1 “Wa d azerf i tɣarṣt n umwarwas. Aqa-tt d tamqeddast qaɛ.

2 Deg wemcan mani ɣarrṣen taɣarṣt n wecmaḍ, ad ɣarṣen taɣarṣt n umarwas. Ad izeǧeɛ idammen nnes x uɛalṭar ɣar marra iɣezdisen nnes. 3 Ad dd-issqarreb marra tadunt nnes: anewwar n tdunt d tdunt nni idřin adan 4 uca ad ikkes tnayen n tiẓẓař ak-d tdunt i xasent iǧan ɣar tejɛinna uřa d min yuyřen ɣar tsa uca yarsa x tiẓẓař, ^□   5 uca akehhan ad issbexxar aya x uɛalṭar am ict n tewhibt n tmessi i SIDI. Aqa-tt d taɣarṣt n umarwas. 6 Marra awtem jar ikehhanen ad zzayes yecc. Ad ittwacc deg ijj n wemcan amqeddas, aqa-tt d tamqeddast qaɛ. 7 Ad tiři tɣarṣt n ddenb am tɣarṣt n umwarwas. Ad ɣarsent yiři d ijj n uzerf. Ad tiři tɣarṣt i ukehhan, wenni tuɣa zzayes ifdi x ca n yijjen. ^□   8 Akehhan nni i ɣa iqeddmen taɣarṣt n wecmaḍ n ca n ijjen, i ukehhan nni ad tiři teřmect n tɣarṣt n tmessi nni dd-iqeddem, ad tiři i netta. 9 Kuř tawhibt n řɣiǧet nni iggʷin di tefqunt uřa d marra min ittwaswejden di ṭṭajjin niɣ deg wexdim, ad tiři i ukehhan nni tt iqeddmen, ad tiři i netta.

10 Kuř tawhibtn řɣiǧet i ittwaxeǧḍen s zzect n zzitun niɣ yuẓɣen, ad tiři i marra zeg iḥenjiren n Harun, am i yijj am i wenneɣni.

11 Wa d azerf i tɣarṣt n řehna tenni i ɣa iqeddem bnadem i SIDI.

12 Mařa ad tt iqeddem i uqadi, xenni ad iqeddem ak-d tewhibt n uqadi uřa d řemsemnat břa antun ixeǧḍen s zzect d teřfaf břa antun ttwadehnent s zzect d řemsemnat n waren azdad ttwaxeǧḍent s zzect. ^■  

13 Ak-d řemsemnat ad iqeddem ak-d tewhibt nnes ɛawed aɣrum s wentun, ak-d tewhibt n uqadi, tenni iǧan zi tewhibin nnes n řehna.

14 Zi kuř tawhibt ad iqeddem icten zzayes am tewhibt n usgeɛɛed i SIDI. Ad tiři i ukehhan nni i ɣa izeǧɛen idammen n tɣarṣa n řehna x uɛalṭar ɣar marra iɣezdisen nnes, ad tiři i netta.

15 Aysum n tewhibt n uqadi, tenni iǧan zi tewhibin nnes n řehna, ad ittwacc deg wass i di ɣa iqeddem tawhibt nnes. War ittejji zzayes walu ař ṣṣbeḥ.

16 Mařa tawhibt nnes tusa-dd ak-d ijj n lwaɛd niɣ teǧa d ict n tewhibt s řxaḍar, ad tᵉttwacc deg wass i di i tt ɣa iqeddem uca min zzayes iceṭṭen ad ittwacc deg wass i t-i-dd iḍfaren. ^■  

17 Min iceṭṭen ɛad zeg weysum n tewhibt, ad ittwacmeḍ s tmessi deg wass wiss třata.

18 Mařa ittwacc zeg weysum n tɣarṣt n řehna deg wass wiss třata, xenni wenni tt iqeddmen war ittiři i arḍa n SIDI u taɣarṣt war tᵉttwiḥsib ca d taɣarṣt n řehna. Ad tiři d ict n jjɛifect uca wenni zzayes ɣa iccen ad yarbu řmuɛṣiyyet nnes.

19 Aysum, wenni iḥadan ca n tmesřact ixemjen, war zzayes ttᵉttem. Ad ittwasecmeḍ s tmessi. Zi min iceṭṭen n weysum, izemmar ad zzayes yecc marra wenni izedgen. 20 D wenni i ɣa iccen zeg weysum n tɣarṣt n řehna, tenni iǧan i SIDI, am xas yarsa řexmej nnes, řeɛmar nni ad ittwaqess zi řgens nnes. ^■   21 Mařa ḥed iḥada min ma ixemjen, amecnaw řexmej n bnadem niɣ řexmej n yict n řebhimet ixemjen niɣ min ma iǧan d nnɛi n řexmej, uca xenni ad yecc zeg weysum n tɣarṣin n řehna i SIDI, řeɛmar nni ad ittwaqess zi řgens nnes.”

22 Issiweř SIDI ak-d Musa, inna:

23 “Siweř ak-d ayt n Israil, ini:

‘Kenniw war ttᵉttem ca qaɛ tadunt n ufunas niɣ n izmar niɣ n iɣayḍ. 24 Tadunt n ict n řxecbet d tadunt n ijj n umuddar mezzqen t, tɛeddeř ad tᵉttwagg i mammec ma tegga řxedmet, maca kenniw war zzayes tᵉttem walu. 25 Minzi man wen ma i ɣa iccen tadunt n yict n řebhimet i zi ɣa issqarreb ict n tewhibt n tmessi i SIDI, bnadem nni zzayes i ɣa iccen, ad ittwaqess zi řgens nnes. ^□   26 Di marra tizeddiɣin nwem war ttᵉttem uřa d ca zeg idammen, niɣ zeg ijḍaḍ niɣ zi řebhayem. ^■   27 Kuř ijjen wenni i ɣa iccen ca zeg idammen, řeɛmar nni ad ittwaqess zi řgens nnes.’ ”

28 Issiweř SIDI ak-d Musa, inna:

29 “Siweř ak-d ayt n Israil, ini: ‘Wi i dd ɣa issqarrben tɣarṣt nnes n řehna i SIDI, ad iqeddem tawhibt nnes i SIDI zi tɣarṣt n řehna nnes. 30 S ifassen nnes ad yawi tiwhibin n tmessi zzat i SIDI. Tadunt i iǧan x idmaren ad tt yawi ak-d idmaren nni, maḥend ad tt issenhezz zi ssa ɣar da amecnaw ict n tewhibt n wenhezzi zzat i wudem n SIDI. ^■   31 Akehhan ad issbexxar tadunt x uɛalṭar, maca idmaren ad iřin i Harun d zeg iḥenjiren nnes. 32 Zi tɣarṣa nwem n řehna ad tqeddmem i ukehhan ɛawed acekrud afusi d tawhibt n usgeɛɛed. 33 Acekrud afusi ad yiři d tasɣart n wenni zeg iḥenjiren n Harun i ɣa iqeddmen idammen n tɣarṣi n řehna d tadunt nsent. 34 Minzi Necc ksiɣ idmaren n wenhezzi d ucekrud i dd-ittwassgeɛɛden d tawhibt zi tɣarṣi n řehna n ayt n Israil u wciɣ ten i ukehhan Harun u i iḥenjiren nnes am ict n lfariḍa i řebda, zi jjihet n ayt n Israil.’ ” ^■   35 Ta d tasɣart ittwasdehnen n Harun d tesɣart ittwasdehnen n iḥenjiren nnes zi tewhibin n tmessi n SIDI deg wass i ten dd-issqarreb maḥend ad iřin d ikehhanen i SIDI, 36 tasɣart nni iwca SIDI i ayt n Israil deg wass i ten idhen. Aqa d ict n tewṣeyyet i řebda i marra jjiřat nsen. 37 Wa d azerf i tɣarṣt n wecmaḍ d tewhibt n řɣiǧet d tɣarṣt n ddenb d tɣarṣt n umarwas d tɣarṣa i udeccen d tɣarṣin n řehna. 38 wenni iweṣṣa SIDI i Musa deg wedrar n Sina, ass min di yumur ayt n Israil ad qeddmen tiwhibin nsen i SIDI di řexřa n Sina.