ad tt teksid d řwart.
22 Xmi i ɣa tegged ijj n lwaɛd i SIDI, AREBBI nnek, war teddikkwiřed ca ɣar ḍeffar deg ukemmeř n řexřaṣ, minzi SIDI, AREBBI nnek, ad zzayek ittar ad t tkemmřed, mařa lla ad xak yiři d ddenb. ■ 23 Mařa war teggid ijj n lwaɛd, war xak ittiři ddenb. 24 Min dd-iffɣen zi jar iyencicen nnek, ad t tkemmřed s tidett, am tewhibt s řxaḍar nni zi twaɛded SIDI, AREBBI nnek, tenni x tessiwřed s uqemmum nnek.
25 Xmi i ɣa tadfed ɣar umarjuɛ n uḍiř n umqarrab nnek, ad tzemmared ad tecced aḍiř ɛlaḥsab meẓri n řeɛmar nnek, maca ittxeṣṣa war tᵉttegged walu di tsuǧet nnek.
26 Mařa tudfed ɣar imendi ibedden n umqarreb nnek, tzemmared ad teksid tidrin s ifassen nnek, maca war iɛeddeř ad tewted amjar deg imendi ibedden n umqarreb nnek.” ■