1 “War iɛeddeř ad txezzared waha deg uweddar n ufunas niɣ n ijjen zeg wuǧi n umac, niɣ ad xas tqeřbed tiṭṭawin, maca ittxeṣṣa ad as ten-i-dd-tarred nican i umac. ^■   2 Mařa umac war iǧi ca yudes niɣ war t tessined, ad t tessidfed ɣar daxeř i taddart nnek uca ad ɣarek iqqim ař dd ɣa yas umac ad xas yarzu uca xenni ad as t-i-dd tarred. 3 Amenni i ɣa tegged s weɣyuř nnes, amenni i ɣa tegged ɛawed s warruḍ nnes, wah ammu i ɣa tegged ak-d marra tamesřact n umac nni zzayes iweddaren uca tufid tt cek. War iɛeddeř ad as tennufared. ^□   4 War teqqimed ad texzared deg weɣyuř n umac niɣ deg ufunas nnes am wḍan deg webrid, war xasen qeǧeb ca tiṭṭawin. S tidett ad ten tessekkared akides.

5 Tamɣart war tyarreḍ arruḍ n weryaz, niɣ aryaz ad yarḍ arruḍ n temɣart, minzi marra wi itteggen aya aqa-tt d jjɛifect i SIDI, AREBBI nnek.

6 Mařa iban-dd zzat i wudem nnek x webrid ca n řɛucc n wejḍiḍ, di ca n tcejjart niɣ x temmurt, s iwarruden niɣ s tmeǧařin, uca tayemmat tessdeř x iwarruden niɣ x tmeǧařin, xenni war ttᵉṭṭef tayemmat ak-d iwarruden. ^□   7 Ad tejjed ad tuyur tyemmat, maca ad teksid iwarruden i yixef nnek, ḥima ad tiřid mliḥ, uca ad ac zuggarten wussan n tudart nnek.

8 Xmi i ɣa tebnid taddart n jdid, ad tegged taɛmadt x tzeqqa nnek, ḥima war ttikkʷiḍen idammen ɣar taddart nnek, mařa iwḍa-dd zzayes ḥed.

9 War zarreɛ ca amarjuɛ n uḍiř nnek s tnayen n markat n zzariɛet ḥima war tᵉttwasɛiǧit marra ṣṣabet n zzariɛet nni tzarɛed uřa d řɣiǧet n umarjuɛ n uḍiř. ^■  

10 War carrez ca s ufunas d weɣyuř jmiɛ.

11 War yarreḍ ca arruḍ ittwaggen zi txeǧeḍt n taḍuft d řeqṭen jmiɛ.

12 Ad tegged tcarcifa x arebɛa n iɣemmura n useřham nnek i zi třeḥḥfed. ^■  

13 Mařa ijj n weryaz yawi ict n temɣart uca yudef-dd ɣares, xenni ad tt icarh,

14 uca issekkar xas awařen uca yarra isem nnes d aɛeffan, inna: ‘Aqa tamɣart-a iwyeɣ tt, uca umi ɣares-dd qarrbeɣ, iwḍeɣ ad ssneɣ aqa war teǧi ca d taɛzarect!’,

15 xenni ggur babas n tebřiɣt nni d yemmas ad ssecnen lburhanat n tɣuni n tebřiɣt i yemɣaren ɣar tewwart n tendint.

16 Ad yini babas n tebřiɣt nni i yemɣaren: ‘Necc wciɣ yeǧi i weryaz-a d tamɣart uca netta idweř icarh i-tt,

17 uca aqa netta issekkar xas awařen, inna: War ufiɣ ɣar yeǧic lburhanat n tɣuni n tebřiɣt. Aqa aya d lburhanat n tɣuni n yeǧi!’ Uca nitni ad bezzɛen ařeḥḥaf zzat i wudem n imɣaren n tendint.

18 Xenni ad ṭṭfen imɣaren n tendint aryaz nni uca ad t farcen

19 uca ad as ggen multa n mya n uqiyyat n nnuqart uca ad tent iwc i babas n tebřiɣt nni, minzi netta yarra isem d aɛeffan x ict n teɛzarect zi Israil. Ad tiři d tamɣart nnes, war iḥeǧeř ad as iǧef marra ussan min i ɣa yekk iddar.

20 Maca mařa iffeɣ man aya d tidett uca war ufin lburhanat n tɣuni ɣar tebřiɣt, 21 xenni ad ssuffɣen tabřiɣt nni ɣar tewwart n taddart n babas uca ad tt arejmen yeryazen n tendint, ař ɣa temmet, minzi tegga řefḍiḥet di Israil umi tessefḍeḥ ixef nnes di taddart n babas. Ittxeṣṣa ad tekksed řɣar zi řwest nnek.

22 Mařa ittwaṭṭef ijj n weryaz umi iṭṭeṣ ak-d ca n temɣart nni iǧan ak-d weryaz, xenni ad mmten s tnayen, aryaz nni iṭṭṣen ak-d temɣart d temɣart ɛawed. Ittxeṣṣa ad tekksed řɣar zi Israil. ^■  

23 Mařa ict n tebřiɣt d taɛzarect tᵉttwaxḍeb zeg ijj n weryaz, uca yufa i-tt ijj n weryaz di tendint uca iṭṭeṣ akides, 24 xenni ad ten tessuffɣem barra s tnayen ɣar tewwart n tendint, ad ttwarejmen ař ɣa mmten nitni. Tabřiɣt minzi war tessekkar ca tɣuyyit di tendint, aryaz minzi isseḥqar tamɣart n umqarreb nnes. Ittxeṣṣa ad tekksed řɣar zi řwest nnek.

25 Mařa ijj n weryaz yufa ict n tebřiɣt ittwaxeḍben deg iyyar uca issexsar i-tt weryaz, iṭṭeṣ akides, xenni ittxeṣṣa ad immet weryaz waha wenni i kis iṭṭṣen. 26 War ttegg walu i tebřiɣt. Tabřiɣt war teggi ca ddenb ař řmewt, minzi tamesřact-a amecnaw tamesřact n weryaz nni ikkaren ak-d umqarreb nnes uca inɣa i-t, 27 minzi netta yufi tt deg iyyar, tesɣuy tebřiɣt nni ittwaxeḍben, maca war tuɣi din wi tt ɣa issnejmen.

28 Xmi ca n weryaz yufa ict n tebřiɣt d taɛzarect, war tt ixḍib ḥed, uca netta iṭṭef i-tt, iṭṭeṣ akides uca ttwafen nitni, 29 xenni aryaz nni iṭṭṣen akides ad iwc i babas n tebřiɣt xemsin n uqiyyat n nnuqart u nettat ad tedweř d tamɣart nnes, umi tt isseḥqar. War izemmar ad as iǧef marra ussan n tudart nnes.” ^■