1 Ggin ɛawed arruḍ i tsexxart s řeqṭen adeḥmi d urjuwani d uzeggʷaɣ iḥedqen ḥima ad zzayes isexxar di Zzawect Iqeddsen. Ɛawed ggin arruḍ iqeddsen i Harun, am mammec d as yumur SIDI i Musa. ^■  

2 Igga apalṭu n ukehhan s wureɣ u s řeqṭen adeḥmi d urjuwani d uzeggʷaɣ idḥedqen u s řeqṭen azdad imuden. ^■   3 Nitni bezzɛen tiřwiḥin n wureɣ uca qessen zzaysent ifiřan ḥima ad ten xeyyḍen jar ufiřu adeḥmi d urjuwani d uzeggʷaɣ iḥedqen u jar řeqṭen azdad, d man aya tuɣa d ict n řxedmet am tt ittegg ufennan. ^■   4 Ggin as tiɣarḍin imseřsaqen uca ssmunen apalṭu ɣar tnayen n ixfawen nnes. 5 Taḥezzamt izewwqen i tuɣa ɣar upalṭu nnes, tuɣa teřseq dayes, tedweř d ict akides, tᵉttwagg s ufiřu n wureɣ u s ufiřu adeḥmi d urjuwani d uzeggʷaɣ iḥedqen u s řeqṭen azdad imuden, am mammec yumur SIDI i Musa. ^■   6 Nitni ggin ɛawed iẓra n biril, inni ittwaṭṭfen di tcuyar n wureɣ, neqcen ten am ijj n wenqac n txadent n ucemmiɛ s ismawen n ayt n Israil. ^■   7 Igga i-ten x tɣarḍin n upalṭu, am iẓra n řidaret i ayt n Israil, am mammec yumur SIDI i Musa. ^■  

8 Igga tajmect, ict n řxedmet am tt ittegg ufennan amecnaw apalṭu s ifiřan n wureɣ u s řeqṭen adeḥmi d urjuwani d uzeggʷaɣ iḥedqen u s řeqṭen azdad imuden. 9 Tuɣa-tt s arebɛa n tɣemmura. Ḍefsen tajmect. Tuɣa tuzzeggart nnes d ijj n cbar n ufus uca uřa d tiru nnes d ijj n cbar n ufus. Tuɣa iḍfes x tnayen. ^■  

10 Settfen dayes arebɛa n řeṣfuf n yeẓra: ijj n ṣṣef s yijj n řeɛqiq d azeggwaɣ d ict n tyaqut d yict n smaraxt. D wa d ṣṣef amezwar. ^■  

11 Ṣṣef wiss tnayen s yijj n karbunkel d yijj n ṣaffir aziza d yijj n diamanti. ^■  

12 Ṣṣef wiss třata s yijj n weẓru n yasintu d yijj n axat d yijj umatist.

13 Ṣṣef wiss arebɛa s yict n texrisulit d yijj n biril d yijj n yaspis. Tuɣa ttwaṭṭfen di tcuyar nsen n wureɣ.

14 Iẓra ad xasen iřin ismawen n ayt n Israil, tenɛac n yeẓra ɛlaḥsab ismawen nsen, s ineqqacen n txadent n ucemmiɛ, kuř aneqqac ɛlaḥsab isem nnes i d as dd-yusin. Aqa aten i tenɛac n tqebbař.

15 Ɣar ixfawen n tejmect ggin tiseddyin s wureɣ iṣfan tinni imuden amecnaw ijj n ufiřu.

16 Ggin tnayen n tcuyar n wureɣ d tnayen n texrazin n wureɣ uca cedden tnayen n texrazin ɣar tnayen n ixfawen n tejmect.

17 Cedden tnayen n ssnaseř imuden n wureɣ ɣar tnayen n texrazin ɣar ixfawen n tejmect.

18 Tnayen n ixfawen n tnayen n ssnaseř imuden, cedden ten ɣar tnayen n tcuyar uca wcin tent x ṭɣarḍin n upalṭu, deg wudem n zzat.

19 Ggin ɛawed tnayen n texrazin n wureɣ, cedden tent ɣar tnayen n ixfawen nneɣni n tejmect, di tma nnes nni qibač i upalṭu, ɣar daxeř. 20 Ggin ɛawed tnayen n texrazin n wureɣ, cedden tent x tnayen n tɣarḍin n upalṭu n ukehhan, swadday, ɣar zzat, qibač i useřqi nnes ɣar sennej i tḥezzamt izewwqen n upalṭu. 21 Uca cedden tejmect s texrazin nnes ɣar texrazin n upalṭu n ukehhan ak-d ijj n ufiřu adeḥmi ařami idweř sennej i tḥezzamt izewwqen n upalṭu, uca xenni war tbeṭṭi tejmect x upalṭu, am mammec yumur SIDI i Musa.

22 Igga ɛawed aseřham n upalṭu n ukehhan am mammec t ittegg uxeyyaḍ, tuɣa-t d adeḥmi marra. 23 Arzam n useřham tuɣa-t di řwest nnes amecnaw arzam n yiri n warruḍ n wuzzař n uɛeskari. Deg wenneḍ n warzam din ict n tma ḥima war ittcarrig. 24 Ɣar tmuwwa n wadday n useřham ggin tiremmanin zi řeqṭen adeḥmi d urjuwani d uzeggʷaɣ iḥedqen zeg ifiřan imuden. 25 Ggin ɛawed nnwaqes n wureɣ iṣfan uca ssarsen nnwaqes nni jar tremmanin ɣar tmuwwa n wadday n useřham, deg wenneḍ jar tremmanin. 26 Ijj n nnaqus d ict n tremmant, xenni ɛawed ijj n nnaqus d ict n tremmant, ɣar tmuwwa n wadday n useřham deg wenneḍ maḥend ad dayes ggen řxedmet, am mammec yumur SIDI i Musa.

27 Ggin arruḍ n teřmect i Harun d iḥenjiren nnes s řeqṭen azdad, am mammec t ittegg uxeyyaḍ, ^■   28 areẓẓet n řeqṭen azdad d tcuccay n řeqṭen azdad d ssraweř n řeqṭen s řeqṭen azdad imuden 29 u tuɣa taḥezzamt n řeqṭen azdad imuden u n ufiřu adeḥmi d urjuwani d uzeggʷaɣ iḥedqen, amecnaw ijj n umudi n uxeyyaḍ, am mammec yumur SIDI i Musa.

30 Ggin tařwiḥt n temrist iqeddsen s nnuwwar s wureɣ iṣfan uca neqcen dayes tira aya: “AMQEDDAS i SIDI!”, am mammec neqcen taxadent n ucemmiɛ. ^■   31 Uca cedden as ijj n ufiřu imuden adeḥmi ḥima ad tt ayřen sennej i areẓẓet, am mammec yumur SIDI i Musa. ^■  

32 Ammu i tkemmeř marra řxedmet n Tzeddiɣt, Aqiḍun n Umsagar. Ayt n Israil aqa ggin tt am mammec yumur SIDI i Musa, ammu i tt ggin.

33 Ksin Tazeddiɣt ɣar Musa, Aqiḍun d marra řeqcuɛ nnes d tsennarin nnes d tfeřwin nnes d tḥenya nnes n uɛarreḍ d ipilaren nnes d tyarsawin nnes ^■   34 d tseqqaft n iřmawen izeggʷaɣen n icarriyyen d tseqqaft n iřmawen n ddenfiřat d uřeḥḥaf i dduri, 35 Ttabut n Cchadet d iɛumad nnes i tarebbut d tqebbart n weṣřaḥ 36 d tazewḍa ak-d marra řeqcuɛ nnes d weɣrum n wescan ^■   37 d řqendiř izdigen d řefnarat nnes, řefnarat nni tuɣa ittxeṣṣa ad ttwaswejdent, d marra řeqcuɛ nnes d zzect i tfawt 38 d uɛalṭar n wureɣ d zzect i wedhan d řebxur ittfuḥen d arwaq i wadaf n Uqiḍun 39 d uɛalṭar n nnḥas s tracca n nnḥas d iɛumad nnes i tarebbut d marra řeqcuɛ nnes d tbanyut ak-d uḍar nnes 40 d řizarat n řemrah ak-d ipilaren nsent d tyarsawin nsen, uřa d arwaq n wadaf n řemraḥ d ifiřan nnes d řewtad nnes d marra řeqcuɛ i tsexxart n Tzeddiɣt, i Uqiḍun n Umsagar 41 uřa d arruḍ i tsexxart ḥima ad zzayes sexxaren di Zzawect Iqeddsen, arruḍ iqeddes i ukehhan Harun d arruḍ i iḥenjiren nnes, ḥima ad sexxaren d ikehhanen. ^■   42 Ggin ayt n Israil marra řxedmet am mammec marra i yumur SIDI i Musa. 43 Ixzar Musa ɣar marra řxedmet uca iẓra belli tᵉttwagg am mammec yumur SIDI, wah, ammu i-tt ggin. Uca ibark i-ten Musa.