1 Issiweř SIDI ak-d Musa, inna:

2 “Umur Harun d iḥenjiren nnes, ini asen: Wa d azerf i tɣarṣt n wecmaḍ. Taɣarṣt n wecmaḍ x ukeccuḍ x uɛalṭar ad teqqim tareqq ǧiřet tekmeř ař ṣṣbeḥ u ittxeṣṣa timessi n uɛalṭar ad teqqim ad tecmeḍ dayes.

3 Akehhan ad yarḍ aseřham nnes n řeqṭen, ad ibyes ssarwař nnes n řeqṭen x arrimet nnes, uca ad iksi iɣɣeḍ n tɣarṣt n wecmaḍ, tenni tecca tmessi, uca ad t issars zzat i uɛalṭar. 4 Xenni ad ikkes arruḍ nnes uca ad yarḍ arruḍ nneɣni, ad yawi iɣɣeḍ barra i řmargeḥ n řɛeskar ɣar yijj n wemcan iṣfa.

5 Ittxeṣṣa ad teqqim tmessi tareqq x uɛalṭar, ittxeṣṣa war txessi ca. Akehhan ad xas issarɣ akeccuḍ kuř ṣṣbeḥ uca ad xas isettef taɣarṣt n wecmaḍ uca ad xas issbexxar tadunt n tɣarṣa n řehna. 6 Timessi x uɛalṭar ad teqqim tareqq řebda, war txessi.

7 Wa d azerf i tewhibt n řɣiǧet. Tarwa n Harun ad tt ssqarrben zzat i wudem n SIDI zzat i uɛalṭar. ^■  

8 Netta ad zzayes iksi ijj n wuru zeg waren azdad n tewhibt n řɣiǧet ak-d ca n zzect nnes d marra jjawi i iǧan x tewhibt n řɣiǧet. Ad issbexxar aya x uɛalṭar. Aqa d ict n řefwaḥet ittfuḥen, ict n řidaret dayes i SIDI. ^■   9 Harun d iḥenjiren nnes ad ccen min zzayes iceṭṭen. Ittxeṣṣa ad tt ccen břa antun deg wemcan amqeddas. Ad tt ccen di řemraḥ n Uqiḍun n Umsagar.

10 War tᵉttwasnenni s wentun. Ta d taɣarṣt nsen nni wciɣ Necc zi tewhibin inu n tmessi. Aqa-tt d tamqeddast qaɛ, am tɣarṣt n ddenb d tɣarṣt n umarwas.

11 Marra iryazen jar iḥenjiren n Harun ad zzayes ccen. Aqa-tt d ict n tewṣeyyet i řebda x tewhibin n tmessi n SIDI i marra jjiřat nwem. Marra wi tt ɣa iḥadan, ad ittwaqeddes.” ^■  

12 Issiweř SIDI ak-d Musa, inna:

13 “Ta d tawhibt n Harun d iḥenjiren nnes i zi dd ɣa qarrben ɣar SIDI deg wass min di i ɣa ittwadhen: taɛcart n ijj n ifa n waren azdad am ict n tewhibt n řɣiǧet i řebda, azyen nnes di ṣṣbeḥ d wezyen nnes nneɣni ɣar uɛecci.

14 Deg ijj n uxdim ad txeǧḍed aya s zzect n zzitun u ad tawyed aya d tawhibt. Ad tqeddmed iřeqqwaz icenfen n tewhibt n řɣiǧet am ict n řefwaḥet ittfuḥen i SIDI.

15 Akehhan zeg iḥenjiren nnes nni i ɣa ssdehnen deg wemcan nnes, ad igg amenni. Aqa-tt d tawṣeyyet i řebda. Tawhibt-a ad tᵉttwabexxar i SIDI marra.

16 Marra tawhibt n řɣiǧet n ukehhan ad tiři tekmeř. War zzayes ttᵉtten ca.”

17 Issiweř SIDI ak-d Musa, inna:

18 “Siweř ak-d Harun d iḥenjiren nnes, ini asen: Wa d azerf i tɣarṣt n ddenb: deg wemcan mani tᵉttwaɣarṣ taɣarṣt n wecmaḍ, ad tᵉttwaɣarṣ taɣarṣt n ddenb zzat i wudem n SIDI. Aqa-tt d tamqeddast qaɛ.

19 Akehhan nni tt ɣa iqeddmen d taɣarṣt ad zzayes yecc. Ittxeṣṣa ad tᵉttwacc deg ijj n wemcan amqeddas di řemraḥ n Uqiḍun n Umsagar. ^■   20 Marra wi i ɣa iḥadan aysum nni ad zzayes ittwaqeddes. Mařa ingez cwayt zeg idammen x yijj n warruḍ, xenni ittxeṣṣa ad tessirded min xas ibeqqḍen deg ijj n wemcan amqeddas. 21 Uca řqecɛet n třaxt i di tt ssnennan, ggur ad tᵉttwarẓ, maca mařa teggwa deg ict n řqecɛet n nnḥas, xenni ittxeṣṣa ad ḥekken u ad ssřiřen řqecɛet s waman. 22 Marra min iǧan d awtem jar ikehhanen ad zzayes yecc. Aqa-tt d amqeddas qaɛ. 23 Maca uřa d ict n tɣarṣt n ddenb i zi ttwaqeddmen idammen nnes deg Uqiḍun n Umsagar maḥend ad iřin i weṣřaḥ di Zzawect Iqeddsen, war zzayes ittwacc ca. Ad tᵉttwacmeḍ s tmessi.” ^■