1 Iřaɣa i Musa uca issiweř SIDI akides zeg Uqiḍun n Umsagar, inna:

2 “Siweř ak-d ayt n Israil uca ini asen:

‘Mařa ḥed zzaywem issqarreb tawhibt i SIDI, xenni ad tessqarrbem tawhibt nwem zi řebhayem, zeg ifunasen d tfunasin niɣ zeg wuǧi. ^□  

3 Mařa tawhibt nnes d taɣarṣt n wecmaḍ zeg ifunasen d tfunasin, xenni ad dd-issqarreb ijj n uwtem icnan qaɛ. Ad t issqarreb ɣar wadaf n Uqiḍun n Umsagar maḥend yiři i arḍa zzat i wudem n SIDI. ^■   4 Ad yegg afus nnes x uzeǧif n tɣarṣt n wecmaḍ uca ammu i ɣa tᵉttwaqbeř tɣarṣt di ṭṭweɛ nnes maḥend ad xas tefdi. 5 Ad iɣarṣ i umeẓyan n ufunas zzat i wudem n SIDI uca iḥenjiren n Harun, ikehhanen, ad dd-ssqarrben idammen, ad zeǧɛen idammen ɣar marra iɣezdisen x uɛalṭar nni iǧan ɣar wadaf n Uqiḍun n Umsagar. 6 Ad ikkes tiřmect n tɣarṣt n wecmaḍ uca ad iqḍeɛ afunas d iceǧiqen. 7 Tarwa n akehhan Harun ad ssarɣen timessi x uɛalṭar uca ad settfen akeccuḍ x tmessi. 8 Tarwa n Harun, ikehhanen, ad settfen iceǧiqen d uzeǧif d tdunt x ukeccuḍ nni iǧan x tmessi i iǧan x uɛalṭar. 9 Netta ad issird adan nnes d iḍaren nnes s waman. Akehhan ad issbexxar man aya marra x uɛalṭar, d taɣarṣt n wecmaḍ, d tawhibt n tmessi, d ict n řefwaḥet ittfuḥen i SIDI.

10 Mařa tawhibt nnes d taɣarṣt n wecmaḍ zeg wuǧi, zeg iḥuřiyyen niɣ zeg iɣayḍen, xenni ittxeṣṣa ad dd-issqarreb awtem icnan qaɛ.

11 Ad as iɣarṣ zzat i wudem n SIDI ɣar uɣezdis n ccamal n uɛalṭar uca iḥenjiren n Harun, ikehhanen, ad zeǧɛen idammen nnes x uɛalṭar ɣar marra iɣezdisen nnes.

12 Ad t ibḍa d iceǧiqen, ak-d azeǧif nnes d tdunt nnes, uca akehhan ad ten isettef x ukeccuḍ nni iǧan x tmessi i iǧan x uɛalṭar.

13 Ad issird adan nnes d icekraden nnes s waman. Akehhan ad issqarreb man aya marra u ad t issbexxar x uɛalṭar. Aqa d ict n tɣarṣt n wecmaḍ, ict n tewhibt n tmessi, ict n řefwaḥet ittfuḥen i SIDI.

14 Mařa tawhibt nnes d taɣarṣt n wecmaḍ zeg ijḍaḍ i SIDI, xenni ad dd-issqarreb tawhibt nnes zi tejlilliḥin niɣ zeg idbiren imeẓyanen.

15 Akehhan ad t yawi ɣar uɛalṭar, ad as ikkes azeǧif uca ad t issbexxar x uɛalṭar. Ad iẓemm idammen nnes x uɣezdis n uɛalṭar

16 uca ad as ikkes aseyru ak-d min dayes iqqimen u ad inḍar aya zzat i uɛalṭar ɣar uɣezdis n ccarq x wemcan n iɣɣeḍ.

17 Ad t ijbed zeg wefriwen, maca war t ibeṭṭi ca, uca akehhan ad t issbexxar x uɛalṭar, x ukeccuḍ nni iǧan x tmessi, d taɣarṣt n wecmaḍ, d tawhibt n tmessi, d řefwaḥet ittfuḥen i SIDI.’ ”