1 “Mařa tawhibt nnes d tɣarṣt n řehna, ittxeṣṣa, mařa xenni issqarreb-dd amuddar, ad yiři d awtem niɣ d tawtemt n ifunasen d tfunasin, ad dd-issqarreb ijj n umuddar icnan qaɛ zzat i wudem n SIDI.

2 Ad issars afus nnes x uzeǧif n tewhibt nnes uca ad as iɣarṣ qibač i wadaf n Uqiḍun n Umsagar uca iḥenjiren n Harun, ikehhanen, ad zeǧɛen idammen nnes x uɛalṭar ɣar marra iɣezdisen nnes. 3 Zi tewhibt n řehna ad dd-issqarreb ict tewhibt n tmessi i SIDI, s tdunt i idřin adan d marra tadunt i iǧan x wadan. ^■   4 Ad ikkes tnayen n tiẓẓař ak-d tdunt i xasent iǧan ɣar tejɛinna uřa d min yuyřen ɣar tsa u yarsa x tiẓẓař. ^□   5 Tarwa n Harun ad ssbexxaren aya x uɛalṭar x tɣarṣt n wecmaḍ i iǧan x ukeccuḍ i din iǧan x tmessi, aqa-t d tawhibt n tmessi, d řefwaḥet ittfuḥen i SIDI. ^■  

6 Mařa tawhibt nnes d taɣarṣt n řehna i SIDI, awtem niɣ d tawtemt n wuǧi, xenni ad dd-issqarreb ijj n umudar icnan qaɛ.

7 Mařa d uḥuři i dd-issqarreb d taɣarṣt, xenni ad t-i-dd issqarreb zzat i wudem n SIDI 8 uca ad issars afus nnes x uzeǧif n tewhibt nnes uca ad as iɣarṣ zzat i Uqiḍun n Umsagar uca iḥenjiren n Harun ad zeǧɛen idammen nnes x uɛalṭar ɣar marra iɣezdisen nnes. 9 Ad dd-issqarreb tadunt n tɣarṣt n řehna am ict n tewhibt n tmessi i SIDI: marra tanewwart n tadunt nni yudsen abeɛṣuṣ ad tt ikkes, uřa d tadunt i idřin adan d marra tadunt i iǧan x wadan

10 uca ad ikkes tnayen n tiẓẓař ak-d tdunt i xasent iǧan ɣar tejɛinna uřa d min yuyřen ɣar tsa u yarsa x tiẓẓař.

11 Akehhan ad issbexxar aya x uɛalṭar. Aqa d macca, ict n tewhibt n tmessi i SIDI. ^■  

12 Mařa tawhibt nnes d iɣayḍ, xenni ad t-i-dd-issqarreb zzat i wudem n SIDI.

13 Ad issars afus nnes x uzeǧif nnes uca ad as iɣarṣ zzat i Uqiḍun n Umsagar uca iḥenjiren n Harun ad zeǧɛen cwayt n idammen nnes x uɛalṭar ɣar marra iɣezdisen nnes.

14 Ad dd-issqarreb zzayes tawhibt nnes, ixs ad yini tadunt i idřin adan u marra tadunt i iǧan x wadan, am tewhibt n tmessi i SIDI

15 uca ad ikkes uřa d tnayen n tiẓẓař ak-d tdunt i xasent iǧan ɣar tejɛinna uřa d min yuyřen ɣar tsa u yarsa x tiẓẓař.

16 Akehhan ad issbexxar aya x uɛalṭar, aqa d macca n tewhibt n tmessi s ict n řefwaḥet ittfuḥen. Marra tadunt ad tiři i SIDI.

17 Ta d tawṣeyyet i řebda i marra jjiřat nwem, mani ma i ɣa tzedɣem: marra tadunt d marra idammen war ten ttᵉttem.” ^■