1 Nadab d Abihu, iḥenjiren n Harun, ksin kuř ijj řmejmar nnes uca ggin dayes řebxur uca iwyen timessi war neẓri ɛemmars zzat i wudem n SIDI, min war d asen iweṣṣa Netta. 2 Teffeɣ-dd tmessi zi zzat i wudem n SIDI, tecc i-ten uca mmuten zzat i wudem n SIDI. ^■   3 Inna Musa i Harun: “D man aya x min xef issiweř SIDI umi inna: ‘S yenni i ɣari dd ɣa iqarrben ad ttwaqeddseɣ uca zzat i wudem n marra řgens ad ttwasɛuǧeɣ.’ ” Uca isqar Harun. ^■   4 Iřaɣa Musa i Micayil d i Ilṣafan, iḥenjiren n Ɛuzziyil, ɛemmis n Harun, uca inna asen: “Qarrbem-dd, tarbum aytmatwem n zzat n Zzawect Iqeddsen, awyi ten barra i řmargeḥ n řɛeskar.” 5 Qarrben-dd nitni uca arbun ten deg warruḍ n teřmect nsen barra i řmargeḥ n řɛeskar, am mammec t inna Musa. 6 Xenni inna Musa i Harun u i Aliɛazar d Itamar, iḥenjiren nnes: “War ḍeǧqem i ucewwaf x izeǧifen nwem niɣ ttcarrgem arruḍ nwem, ḥima war tmettim uca ad yiři uduqqez n weɣḍab x marra tamesmunt. Maca aytmatwem, marra taddart n Israil, ad run x tmessi aya tenni issecmeḍ SIDI. 7 War dd-tteffɣem ca zi wadaf n Uqiḍun n Umsagar, ḥima war tᵉttmettim ca, minzi zzect n wedhan n SIDI aqa tt xawem.” Uca nitni ṭṭaɛen i wawař n Musa. ^■  

8 Issiweř SIDI ak-d Harun, inna:

9 “War iɛeddeř ad tsessed binu niɣ ccrab ijehden xmi i ɣa tadfem ɣar Uqiḍun n Umsagar, cek lla uřa d iḥenjiren nnek nni akidek lla, ḥima war tᵉttmettim ca. Aqa-tt d ict n tewṣeyyet i řebda i marra jjiřat nwem

10 ḥima ad af tzemmarem ad tfarzem jar min iǧan iqeddsen d min war iǧin iqeddsen u jar min iṣfan d min war iṣfin.

11 u ḥima ad tessřemdem i ayt n Israil marra tiweṣṣa nni i ɣarsen issiweř SIDI s ufus n Musa.”

12 Uca issiweř Musa ak-d Harun u ak-d Aliɛazar d Itamar, iḥenjiren nnes iqqimen: “Ksim tawhibt n řɣiǧet nni iceṭṭen zi tewhibin n tmessi i SIDI uca ccem tt břa antun zzat i uɛalṭar, minzi aqa-tt d tamqeddast qaɛ.

13 Ad tt teccem deg ijj n wemcam iqeddsen, minzi ta d taɣarṣt i cek u i iḥenjiren nnek zi tewhibin n tmessi n SIDI, minzi ammu i d ayi ittwaweṣṣa. ^■  

14 Deg ijj n wemcan iṣfa ad teccem ɛawed idmaren n wenhezzi d ucekrud i dd-ittwassgeɛɛden d tawhibt, cek d iḥenjiren nnek d tḥenjirin nnek akidek, minzi d man aya d tasɣart nnek d tasɣart n tarwa nnek zi tɣarṣa n řehna n ayt n Israil.

15 Ad awyen acekrud i dd-ittwassgeɛɛden d tawhibt uřa d idmaren n wenhezzi ak-d tewhibin n tmessi n tadunt maḥend ad ten ssenhezzen zzat i wudem n SIDI am tewhibt n wenhezzi. Aqa-t d ict n tewṣeyyet i řebda i cek u i iḥenjiren nnek akidek, am mammec t yumur SIDI.”

16 Uca Musa yarzu s cḍaret x iɣayḍ n tɣarṣt n ddenb, maca xzar, icemḍ. Xenni iffugem x Aliɛazar d Itamar, iḥenjiren iqqimen n Harun, inna:

17 “Mayemmi war teccim taɣarṣt n ddenb deg wemcan iqeddsen? Minzi aqa-tt d tamqeddast qaɛ uca netta iwca awem tt-i-dd ḥima kenniw ad tarbum řmuɛṣiyyet n tmesmunt maḥend ad xasen tefdim zzat i wudem n SIDI.

18 Xzarem, ḥdam war ssidfen walu zeg idammen daxeř i Zzawect Iqeddsen. Tuɣa ittxeṣṣa kenniw ad tt teccem di Zzawect Iqeddsen am mammec d awem umureɣ necc.” ^■  

19 Xenni issiweř Harun ak-d Musa: “Xzar, ass-a aqa ssqarrben-dd taɣarṣt n ddenb d tɣarṣt n wecmaḍ zzat i wudem n SIDI. Mařa necc, awarni řami xafi kkent tmesřayin-a, aqa cciɣ zi tɣarṣt n ddenb ass-a, ma xenni man aya icna di tiṭṭawin n SIDI?” 20 Umi isřa Musa aya, iban as-dd man aya d lemliḥ di tiṭṭawin nnes.