1 Issiweř SIDI ak-d Musa, inna:

2 “Ksi Harun jmiɛ ak-d iḥenjiren nnes d warruḍ d zzect i wedhan d uyenduz n tɣarṣt n ddenb d tnayen n icarriyyen d tsuǧet s weɣrum břa antun, ^■   3 u řaɣa i marra tamesmunt ɣar wadaf n Uqiḍun n Umsagar.”

4 Igga Musa am mammec d as yumur SIDI uca tessmun tmesmunt ɣar wadaf n Uqiḍun n Umsagar. 5 Inna Musa i tmesmunt: “Wa d min iweṣṣa SIDI ad ittwagg.” ^■  

6 Musa issqarreb-dd Harun d iḥenjiren nnes uca issird i-ten s waman. 7 Issars xas arruḍ n teřmect, ibyes as s tḥezzamt, issyarḍ as aseřham. Igga xas apalṭu uca ibyes as s tḥezzamt izewwqen n upalṭu uca iqqen as zzayes apaltu. ^■   8 Xenni imten xas tajmect uca igga iẓra n ‘Urim’ d ‘Tumim’ di tajmect. ^■   9 Igga areẓẓet x uzeǧif nnes uca x areẓẓet, ɣar zzat, igga tařwiḥt s nnuwwar n wureɣ n temrist tamqeddast, am mammec t iweṣṣa SIDI i Musa. ^■  

10 Xenni iksi Musa zzect i wedhan uca idhen Tazeddiɣt d marra min dayes iǧan uca issqeddes marra aya.

11 Irucc zzayes x uɛalṭar sebɛa n twařawin uca idhen ɛawed aɛalṭar d marra řeqcuɛ nnes uřa d tabanyut ak-d uḍar nnes maḥend ad ten issqeddes.

12 Iseyyeb zzect i wedhan x uzeǧif n Harun uca idhen i-t ḥima ad t issqeddes. ^■  

13 Issqarreb-dd Musa ayt n Harun uca yarḍ asen arruḍ n teřmect uca ibyes asen s tḥezzamin uca inneḍ asen ticuccay am mammec t iweṣṣa SIDI i Musa. ^■  

14 Issqarreb-dd ayenduz n tɣarṣt n ddenb uca Harun d iḥenjiren nnes ssarsen ifassen nsen x uzeǧif n uyenduz n tɣarṣt n ddenb. ^■  

15 Iɣarṣ as uca iksi Musa idammen uca igga cwayt zzaysen s uḍaḍ nnes x waccawen n uɛalṭar i iǧan ɣar marra iɣezdisen nnes uca ammu i issizdeg aɛalṭar. Xenni iseyyeb idammen ɣar uḍar n uɛalṭar uca issqeddes i-t maḥend ad xas igg aṣřaḥ. ^□  

16 Iksi marra tadunt nni iǧan x wadan d min yuyřen ɣar tsa d tnayen n tiẓẓař d tdunt nsent uca Musa issbexxar aya x uɛalṭar. ^□  

17 Maca ayenduz d yiřem nnes d weysum nnes d amessař nnes, issarɣ i-ten barra i řmargeḥ n řɛeskar, am mammec t iweṣṣa SIDI i Musa. ^■  

18 Issqarreb-dd Musa icarri n tɣarṣt n wecmaḍ uca Harun d iḥenjiren nnes ssarsen ifassen nsen x uzeǧif n icarri.

19 Iɣarṣ as uca izeǧeɛ Musa idammen x uɛalṭar ɣar marra iɣezdisen nnes. 20 Ibḍa icarri d iceǧiqen nnes uca issbexxar Musa azeǧif d iceǧiqen d tdunt. 21 Issird adan d iḍaren s waman uca issbexxar Musa marra icarri x uɛalṭar, aqa-tt d taɣarṣt n wecmaḍ s yict n řefwaḥet ittfuḥen, aqa-tt d tawhibt n tmessi i SIDI, am mammec t iweṣṣa SIDI i Musa. ^■  

22 Issqarreb-dd xenni icarri nneɣni, icarri i udeccen, uca Harun d iḥenjiren nnes ssarsen ifassen nsen x uzeǧif n icarri. 23 Uca iɣarṣ as uca iksi Musa cwayt zeg idammen uca igga i-ten x iɣes n umezzuɣ afusi n Harun u x uḍaḍ n yimez n ufus nnes afusi u x uḍaḍ n yimez n uḍar nnes afusi. 24 Issqarreb-dd ɛawed iḥenjiren n Harun uca igga Musa cwayt zeg idammen x iɣes n umezzuɣ nsen afusi u x uḍaḍ n yimez n ufus nsen afusi u x uḍaḍ n yimez n uḍar nsen afusi uca izeǧeɛ Musa idammen iqqimen x uɛalṭar ɣar marra iɣezdisen nnes. 25 Iksi tadunt d unewwar s tadunt d marra tadunt tenni iǧan x wadan d min yuyřen ɣar tsa d tnayen n tiẓẓař ak-d tdunt nsent uřa d acekrud afusi. ^■   26 Zi tsuǧet s weɣrum břa antun, tenni tuɣa zzat i wudem n SIDI, iksi ijj n řemsemmem břa antun d yict n temsemmemt isswejden s zzect d ict n teřfeft uca issars i-ten x tadunt u x ucekrud afusi. 27 Igga marra man aya deg ifassen n Harun u deg ifassen n iḥenjiren nnes uca issenhezz aya am yict n tewhibt n wenhezzi zzat i wudem n SIDI. ^■   28 Awarni as iksi ten Musa ɛawed zeg ifassen nsen uca issbexxar i-ten x uɛalṭar, x tɣarṣt n wecmaḍ. Aqa d tiɣarṣa i udeccen s yict n řefwaḥet ittfuḥen, aqa d tawhibt n tmessi i SIDI. 29 Iksi Musa idmaren uca issenhezz i-tt amecnaw ict n tewhibt n wenhezzi zzat i wudem n SIDI. Man aya d tasɣart n ucarri i udeccen nni iǧan i Musa, am mammec t iweṣṣa SIDI i Musa. ^■  

30 Iksi Musa cwayt n zzect i wedhan u n idammen i iǧan x uɛalṭar uca irucc i-ten x Harun u x warruḍ nnes, x iḥenjiren nnes u x warruḍ n iḥenjiren nnes, inni akides iǧan. Ammu i issqeddes Harun d warruḍ nnes d iḥenjiren nnes d warruḍ n iḥenjiren nnes, inni akides iǧan. ^■  

31 Inna Musa i Harun u i iḥenjiren nnes: “Ggʷem aysum nni ɣar wadaf n Uqiḍun n Umsagar uca teccem t dinni s weɣrum nni iǧan di tsuǧet n tɣarṣa i udeccen, am mammec weṣṣiɣ necc, nniɣ: ‘Harun d iḥenjiren nnes ad t ccen.’ ^■   32 Min iceṭṭen n weysum d weɣrum, ad t tesscemḍen s tmessi. 33 Zeg wadaf n Uqiḍun n Umsagar war zzayes-dd tᵉtteffɣem ca sebɛa n wussan, ař ass min di i ɣa kemmřen wussan n uřeqqem nwen, minzi Netta ad kenniw yařeqqem sebɛa n wussan. 34 Am mammec igga deg wass-a, ammu iweṣṣa SIDI maḥend ad xawem ittwafdi. 35 Ad teqqimem ɣar wadaf n Uqiḍun n Umsagar, ass d ǧiřet, sebɛa n wussan uca ad tᵉṭṭfem ḥeṭṭu i SIDI, ḥima war tmettim ca, minzi ammu i t ttweṣṣiɣ necc.” 36 Harun d iḥenjiren nnes ggin marra min d asen iweṣṣa SIDI s ufus n Musa.