1 Zi řaǧat n iḥenjiren n Yusuf qarrben-dd izeǧifen jar ibabaten n řaǧ n iḥenjiren n Jilɛad, mmis n Makir, mmis n Manassa uca nitni ssiwřen zzat i wudem n Musa u zzat i wudem n imeqqranen, izeǧifen inneɣni n ibabaten n ayt n Israil 2 uca nitni nnan: “SIDI yumur sidi inu maḥend ad iwc tammurt s tqedduḥt i ayt n Israil d řwart. Uca yumur SIDI i sidi inu ad iwc tasɣart n řwart n umatneɣ Ṣalufḥad i yessis. ^■   3 Mařa dewřent nitenti d tinemřač ak-d ijjen zeg iḥenjiren n tqebbař nneɣni n ayt n Israil, xenni ad ittwasemẓi tesɣart nsent di řwart n ibabaten nneɣ uca ad tᵉttwarni tasɣart nsent i tesɣart n teqbič i ɣar i ɣa munent uca ammu ad ittwasemẓi min iǧan d tasɣart nneɣ s tqedduḥt. 4 Meřmi xenni dd ɣa yas useggʷas n usřiwřew i ayt n Israil, xenni ad tᵉttwamarni tesɣart nsent i tesɣart n teqbič ak-d wi i ɣa munent. Ammu i ɣa tᵉttwakkes xenni tesɣart nsent di řwart n teqbič n ibabaten nneɣ.”

5 Xenni yumur Musa i ayt n Israil ɛlaḥsab řumur n SIDI, inna: “Aqa d tidett am mammec tessiweř teqbič n ayt n Yusuf. 6 Wa d awař i zi yumur SIDI x yessis n Ṣalufḥad, iqqar: ‘Ejj i-tent ad meřcent ak-d wenni d asent yarecqen. Ittxeṣṣa mɣir ad meřcent di řaǧ n teqbič n babatsent. 7 War iɛeddeř ad traḥ tesɣart n ayt n Israil zi teqbič ɣar teqbič nneɣni, minzi kuř aryaz n ayt n Israil ad iqqim iṭṭef di tesɣart n teqbič n ibabaten nnes. 8 Kuř tayeǧit nni i ɣa iṭṭfen ict n tesɣart zeg ayt n Israil, ittxeṣṣa as ad temřec ak-d ijj zeg ijj n řaǧ zi teqbič n babas, ḥima kuř ijj zeg ayt n Israil ad iwart tasɣart n ibabaten nnes. ^□   9 War iɛeddeř ad traḥ tasɣart n ict n teqbič ɣar teqbič nneɣni, minzi ittxeṣṣa i kuř ict zi tqebbař n ayt n Israil ad iṭṭef di tesɣart nnes.’ ”

10 Yessis n Ṣalufḥad ggint am mammec t yumur SIDI i Musa.

11 Maḥla, Tirṣa, Ḥujla, Milka d Nuɛa, yessis n Ṣalufḥad, dewřent d tinemřač ak-d iḥenjiren n ɛemmitsent. ^■  

12 Dewřent d tinemřač di řaǧat n ayt n Manassa, mmis n Yusuf. Ammu teqqim tesɣart nsent di teqbič n babatsent.

13 Tina d tiweṣṣa d lfarayiḍ nni yumur SIDI x ufus n Musa i ayt n Israil di řewḍat n Mu’ab, ɣar L'Urdun arendad n Ariḥa.