1 “Mařa ittwaf ḥed ittwaneɣ, di temmurt nni d ac i ɣa iwc SIDI, AREBBI nnek, maḥend ad tt tᵉṭṭfed d řwart, izzeř deg iyyar uca war issin ḥed wi t inɣin, 2 xenni imɣaren nnek d řquḍat nnek ad dd-ffɣen uca ad ksin řeɛbar ař tineddam i d as dd-innḍen i wenni ittwanɣen. 3 Zi tendint, tenni yudsen i wenni ittwanɣen, ad zzayes ksin yimɣaren ict n tyenduzt n tfunasin nni ɛemmarṣ war zzayes crizen ca u tenni war ijbiden ɛad azayřu. 4 Uca imɣaren n tendint nni ad ssehwan tayenduzt nni ɣar ict n teɣzurt ittazřen řebda s waman, ɛemmarṣ war tᵉttwacarz u war tᵉttwaẓẓu uca ad arẓen iri n tyenduzt din di teɣzurt. 5 Xenni ad dd-qarrben ikehhanen, ayt n Lawi, minzi SIDI, AREBBI nnek, ixḍar i-ten maḥend ad xas sexxaren u maḥend ad barken s Yisem n SIDI u ɛlaḥsab awař nsen ad ittwaḥkem kuř amcubbec d kuř řexcunect. 6 Uca marra imɣaren n tendint nni yudsen x wenni ittwanɣen, ad ssirden ifassen nsen sennej i tyenduzt nni umi ittwarẓ yiri di teɣzurt 7 uca ad barrḥen, ad inin: ‘Ifassen nneɣ war ssizzřen ca idammen-a u tiṭṭawin nneɣ war t ẓrin. 8 Egg aṣřaḥ i řgens nnek Israil nni tefdid, a SIDI, uca war ssrusa idammen imezdagen, di řwest n řgens nnek Israil!’ Xenni idammen nni ad iřin ttwafdin i nitni. 9 Ammu i ɣa tekksed idammen imezdagen zi řwest nnek, minzi ittxeṣṣa ad tegged min iǧan nican di tiṭṭawin n SIDI.

10 Xmi i ɣa teffɣed ɣar umenɣi ak-d řɛedyan nnek uca SIDI, AREBBI nnek, igga ac ten deg ifassen nnek uca tḥebbsed zzayes d imeḥbas,

11 uca teẓrid jar imeḥbas ict n temɣart, tecna deg waddud, uca temmeẓred ad tt teksid d tamɣart i yixef nnek

12 xenni ad tt tessidfed ɣar taddart nnek uca ad tḥeff azeǧif nnes, ad tqessed iccaren nnes.

13 Ad tekkes arruḍ n tmeḥbast nnes uca ad teqqim di taddart nnek uca ad tesɣuy i babas d yemmas ijj n uyur ikmeř u awarni man aya tzemmared ad xas tadfed uca ad tiřid d aryaz nnes u nettat ad tiři d tamɣart nnek.

14 Uca mařa war d ac teɛjib, ad tt tejjed ad tuyur ɣar řxaḍar nnes, war tt znuzi s nnuqart. War zzayes tegged amecnaw sseřɛet i teǧa, minzi aqa tesseḥqared tt. ^□  

15 Mařa aryaz ɣares tnayen n temɣarin, icten ittexs i-tt, tenneɣnit icarreh i-tt, uca tenni icarreh d tenni ittexs urwen as-dd iḥenjiren, maca amenzu tuɣa-t n tenni icarreh,

16 xenni deg wass nni di ɣa ibḍa řwart n min ɣares iǧan i iḥenjiren nnes, war izemmar ad iwc tasɣart n umenzu i mmis n tenni ittexs deg wemcan i ɣa iwc i mmis n tenni icarreh, wenni d amenzu i yeǧa.

17 Ittxeṣṣa ad inɛem s mmis amenzu n tenni icarreh umi d as i ɣa iwc tnayen n tseqqar zi marra min d as dd-ikkaren, minzi netta d amezwar n teryast nnes u tasɣart n tmenzut d nnes i teǧa. ^■  

18 Mařa ijj n weryaz ɣares mmis d aɣennan d amɣewweɣ nni war ittesřin i wawař n babas niɣ i wawař n yemmas, uca nitni marḥen t, waxxa amenni netta war d asen ittesři,

19 xenni babas d yemmas ad t ksin uca ad t awyen barra zzat i imɣaren n tendint nnes, ɣar tewwart n wemcan mani izeddeɣ. 20 Ad inin i imɣaren n tendint: ‘Wa d mmitneɣ d aɣennan d amɣewweɣ, war ittesři i wawař nneɣ, aqa afus nnes innuqqeb u netta d ameskar.’ 21 Xenni marra iryazen n tendint ad t arejmen ař ɣa immet. Ittxeṣṣa ad tekksed aɛeffan zi řwest nwem ḥima marra Israil ad tseř uca ad teggʷed.

22 Mařa ijj n weryaz igga ijj n ddenb i x iǧa řḥukm n řmewt uca ittwaneɣ, tuyřed i-t x ict n teḥnact n ukeccuḍ, 23 xenni war tejjim řxecbet nnes ad tessens x teḥnact, maca ad t tneḍřed deg wass nni, minzi wenni ittwayřen aqa-t d amenɛuř zi AREBBI. War ssxemmaj tammurt nnek nni d ac i ɣa iwc SIDI, AREBBI nnek, d řwart. ^■