38
1 Igga aɛalṭar n wecmaḍ s ukeccuḍ n ukasiya. Tuzzeggart nnes tuɣa-tt xemsa n iɣaǧen u tiru nnes xemsa n iɣaǧen, tuɣa-t s arebɛa n tɣemmura, u řuɛřa nnes tuɣa-t třata n iɣaǧen. ■ 2 Ɣar arebɛa n tɣemmura igga accawen nnes. Accawen nnes tuɣa aten d ijjen akides. Iɣeǧef i-t s nnḥas. □ ■ 3 Igga marra řeqcuɛ i uɛalṭar: tiydurin d iɣenjayen d ṭṭawyat i urucci d furcayat d tmejmarin, marra řeqcuɛ-a igga i-ten s nnḥas. ■ 4 Igga ict n tracca, ijj n umudi n nnḥas, i uɛalṭar uca igga i-tt sadu i tma nnes, swadday ɣar wezyen n uɛalṭar. ■ 5 Issefsi arebɛa n texrazin i arebɛa n ixfawen n tracca n nnḥas maḥend ad daysent ssidfen iɛumad i tarebbut. 6 Igga iɛumad i tarebbut zeg ukeccuḍ n ukasiya uca iɣeǧef i-ten s nnḥas. 7 Igga iɛumad i tarebbut di texrazin ɣar iɣezdisen n uɛalṭar maḥend ad zzaysen t arbun. Igga i-t s tfeřwin ak-d řxawi di daxeř nsent. ■ 8 Igga tabanyut n nnḥas s uḍar nnes n nnḥas zi tisitin n terbiɛt n temɣarin nni ittwareqqmen maḥend ad xedment ɣar wadaf n Uqiḍun n Umsagar. ■
9 Igga řemraḥ. Ɣar jjihet n ljanub, ɣar yeffus, tuɣa tuzzeggart n řizarat n řemraḥ mya n iɣaǧen n řeqṭen azdad imuden. ■
10 Ɛicrin n ipilaren nnes d ɛicrin n tyarsawin nsen tuɣa aten n nnḥas. Tisennarin n ipilaren d iqeḍban nsen i useřqi tuɣa aten n nnuqart.
11 Ɣar uɣezdis n ccamal tuɣa din řizarat s ict n tuzzeggart n mya n iɣaǧen ak-d ɛicrin n ipilaren nsent u ak-d ɛicrin n tyarsawin nsen n nnḥas. Tisennarin n ipilaren d iqeḍban nsen i useřqi tuɣa aten n nnuqart.
12 Ɣar uɣezdis n řɣarb tuɣa din řizarat n xemsin n iɣaǧen ak-d ɛecra n ipilaren nsent d ɛecra n tyarsawin nsen. Tisennarin n ipilaren d iqeḍban nsen i useřqi tuɣa aten n nnuqart.
13 Ɣar uɣezdis n ccarq, ɣar jjihet n wenqar n tfuct, ict n tjartiřt n xemsin n iɣaǧen.
14 Tuɣa řizarat ɣar ijj n uɣezdis n zzat xemmesṭac n iɣaǧen di tuzzeggart ak-d třata n ipilaren nsent d třata n tyarsawin nsen.
15 Ɣar uɣezdis n zzat nneɣni n wadaf n řemraḥ, ɣar uɣezdis-a d uɣezdis nni, tuɣa řizarat daysent xemmesṭac n iɣaǧen di tuzzeggart, ak-d třata n ipilaren nsent d třata n tyarsawin nsen.
16 Marra řizarat nni d as dd-innḍen i řemraḥ tuɣa atent n řeqṭen azdad imuden.
17 Tiyarsawin n ipilaren tuɣa atent n nnḥas d tsennarin n ipilaren d iqeḍban nsen i useřqi tuɣa aten s nnuqart uca takursit x tzeǧifin nsen tuɣa-tt zi nnuqart d marra ipilaren n řemraḥ tuɣa ɣeǧfen s nnuqart.
18 Tuɣa arwaq ɣar wadaf n řemraḥ amecnaw amudi n uxeyyaḍ s řeqṭen adeḥmi d urjuwani d uzeggʷaɣ iḥedqen u s řeqṭen azdad imuden. Tuzzeggart nnes tuɣa-tt ɛicrin n iɣaǧen u řuɛřa x marra tiru n řemraḥ xemsa n iɣaǧen, amecnaw řizarat n řemraḥ.
19 Arebɛa n ipilaren d arebɛa n tyarsawin nsen tuɣa aten s nnḥas d tsennarin nsen s nnuqart uca takursit x tzeǧifin nsen uřa d iqeḍban nsen i useřqi tuɣa aten s nnuqart. 20 Marra řewtad n Tzeddiɣt d řemraḥ i d as dd-innḍen tuɣa aten s nnḥas.
21 Man aya d min ssuffɣen nitni i Tzeddiɣt, Tazeddiɣt n Cchadet, uca zemmen t s řumur n Musa s tsexxart n Ilawiyyen, s ufus n Itamar, mmis n Harun, akehhan. 22 Baṣaliyil mmis n Uri, mmis n Ḥur, zi teqbič n Yahuda, igga marra min d as yumur SIDI i Musa. 23 Tuɣa akides Ahuliyab, mmis n Axisamak, zi teqbič n Dan. Tuɣa-t d aneqqac d bu-ṣṣenɛet, axeyyaḍ n řeqṭen adeḥmi d urjuwani d uzeggʷaɣ iḥedqen d řeqṭen azdad.
24 Marra ureɣ i ssxedmen nitni i řxedmet ɣar marra řxedmet i iggin di Zzawect Iqeddsen, ixs ad yini ureɣ n tewhibin n wenhezzi, tuɣa: tesɛa u-ɛicrin n talintat u sebɛa-mya u-třatin n iciqlen ɛlaḥsab aciql iqeddsen.
25 Nnuqart n yinni ittwaḥesben n tmesmunt tuɣa-tt mya n talintat d ařef u-sebɛa-mya u-xemsa u-sebɛin n iciqlen, ɛlaḥsab aciql iqeddsen. 26 Ijj n ‘ubika’ i yijj n bnadem, aqa-t d azyen n uciql ɛlaḥsab min dd-ittawi uciql iqeddsen, zi marra wi iɛdun ɣar yenni ittwaḥesben zi ɛicrin n iseggʷusa sennej, d man aya i setta-mya u-teřt-ařaf u-xemsa-mya u-xemsin n yeryazen. 27 Tuɣa din mya n talintat n nnuqart ḥima ad zzayes ssfesyen tyarsawin n Zzawect Iqeddsen d tyarsawin n uřeḥḥaf: mya n tyarsawin zi mya n talintat, ixs ad yini ict n talint i yict n tyarsa. 28 Zeg wařef u-sebɛa-mya u-xemsa u-sebɛin n iciqlen igga tisennarin i ipilaren, iɣeǧef tizeǧifin nsen uca icedd ɣarsen iqeḍban i useřqi.
29 Nnḥas n tewhibin n wenhezzi tuɣa-t sebɛin n talintat d ařfayen u-arebɛa-mya n iciqlen. 30 S man aya igga tyarsawin i wadaf n Uqiḍun n Umsagar d uɛalṭar n nnḥas d tracca nnes n nnḥas d marra řeqcuɛ n uɛalṭar 31 d tyarsawin n ipilaren n řemraḥ i d as dd-innḍen d tyarsawin n wadaf n řemraḥ d marra řewtad n Tzeddiɣt d marra řewtad n ipilaren i d as dd-innḍen i řemraḥ.