1 Issiweř SIDI ak-d Musa, inna:

2 “Siweř ak-d ayt n Israil, ini:

‘Mařa ca n yijjen ixḍa am iweddar, x marra řumurat n SIDI x min war ittxeṣṣi ad yegg, u netta ixḍa deg ict zzaysent, xenni ad tiři tmesřact ammu:

3 Mařa akehhan amedhun ixḍa ařami idweř řgens ixḍa, ad dd-issqarreb ijj n uyenduz, ameẓyan icnan qaɛ n ufunas, am tɣarṣt n ddenb i SIDI di ṭṭweɛ n ddenb nnes i igga. 4 Ad yawi amwa nni ɣar wadaf n Uqiḍun n Umsagar, zzat i wudem n SIDI, uca netta ad issars afus nnes x uzeǧif n uyenduz uca ad as iɣarṣ i uyenduz zzat i wudem n SIDI. 5 Xenni akehhan amedhun ad iksi zeg idammen n uyenduz uca ad t yawi ɣar Uqiḍun n Umsagar. ^■   6 Ad issuf ukehhan aḍaḍ nnes deg idammen uca ad irucc s idammen nni sebɛa n twařawin zzat i wudem n SIDI, zzat i uřeḥḥaf n Zzawect Iqeddsen. 7 Ad igg ukehhan cwayt n idammen x waccawen n uɛalṭar n řebxur ittfuḥen i din zzat i wudem n SIDI deg Uqiḍun n Umsagar. Netta ad ifarreɣ marra idammen i iqqimen n uyenduz ɣar uḍar n uɛalṭar n wecmaḍ ɣar wadaf n Uqiḍun n Umsagar. ^□  ■   8 Ad ikkes marra tadunt n uyenduz n tɣarṣt: tadunt i idřin adan d marra tadunt i iǧan x wadan ^□  ■   9 uca ad ikkes tnayen n tiẓẓař ak-d tdunt i xasent iǧan ɣar tejɛinna uřa d min yuyřen ɣar tsa u yarsa x tiẓẓař, ^□  

10 amecnaw mammec ikkes man aya x ufunas n tɣarṣi n řehna, uca akehhan ad issbexxar aya x uɛalṭar n wecmaḍ. ^■  

11 Iřem n uyenduz d marra aysum nnes ak-d uzeǧif d icekrad nnes d wadan nnes d umessař nnes i dayes iǧan, ^■  

12 aqa marra ayenduz ad t issuffeɣ barra i řmargeḥ n řɛeskar ɣar ijj n wemcan iṣfa mani tteggen iɣɣeḍ uca ad t issecmeḍ s tmessi x ukeccuḍ. Ad t cemḍen mani zeǧɛen iɣɣeḍ. ^■  

13 Mařa teffeɣ tmesmunt n Israil marra zeg webrid uca teffar tmesřact x tiṭṭawin n wegraw n řgens, uca nitni ggin ict n řḥajjet nni iffɣen x marra řumurat n SIDI, zi jjihet n min war ittxeṣṣi ad yegg, uca idweř daysen umarwas, ^■  

14 uca iban-dd ddenb i zi iffɣen x webrid, xenni ad dd-issqarreb wegraw n řgens ijj n uyenduz, ameẓyan n ufunas, d taɣarṣt i ddenb, uca ad t awyen zzat i Uqiḍun n Umsagar.

15 Imɣaren n tmesmunt ad ssarsen ifassen nsen x uzeǧif n umwa zzat i wudem n SIDI uca netta ad as iɣarṣ i uyenduz nni zzat i wudem n SIDI.

16 Akehhan amedhun ad yawi cwayt zeg idammen n uyenduz ɣar Uqiḍun n Umsagar

17 uca ad issuf ukehhan aḍaḍ nnes deg idammen uca ad irucc s idammen sebɛa n twařawin zzat i wudem n SIDI, zzat i uřeḥḥaf.

18 Netta ad igg cwayt zeg idammen nni x waccawen n uɛalṭar nni iǧan zzat i wudem n SIDI deg Uqiḍun n Umsagar. Xenni ad ifarreɣ marra idammen iceṭṭen ɣar uḍar n uɛalṭar n wecmad i din zzat i wadaf n Uqiḍun n Umsagar.

19 Ad xas ikkes marra tadunt uca ad tt issbexxar x uɛalṭar. 20 Uca ad igg s umwa aya am mammec igga s uyenduz n tɣarṣt n ddenb, ammu t i ɣa yegg. Ad xasen ifdi ukehhan uca ad asen ittwaɣfar. ^□   21 Xenni ad issuffeɣ ayenduz barra i řmargeḥ n řɛeskar uca ad t issecmeḍ amecnaw mammec issecmeḍ ayenduz amezwaru. Aqa-tt d taɣarṣt n ddenb n wegraw n řgens.

22 Mařa ijj n umɣar ixḍa uca am ittu netta, igga ict n řḥajjet nni itteffɣen x webrid zi marra tiweṣṣa n SIDI, AREBBI nnes, zi jjihet n min war ittxeṣṣi ad yegg, uca netta idweř dayes umarwas, 23 niɣ ittwasscen as-dd uxeṭṭu nnes i igga ḍidd i řumur, ad tiři tewhibt nnes nni i ɣa iqeddem, d ijj n iɣayḍ d ameẓyan, d ijj n wewtem icnan qaɛ. 24 Ad issars afus nnes x uzeǧif n umyan uca ad as iɣarṣ deg wemcan mani ɣarṣen i taɣarṣt n wecmaḍ zzat i wudem n SIDI. Aqa-t d taɣarṣt n ddenb. 25 Xenni ad iksi ukehhan s uḍaḍ nnes cwayt zeg idammen n tɣarṣt n ddenb uca ad ten igg x waccawen n uɛalṭar n wecmaḍ uca xenni ad ifarreɣ idammen iceṭṭen ɣar uḍar n uɛalṭar n wecmaḍ. 26 Ad issbexxar marra tadunt nnes x uɛalṭar, am mammec d as igga i tadunt n tɣarṣt n řehna. Uca ammu i xas i ɣa ifdi ukehhan ddenb nnes uca ad as ittwaɣfar. ^□  

27 Mařa ḥed zi řgens n temmurt ixḍa s uweddar am igga mɣir ict n řḥajjet nni itteffɣen x ijj n řumurat n SIDI, zi jjihet n min war ittxeṣṣi ad yegg, uca idweř dayes umarwas, ^■   28 niɣ iban-dd as axeṭṭu nnes i igga, xenni ad tiři tewhibt nnes nni i ɣa iqeddem d ict n tɣayḍet, ict n tewtemt icnan qaɛ, d taɣarṣt x ddenb i igga. 29 Ad issars afus nnes x uzeǧif n tɣarṣt n ddenb uca ad as iɣarṣ i tɣarṣt n ddenb deg wemcan n tɣarṣt n ddenb. 30 Xenni ad iksi ukehhan s uḍaḍ nnes cwayt zeg idammen uca ad t igg ɣar waccawen n uɛalṭar n tɣarṣt n wecmaḍ uca ad ifarreɣ marra idammen iceṭṭen ɣar uḍar n uɛalṭar. 31 Ad xas ikkes marra tadunt nnes amecnaw mammec kksen tadunt n tɣarṣt n řehna uca akehhan ad tt issbexxar x uɛalṭar, ad tiři d ict n řefwaḥet ittfuḥen i SIDI. Uca ammu i xas i ɣa ifdi ukehhan uca ad as ittwaɣfar. ^■   32 Mařa iqeddem ijj n izmar d tawhibt i tɣarṣt n ddenb, xenni ad iqeddem ict n tawtemt icnan qaɛ. 33 Ad issars afus nnes x uzeǧif n tɣarṣt n ddenb uca ad as iɣarṣ i tɣarṣt n ddenb deg wemcan mani ɣarṣen i tɣarṣt n wecmaḍ. 34 Xenni ad iksi ukehhan s uḍaḍ nnes cwayt zeg idammen n tɣarṣt n ddenb uca ad t igg x waccawen n uɛalṭar n wecmaḍ uca ad ifarreɣ marra idammen nnes iceṭṭen ɣar uḍar n uɛalṭar. 35 Ad xas ikkes marra tadunt nnes, am mammec ikkes tadunt n uḥuři n tɣarṣt n řehna, uca akehhan ad tt issbexxar x uɛalṭar, x tewhibin n tmessi i SIDI uca ammu xas i ɣa ifdi ukehhan x ddenb i igga, uca ad as ittwaɣfar.”