1 Deg wass wiss tmenya imsar aqa Musa iřaɣa i Harun d iḥenjiren nnes d imɣaren n Israil 2 uca inna i Harun: “Ksi ɣarek ijj n uyenduz, ameẓyan n ufunas, am tɣarṣt n ddenb, uřa d ijj n icarri am tɣarṣt n wecmaḍ, aqa ad iřin cnan qaɛ, uca ejj i-ten ad dd-qarrben ɣar wudem n SIDI. ^□  ■   3 Siweř ak-d ayt n Israil uca ini: “Ksim ijj n iɣayḍ am tɣarṣt n ddenb u ksi ijj n uyenduz d ijj n yezmar, aqa ad iřin cnan qaɛ n ijj n useggʷas, i tɣarṣt n wecmaḍ, 4 uca ksi ɛawed ijj n ufunas d ijj n ucarri am tɣarṣa n řehna, maḥend ad ten qeddmen i SIDI, uřa d ict n tewhibt n řɣiǧet ixeǧḍen s zzect, minzi ass-a ad awem-dd iban SIDI.”

5 Xenni awyen min xef iweṣṣa Musa ɣar zzat n Uqiḍun n Umsagar uca tamesmunt tqarreb-dd uca bedden nitni zzat i wudem n SIDI.

6 Uca Musa inna: “D man aya min xef iweṣṣa SIDI maḥend ad t teggem uca xenni ad awem dd-iban uɛuǧi n SIDI.”

7 Inna Musa i Harun: “Qarreb-dd ɣar uɛalṭar uca sewjed taɣarṣt nnek n ddenb d tɣarṣt nnek n wecmaḍ uca egg aṣřaḥ x yixef nnek u x řgens. Awarni as sewjed tawhibt n řgens uca seṣřeḥ i-ten am mammec t iweṣṣa SIDI.” ^■   8 Xenni iqarreb-dd Harun ɣar uɛalṭar uca iɣarṣ i uyenduz n tɣarṣt n ddenb i iǧan i yixef nnes. 9 Tarwa n Harun iwyen as-dd idammen uca netta issuf aḍaḍ nnes deg idammen uca igga i-ten x waccawen n uɛalṭar. Min iceṭṭen n idammen iseyyeb i-ten ɣar uḍar n uɛalṭar.

10 Issbexxar tadunt d tiẓẓař d min yuyřen ɣar tsa n tɣarṣt n ddenb x uɛalṭar am mammec t yumur SIDI i Musa. ^□  

11 Issecmeḍ aysum d yiřem s tmessi barra i řmargeḥ n řɛeskar.

12 Iɣarṣ taɣarṣt n wecmaḍ uca iḥenjiren n Harun qeddmen as idammen uca netta izeǧeɛ ten x uɛalṭar ɣar marra iɣezdisen nnes.

13 Xenni qeddmen as taɣarṣt n wecmaḍ i ttwabḍan d iceǧiqen, uřa d azeǧif, uca netta issbexxar i-tt x uɛalṭar.

14 Issird adan d iḍaren uca issbexxar i-ten x tɣarṣt n wecmaḍ i iǧan x uɛalṭar.

15 Awarni as issqarreb-dd tawhibt n řgens. Netta iksi amyan n tɣarṣt n ddenb i řgens uca iɣarṣ as uca issewjed i-t d taɣarṣt n ddenb amecnaw icarri amezwaru. ^■  

16 Issqarreb-dd taɣarṣt n wecmaḍ uca issewjed i-tt ɛlaḥsab lfariḍa.

17 Issqarreb-dd tawhibt n řɣiǧet uca iksi zzayes ijj n wuru iccur uca issbexxar aya x uɛalṭar, zzat i tɣarṣt n wecmaḍ n ṣṣbeḥ. ^■  

18 Iɣarṣ ɛawed i ufunas u i yicarri n taɣarṣt n řehna di ṭṭweɛ n řgens, uca iḥenjiren n Harun qeddmen as idammen uca izeǧeɛ i-ten x uɛalṭar ɣar marra iɣezdisen nnes.

19 X tadunt n ufunas u n icarri: anewwar s tadunt nnes d min idřin aḍan d tiẓẓař d min yuyřen ɣar tsa, 20 aqa ssarsen tadunt nni x idmaren uca netta issbexxar tadunt x uɛalṭar 21 uca issenhezz Harun idmaren d ucekrud afusi amecnaw ict n tewhibt n wenhezzi zzat i wudem n SIDI, am mammec t iweṣṣa Musa. ^■  

22 Xenni issgeɛɛed Harun ifassen nnes ɣar řgens uca ibarek i-ten uca ihwa awarni řami iqeddem taɣarṣt n ddenb d tɣarṣt n wecmaḍ d tɣarṣt n řehna. 23 Uca yudef Musa ak-d Harun ɣar Uqiḍun n Umsagar uca nitni ffɣen zzayes ɛawed uca barken řgens uca iban-dd uɛuǧi n SIDI i marra řgens 24 uca teffeɣ-dd tmessi zi zzat i wudem n SIDI, tecca taɣarṣt n wecmaḍ x uɛalṭar uřa d tadunt. Umi iẓra řgens man aya, sřiweřwen uca wḍan ɣar temmurt x uɣembub nsen. ^■