5
1 “Mařa ixḍa ḥed umi isřa ahejji n ict n nneɛřet uca netta d acehhad xas, niɣ iẓra i-t niɣ issen i-t: mařa war xas iqqar walu, xenni ad yarbu řmuɛṣiyyet nnes. □ 2 Niɣ mařa ḥed iḥada min ma zi tmesřact ixemjen, řxecbet n řmař ixmej, niɣ řxecbet n řebḥimet ixemjen, niɣ řxecbet n umuddar ixmej ittbuɛen, uca netta war issin aya , aqa ixmej u dayes amarwas. ■
3 Niɣ mařa iḥada ca n řexmej n bnadem, min ma zi řexmej nnes i zi idweř netta ixmej, mařa tennuffar xas uca xenni issen it, aqa dayes amarwas.
4 Niɣ mařa ḥed iẓẓuǧ s tcarfayeḥ nnes maḥend ad igg řɣar niɣ ad igg řxar, niɣ min ma izemmar bnadem ad inṭeq amenni waha s ict n tjaǧit, uca tnuffar tmesřact xas, maca issen i-t awarni man aya, aqa netta ixmej u dayes amarwas x ssibbet n ca n ijj n zzaysen.
5 Xenni ad imsar, mařa dayes amarwas di ssibbet n icten zi tmesřayin-a, ad inɛem x min tuɣa ixḍa, □ 6 uca x ddenb i igga, ad iqeddem ict n tewtemt n wuǧi d taɣarṣt n umarwas, ict n texsi niɣ ict n tɣayḍet, d taɣarṣt n ddenb i SIDI, uca ammu i xas ɣa ifdi ukehhan ddenb nnes. □
7 Maca mařa afus nnes war ɣares min iqedden i yijj zeg wuǧi, xenni ad yawi i SIDI i tɣarṣt n umarwas x ddenb i igga, tnayen n tejlilliḥin niɣ tnayen n idbiren imeẓyanen, ijjen i tɣarṣt n ddenb u ijjen i tɣarṣt n wecmaḍ. ■
8 Ad ten yawi ɣar ukehhan, wenni dd ɣa issqarrben d amezwaru wenni iǧan i tɣarṣt n ddenb uca ad ikkes azeǧif nnes zi cwayt awarni yiri nnes, maca war t ibeṭṭi marra. ■ 9 Ad irucc cwayt n idammen ɣar uɣezdis n uɛalṭar uca min iceṭṭen zeg idammen, ad t iẓemm ɣar uḍar n uɛalṭar. Aqa-tt d taɣarṣt n ddenb.
10 Ad issewjed wenneɣni am tɣarṣt n wecmaḍ ɛlaḥsab lfariḍa uca akehhan ad xas ifdi x ddenb nnes i igga uca ad as ittwaɣfar.■
11 Mařa afus nnes war ɣares min ikfa i tnayen n tejlilliḥin niɣ i tnayen n idbiren imeẓyanen, xenni wenni ixḍan, ad yawi am tewhibt nnes taɛcart n ijj n ifa n waren azdad d tawhibt n ddenb. War xas ittegg zzect uřa war xas issrusi řebxur, minzi aqa-tt d taɣarṣt n ddenb.
12 Ad tt yawi ɣar ukehhan uca akehhan ad zzayes iksi ijj n wuru iccur uca ad issbexxar aya am řidaret dayes x uɛalṭar, x tewhibin n tmessi i SIDI. Aqa-tt d taɣarṣt n ddenb. ■
13 Ammu i xas i ɣa ifdi ukehhan x ddenb nnes nni igga zi jjihet n icten zi tmesřayin-a uca ad as ittwaɣfar. Min iceṭṭen ad yiři i ikehhanen am mammec t igga ukehhan ak-d tewhibt n řɣiǧet.” ■
Tiɣarṣa n umarwas
14 Issiweř SIDI ak-d Musa, inna:
15 “Mařa ḥed igga s řeɣdar uca ixḍa s uweddar di tmesřayin iqeddsen n SIDI, ittxeṣṣa ad yawi icarri icnan qaɛ zeg wuǧi d taɣarṣt n umarwas i SIDI. Ad tiři řqimet nnes ɛlaḥsab řqimet i tqeddared cek deg iciqlen n nnuqart ɛlaḥsab aciql n Zzawect Iqeddsen. Aqa-t d taɣarṣt n umarwas. ■
16 Zi tmesřayin iqeddsen ad yarr di min di ixḍa qbeř, uca ad dayes yarni řxumus. Uca ad iwc man aya i ukehhan uca akehhan ad xas ifdi s icarri n tɣarṣt n umarwas uca ad as ittwaɣfar.
17 Mařa ixḍa ḥed uca igga min iffɣen zi min ma zi tweṣṣa n SIDI, min war ittxeṣṣa ad yegg, uca tuɣa tnuffar xas, ad dayes yiři umarwas uca ad yarbu řmuɛṣiyyet nnes.
18 Ad yawi icarri icnan qaɛ zeg wuǧi ɣar ukehhan i tɣarṣt n umarwas, ad tiři řqimet nnes ɛlaḥsab řqimet i tqeddared cek uca ad xas ifdi ukehhan i uweddar i di iweddar am war t issin uca ad as ittwaɣfar.
19 Aqa-t d taɣarṣt n umarwas. S tidett tuɣa dayes amarwas zzat i SIDI.”
20 Issiweř SIDI ak-d Musa, inna:
21 “Mařa ixḍa ḥed uca iɣdar SIDI am issxarriq x umqarreb nnes x min d as immewcen maḥend ad t iḥḍa, niɣ x min jjin deg ufus nnes, niɣ x min xas yucaren, niɣ igga ca n ubeɛɛej i umqarreb nnes, 22 niɣ tuɣa issxarriq x ca min iweddaren i ca n yijjen u ittwaf zzayes, uca xenni netta ijjuǧ ẓur x icten zi marra timesřayin nni ittegg bnadem ařami ixeṭṭa s man aya, ■ 23 xenni ad imsar, umi ixḍa uca idweř dayes umarwas, aqa netta ad dd-yarr tuceffart nni yucar, niɣ min ittwakksen s uɣiř nni iksi netta s uɣiř, niɣ min tuɣa iḥḍa nni d as immewcen maḥend ad tt iḥḍa, niɣ min iweddaren nni i ɣa yaf netta, 24 niɣ marra min xef ijjuǧ ẓur ad dd-yarr řqimet nnes tmun uca ad yarni řxumus uca ad t iwc i wenni umi dd-tusa deg wass n tɣarṣt nnes n umarwas.
25 Netta ad yawi taɣarṣt nnes n umarwas ɣar SIDI, ijj n icarri icnan qaɛ zeg wuǧi, wenni řqimet nnes ad tiři ɛlaḥsab řqimet i tqeddared cek uca ad tiři d taɣarṣt n umarwas, uca ad t yawi ɣar ukehhan. 26 Xenni ad xas ifdi ukehhan zzat i wudem n SIDI uca ggur ad as ittwaɣfar x min igga, mařa idweř dayes amarwas s ict n tmesřact zi marra timesřayin-a.”