1 Issiweř SIDI ak-d Musa, inna:

2 “Umur ayt n Israil uca ini asen: ‘Xmi i ɣa tadfem tammurt n Kenɛan, xenni ta d tammurt i d awem ɣa yiřin d řwart, tammurt n Kenɛan ak-d iymiren nnes ad tiři ammu:

3 Jjihet n ljanub ad ɣarwem tiři zi řexřa n Ṣin ař aymir n Idum uca aymir n ljanub ad ɣarwem yiři zi ṭṭarf aneggaru n Řebḥar Ameǧaḥ di ccarq ^■   4 uca aymir ad imeyyeř zi ljanub ɣar Tsunta n Tɣarḍmiwin uca ad iɛdu ɣar Ṣin uca ṭṭrufa nnes ad dd-awḍen jjihet n ljanub n Qadac-Barniɛ uca ad iɛdu ɣar Ḥaṣar-Addar uca ad iẓwa ɣar Aṣmun. 5 Ad inneḍ weymir zi Aṣmun ɣar Teɣzart n Miṣra uca ṭṭrufa nnes ad awḍen ař řebḥar.

6 Uca aymir n řɣarb ad awem yiři Řebḥar Ameqqran. Wa ad awem yiři d aymir n řɣarb. ^□  

7 Wa ad awem yiři d aymir n ccamal: ad t tarcmem i yixef nwem zeg Ill Agrakal ař adrar n Hur. 8 Zeg wedrar n Hur ad t tarcmem ař mani i ɣa tawḍed ɣar Ḥamat uca ṭṭrufa n weymir ad awḍen ař Ṣadad. 9 Ad yeɛdu weymir ař Zifrun uca ṭṭrufa nnes ad awḍen ař Ḥaṣar-Ɛinan. Wa ad awem yiři d aymir n ccamal.

10 Ad tarcmem aymir nwem n ccarq zi Ḥaṣar-Ɛinan ɣar Cafam

11 uca ad dd-ihwa weymir zi Cfam ař Ribla, ccarq n Ɛayn. Xenni ad dd-ihwa weymir ɛad ktar uca ad yaweḍ ɣar tma n ccarq n Řebḥar n Kinnarat.

12 Uca ad dd-ihwa weymir ɣar L'Urdun uca ṭṭrufa nnes ad awḍen ař Řebḥar Ameǧaḥ. Ta ad awem tiři d tammurt ak-d iymiren nnes i d as dd-innḍen.’ ”

13 Uca Musa yumur ayt n Israil, inna: “Ta d tammurt nni i ɣa tebḍam jar awem s tqedduḥt, tenni x yumur SIDI ad temmewc i tesɛa n tqebbař u ɛad i wezyen n teqbič n Manassa.

14 Minzi taqbič n Rubin tᵉttwasettef ɛlaḥsab taddart n ibabaten nsen u taqbič n Jad tᵉttwasettef ɛlaḥṣab taddart n ibabaten nsen, aqa ṭṭfen tasɣart nsen, u azyen n teqbič n Manassa tᵉṭṭef uřa d nettat tasɣart nnes n řwart.

15 Tnayen n tqebbař d wezyen aqa ṭṭfent řwart nsent ɣar tma aya n L'Urdun, zi Ariḥa ɣar ccarq ɣar manis dd-tneqqar tfuct.”

16 Issiweř SIDI ak-d Musa, inna:

17 “Ina d ismawen n yeryazen inni i ɣa ibḍan tammurt jar awem:

Akehhan Aliɛazar d Yacuwa, mmis n Nun. ^■  

18 Ad teksim ɛawed ijj n umeqqran zi kuř taqbič maḥend ad tebḍam tammurt.

19 Ina d ismawen n yeryazen:

i teqbič n Yahuda, Kalib, mmis n Yafunni

20 i teqbič n ayt n Cimɛun, Cimuwil, mmis n Ɛammihud,

21 i teqbič n Binyamin, Ilidad, mmis n Kaslun,

22 i teqbič n ayt n Dan, ameqqran Buqqi, mmis n Yujli,

23 i teqbič n ayt n Yusuf:

i teqbič n ayt n Manassa, ameqqran Ḥanniyil, mmis n Ifud,

24 i teqbič n ayt n Ifrayim, ameqqran Qimuyil, mmis n Cifṭan,

25 i teqbič n ayt n Zabulun, ameqqran Iliṣafan, mmis n Farnax,

26 i teqbič n ayt n Issakar, ameqqran Falṭiyil, mmis n Ɛazzan,

27 i teqbič n ayt n Acir, ameqqran Axihud, mmis n Calumi,

28 i teqbič n ayt n Naftali, ameqqran Fadahyil, mmis n Ɛammihud.”

29 Ina d inni x yumur SIDI ad bḍan řwart i ayt n Israil di temmurt n Kenɛan.