1 Issiweř SIDI ak-d Musa di řewḍat n Mu’ab ɣar L'Urdun arendad n Ariḥa uca inna:

2 “Umur ayt n Israil ḥima ad wcen, zi řwart nsen i ṭṭfen, tineddam i Ilawiyyen maḥend ad daysent zedɣen. Ad tewcem i Ilawiyyen ɛawed ddmani n tarewsa inni d asen dd-innḍen i tneddam. ^■   3 Tineddam-a ad iřint maḥend ad daysent zedɣen uca ddmani n tarewsa ad iřin i řebhayem nsen u i wagřa nsen u i marra imuddaren nsen. 4 Uca ddmani n tarewsa i iǧan ɣar tneddam nni i ɣa tewcem i Ilawiyyen, ad iřin zeg weɣbar n tendint ɣar barra ařef n iɣaǧen uca ammeni ɣar marra iɣezdisen nnes. 5 Barra n tendint ɣar ccarq ad tɛebbarem ařfayen n iɣaǧen u ɣar ljanub ařfayen n iɣaǧen u ɣar řɣarb ařfayen n iɣaǧen u ɣar ccamal ařfayen n iɣaǧen uca tandint ad tiři di řwest. Ina ad asen iřin d ddmani n tarewsa n tneddam. 6 Tineddam i ɣa tewcem i Ilawiyyen ad iřint setta n tneddam n tarewřa. Ad tent tewcem maḥend ad din yarweř uqettař. Sennej i man aya ad tent tewcem ɛad tnayen u-rebɛin n tneddam. ^■  

7 Marra tineddam i ɣa tewcem i Ilawiyyen, ad iřint tmenya u-rebɛin n tneddam, tina simant nsent d ddmani nsent n tarewsa. 8 X tneddam i ɣa tewcem zeg wagřa n ayt n Israil, ad tent teksim ktar zeg wenni ɣar iǧa waṭṭas u zeg wenni ɣar iǧa drus, ad teksid drus. Kuř ijj ad iwc zi tneddam nnes i Ilawiyyen ɛlaḥsab tasɣart nnes zi řwart.”

9 Issiweř SIDI ak-d Musa, inna:

10 “Siweř ak-d ayt n Israil uca ini asen: ‘Xmi i ɣa teẓwam L'Urdun ɣar temmurt n Kenɛan, ^■  

11 ad tneyycem tineddam nni d awem i ɣa iřint d tineddam n tarewřa, ḥima aqettař, wenni inɣin ḥed zeg uweddar, izemmar ad din yarweř.

12 Tineddam-a ad awem iřint i tarewřa zeg uneqqam, ḥima war ittmetti uqettař qbeř ma ad ibedd zzat i wudem n tmesmunt i řḥukm.

13 Zi tneddam i ɣa tewcem, ad zzaysent iřint setta d tineddam n tarewřa i kenniw.

14 Třata n tneddam ad tent tewcem ɣar tma aya n L'Urdun u třata n tneddam ad tent tewcem di temmurt n Kenɛan. Ad iřint d tineddam n tarewřa. ^■  

15 Setta n tneddam-a ad iřint i tarewřa i ayt n Israil uřa i ubarrani d umɛezzeb di řwest nsen, ḥima wenni inɣin ḥed zeg uweddar, izemmar ad din yarweř.

16 Mařa iwwet i-t s ict n řqecɛet n wuzzař uca immut, xenni aqa netta d aqettař. Aqettař ad ittwaneɣ nican.

17 Mařa iwwet i-t s ijj n weẓru deg ufus i zi izemmar ad immet uca xenni immut, aqa netta d aneqqam. Aneqqam ad ittwaneɣ nican.

18 Niɣ mařa iwwet i-t s ict n řqecɛet n ukeccuḍ deg ufus i zi izemmar ad immet uca xenni immut, aqa netta d aqettař. Aqettař ad ittwaneɣ nican.

19 Aneqqam n idammen ad ineɣ aqettař. Mařa ad t iřqa, ad t ineɣ.

20 U mařa iɛarn i-t s wecrah, niɣ inḍar ɣares ca s neɛmada ařami zzayes immut, ^■   21 niɣ iwwet i-t s řeɛdawet s ufus nnes, ařami zzayes immut, xenni wenni t inɣin ad ittwaneɣ nican. Aqa-t d aqettař. Aneqqam n idammen, ad ineɣ aqettař xmi t ɣa iřqa.

22 Maca mařa tuɣa iɛarren i-t amenni deg wermac n wabřiwen břa řeɛdawet, niɣ inḍar ɣares ca n řqecɛet am iweddar, 23 niɣ am war t iẓri, igga ad xas dd-iwḍa ca n weẓru i zi izemmar ad immet, uca xenni immut am war tuɣi d řeɛdu nnes u netta tuɣa war d as yarezzu řɣar, 24 xenni tamesmunt ad teḥkem jar uqettař d uneqqam n idammen ɛlaḥsab lfarayiḍ-a. 25 Tamesmunt ad tessenjem aqettař zeg ufus n uneqqam n idammen uca tamesmunt ad tejj netta ad iɛqeb ɣar tendint nnes n tarewřa. Ad iqqim din ař řmewt n arrays n ikehhanen wenni t dehnen nitni s zzect iqeddsen. 26 Maca mařa aqettař iffeɣ barra n iymiren n tendint n tarewřa mani yarweř, 27 uca aneqqam n idammen yufa i-t barra n iymiren n tendint n tarewřa uca aneqqam n idammen inɣa wenni inɣin, war xas ca idammen xenni. 28 Minzi tuɣa xas ad iqqim di tendint nnes n tarewřa ař řmewt n arrays n ikehhanen. Maca awarni řmewt n arrays n ikehhanen izemmar ad iɛqeb uqettař ɣar temmurt nni iǧan nnes. 29 Aya ad awem tiři d tawṣeyyet n řḥeqq i marra jjiřat nwem mani ma i ɣa tzedɣem.

30 Kuř ijjen wenni inɣin ḥed, aqa aqettař ad ittwaneɣ ɛlaḥsab aqemmum n řechud, maca ijj n ucehhad waha war izemmar ad iched x ict n nnefs s řmewt. ^■   31 War kessim ca ttaman n weṣřaḥ x řeɛmar n uqettař nni x ittwaḥkem s řmewt, maɣar ittxeṣṣa ad ittwaneɣ nican. 32 War kessim ttaman n ddeyyet x wenni yarewřen ɣar tendint nnes n tarewřa di ṭṭweɛ n weɛqab nnes maḥend ad izdeɣ di temmurt qbeř řmewt n arrays n ikehhanen.

33 War tessɛiǧitem tammurt mani teǧam, minzi idammen ssɛiǧten tammurt uca war izemmar ad ittwafdi x temmurt di ṭṭweɛ n idammen i dayes ittwassizřen, mɣir s idammen n wenni ten issizzřen. 34 War ssxemmjem tammurt mani i ɣa tzedɣem kenniw, di řwest nnes i ɣa zedɣeɣ Necc, minzi Necc d SIDI, wenni izeddɣen di řwesṭ n ayt n Israil.”