1 Issiweř SIDI ak-d Musa, inna:

2 “Deg wass amezwaru n uyur amezwaru ad tessgeɛɛded Tazeddiɣt, Aqiḍun n Umsagar. 3 Ad dayes tegged Ttabut n Cchadet uca ad tedřed Ttabut s uřeḥḥaf. 4 Ad tessidfed tazewḍa uca ad tt tsettfed asettef nnes. Ad tessidfed řqendiř uca ad tessiɣed řefnarat nnes. ^■   5 Ad tessarsed aɛalṭar n wureɣ i řebxur zzat i Ttabut n Cchadet uca ad tegged arwaq n wadaf zzat n Tzeddiɣt. ^■   6 Ad tessarsed aɛalṭar n wecmaḍ zzat i wadaf n Tzeddiɣt, Aqiḍun n Umsagar. 7 Ad tessarsed tabanyut jar Uqiḍun n Umsagar d uɛalṭar uca ad dayes tegged aman. 8 Ad tessbedded řemraḥ ɣar marra iɣezdisen nnes uca ad tayřed arwaq n wadaf n řemraḥ. ^■   9 Ad teksid zzect i wedhan uca ad tdehned Tazeddiɣt d marra min dayes iǧan. Ad tt tessqeddsed ak-d marra řeqcuɛ nnes. Ad tiři nettat d tamqeddast.

10 Ad tdehned aɛalṭar n wecmaḍ s marra řeqcuɛ nnes. Ad tessqeddsed aɛalṭar. Aɛalṭar ad yiři d amqeddas aṭṭas. ^■  

11 Ad tdehned tabanyut d uḍar nnes uca ad tt tessqeddsed.

12 Ad dd-tessqarrbed Harun d iḥenjiren nnes ɣar wadaf n Uqiḍun n Umsagar uca ad ten tessirded s waman.

13 Ad tessyarḍed i Harun arruḍ iqeddsen uca ad t tdehned uca ad t tessqeddsed maḥend ad ayi yiři d akehhan.

14 Xenni ad dd-tessqarrbed iḥenjiren nnes uca ad asen tessyarḍed arruḍ n teřmect.

15 Ad ten tdehned amecnaw mammec tdehned babatsen, maḥend ad ayi xedmen am ikehhanen. Ad yiři wedhan nsen i nitni d ict n tukehhant i řebda i marra jjiřat nsen.”

16 Igga Musa am mammec marra i d as yumur SIDI, wah, ammu i t igga.

17 Imsar deg uyur amezwaru n useggʷas wiss tnayen, deg uyur amezwaru, aqa ssgeɛɛden Tazeddiɣt. ^■  

18 Musa issgeɛɛed Tazeddiɣt, issars tiyarsawin nnes, igga daysent tifeřwin, igga xasent tiḥenya n uɛarreḍ tinni xasent iẓwan, uca issbedd ipilaren nnes.

19 Ibezzeɛ Aqiḍun x Tzeddiɣt uca issars xas taseqqaft n Uqiḍun am mammec yumur SIDI i Musa. 20 Iksi Cchadet uca issars i-tt daxeř di Ttabut uca icedd iɛumad i tarebbut ɣar Ttabut uca issars taqebbart n weṣřaḥ x Ttabut. 21 Issidef Ttabut di Tzeddiɣt uca yuyeř ařeḥḥaf am dduri uca issduři Ttabut n Cchadet am mammec yumur SIDI i Musa. ^■   22 Issars tazewḍa deg Uqiḍun n Umsagar, ɣar uɣezdis n ccamal n Tzeddiɣt, zzat i uřeḥḥaf. 23 S usettef issars xas aɣrum zzat i wudem n SIDI, am mammec yumur SIDI i Musa. ^■   24 Issars řqendiř deg Uqiḍun n Umsagar, nican deg urendad n tzewḍa, ɣar jjihet n ljanub n Tzeddiɣt. 25 Issarɣ tiftiřin zzat i wudem n SIDI, am mammec yumur SIDI i Musa. 26 Iwca amcan i uɛalṭar n wureɣ deg Uqiḍun n Umsagar zzat i uřeḥḥaf. 27 Issbexxar xas řebxur ittfuḥen am mammec yumur SIDI i Musa. 28 Yuyeř arwaq ɣar wadaf n Tzeddiɣt. 29 Iwca amcan i uɛalṭar n wecmaḍ ɣar wadaf n Tzeddiɣt, Aqiḍun n Umsagar. Issbexxar xas taɣarṣt n wecmaḍ d tewhibt n řɣiǧet, am mammec yumur SIDI i Musa. 30 Issars tabanyut jar Uqiḍun n Umsagar d uɛalṭar. Igga dayes aman i usird. 31 Musa d Harun d iḥenjiren nnes ssirden zzayes ifassen d iḍaren nsen. 32 Řami tuɣa ttadfen ɣar Uqiḍun n Umsagar u řami dd-ttqarraben ɣar uɛalṭar, ssirden ixef nsen am mammec yumur SIDI i Musa. 33 Ɣar marra iɣezdisen n Tzeddiɣt d uɛalṭar ittwagg as-dd řemraḥ uca yuyeř netta arwaq n wadaf n řemraḥ. Ammu i ikemmeř Musa řxedmet.

34 Xenni idřa useynu Aqiḍun n Umsagar uca aɛuǧi n SIDI iccur Tazeddiɣt. ^■   35 War izemmar Musa ad yadef ɣar Uqiḍun n Umsagar, minzi aseynu yarsa xas u aɛuǧi n SIDI iccur Tazeddiɣt. 36 Řami-dd igeɛɛed useynu zi sennej n Tzeddiɣt, xenni fesyen ayt n Israil iqiḍan nsen uca ammu muṭṭyen zeg wemcan ɣar wemcan. 37 Mařa war dd-igeɛɛed useynu, war fesyen iqiḍan nsen ař ass i di tuɣa dd-igeɛɛed. 38 Minzi aseynu n SIDI tuɣa yarsa x Tzeddiɣt s uziř, uca di ǧiřet tuɣa timessi zzat i tiṭṭawin n marra taddart n Israil deg imuṭṭuyen nsen zeg wemcan ɣar wemcan. ^■