1 “Mařa ḥed issqarreb-dd tawhibt n řɣiǧet ɣar SIDI, ad tiři tewhibt nnes n waren azdad uca ad xas iseyyeb zzect uca ad xas issars jjawi. ^■   2 Ad tt yawi ɣar iḥenjiren n Harun, ikehhanen, uca ad zzayes iksi ijj n wuru iccur zeg waren azdad nni u zi zzect nni ak-d marra jjawi, uca akehhan ad issbexxar aya x uɛalṭar i řidaret i tewhibt nni, d tawhibt n tmessi, d řefwaḥet ittfuḥen i SIDI. ^■   3 Min iqqimen n tewhibt n řɣiǧet ad yiři i Harun u i iḥenjiren nnes. Aqa d amqeddas qaɛ zi marra tiwhibin n tmessi n SIDI. ^■  

4 Mařa tesqarrbed tawhibt i iǧan d tawhibt n řɣiǧet darḥen tt di tefqunt, xenni ad tiři d řemsemnat břa antun, ixeǧḍen s zzect, uřa d tiřfaf břa antun ttwadehnent s zzect, marra zeg waren azdad.

5 Mařa tawhibt nnek d tawhibt n řɣiǧet ggʷin tt x wexdim, ad tiři n waren n azdad břa antun, xeǧḍen tt s zzect. 6 Ad ten tarẓed d ifetwiten uca ad xas tseyybed zzect. Aqa-tt d ict n tewhibt n řɣiǧet.

7 Mařa tawhibt nnek d tawhibt n řɣiǧet ggʷin tt di ṭṭajjin, ad tiři tewjed s waren azdad ak-d zzect. 8 Tawhibt n řɣiǧet i zzaysen iwejden, ad tt tawyed ɣar SIDI. Bnadem ad zzayes dd-iqarreb ɣar ukehhan uca wanita ad tt yawi ɣar uɛalṭar. 9 Ad iksi ukehhan zi tewhibt n řɣiǧet i řidaret uca ad tt issbexxar x uɛalṭar, aqa d tawhibt n tmessi, d řefwaḥet ittfuḥen i SIDI.

10 Min iqqimen n tewhibt n řɣiǧet ad yiři i Harun u i iḥenjiren nnes. Aqa-t d amqeddas qaɛ zi tewhibin n tmessi n SIDI.

11 Uřa d ict n tewhibtn řɣiǧet ad zzayes dd-tqarrbem ɣar SIDI war tᵉttiři tewjed s wentun, maɣar zi min ma n wentun d zi min ma tamment, war zzayes tessbexxaram ca uřa d ict n tewhibt n tmessi i SIDI.

12 Ad dd-tessqarrbem tawhibt n usuffeɣ amezwaru n ṣṣabet ɣar SIDI, maca nitni war zemmaren ad ssbexxaren tawhibt-a x uɛalṭar am řefwaḥet ittfuḥen i SIDI. ^■  

13 Kuř tawhibt n tewhibt n řɣiǧet nnek ad tiři tmeǧḥed s tmeǧaḥṭ. Tameǧaḥt n Řɛahd n AREBBI nnek war tzemmar ad tenqes ɣar tewhibt n řɣiǧet nnek. Ad tqeddmed tameǧaḥt ɣar kuř tawhibt nnek. ^■  

14 Mařa tqarrbed-dd ɣar SIDI s tewhibt n tmenzut n řɣiǧet, ad dd-tqarrbed s tewhibt n řɣiǧet zi tmenzut nnek zi tidrin yiwḍen, tinni ittwafaren x tmessi, řḥebb aziza ibaryen.

15 Ad xas tseyybed zzect u ad xas tessarsed jjawi, aqa-t d tawhibt n řɣiǧet.

16 Xenni ad issbexxar ukehhan ict n řidaret zi řḥebb ibaryen u zi zzect nnes ak-d marra jjawi nnes. Aqa-tt d tawhibt n tmessi i SIDI.”