1 Imsar umi ɛdun aṭṭas n wussan awarni umi SIDI tuɣa igga i Israil řhudnet zi marra řɛedyan nnes i d as dd-innḍen u umi tuɣa Yacuwa iwsar, imɣar deg wussan, 2 aqa iřaɣa Yacuwa i marra Israil, imɣaren nnes d izeǧifen nnes d řquḍat nnes d iweqqafen nnes, inna asen: “Necc wsareɣ u mɣareɣ deg wussan 3 uca kenniw teẓrim marra min igga SIDI, AREBBI nwem, ak-d marra řegnus-a zzat i tiṭṭawin nwem, maɣar SIDI, AREBBI nwem simant nnes, d wenni i tuɣa immenɣen di ṭṭweɛ nwem. 4 Xzar necc bḍiɣ awem řegnus-a i iqqimen jar awem s tqedduḥt, am tesɣart n řwart i tqebbař nwem, ak-d marra řegnus i teḥḥiɣ zi L'Urdun ař řebḥar ameqqran mani tɣeǧi tfuct. 5 SIDI, AREBBI nwem, ad xasen ibarrez zzat i wudem nwem u ad xasen yaẓẓeř zzat i wudem nwem u kenniw ad tᵉṭṭfem tammurt nsen d řwart, am mammec i d awem issiweř SIDI, AREBBI nwem. ^■   6 Ḥḍam aṭṭas s jjehd u ggem marra min yurin deg wedlis-a ittwannḍen n Ccariɛa n Musa, ḥima war xas tḥeyyidem uřa ɣar yeffus uřa ɣar uzeřmaḍ, ^■   7 ḥima kenniw war ttṣuram ixef nwem ak-d řegnus-a inni akidwem ɛad iqqimen, u war ttfekkarem ɛad deg yisem n irebbiten nsen u war xasen ttjaǧam u ḥima kenniw war d asen ttsexxarem u war d asen ttaḍarem. ^■   8 Maɣar ittxeṣṣa ad třeṣqem i SIDI, AREBBI nwem, am mammec i t teggim ař ass-a. ^■   9 SIDI yuẓẓeř x řegnus mɣaren u jjehden zzat i wudem nwem. U xawem kenniw, ař ass-a war din ḥed izemmaren ad ibedd zzat i wudem nwem.

10 Ijj n weryaz zzaywem izemmar ad yaẓẓeř x wařef n yeryazen, minzi SIDI, AREBBI nwem simant nnes, d wenni i xawem ittmenɣan, am mammec tuɣa akidwem issiweř. ^■  

11 Ḥḍam xenni ař ṭṭarf x řeɛmur nwem ḥima ad texsem SIDI, AREBBI nwem.

12 Minzi mařa kenniw tḥeyydem xas uřa d ict n jjurret waha uca ad třeṣqem i řegnus i kiwem iqqimen u mařa kenniw tdewřem d iḍeggʷařen u ad ɣarsen tadfem u nitni am nneɣni,

13 xenni ad tessnem nican, aqa SIDI, AREBBI nwem, war ittiẓẓeř ɛad x řegnus-a zzat i wudem nwem. Nitni ad dewřen d řfex d tracca i kenniw, d urekkuḍ deg iɣezdisen nwem d isennanen i tiṭṭawin nwem, ař ɣa tᵉttwateḥḥam zi temmurt taṣebḥant i d awem iwca SIDI, AREBBI nwem.

14 Xzar, ass-a necc simant inu ad uyureɣ abrid n marra tammurt u kenniw ad tessnem s marra uř nwem u s marra řeɛmar nwem, aqa uřa d ijj n wawař zi marra awařen i xawem inna SIDI, AREBBI nwem, war dd-iffiɣ. Marra ffɣen-dd xawem, uřa d ijj n wawař war iqqim war dd-iffiɣ.

15 Uca ad imsar, am mammec xawem dd-yusa marra awař icnan i kidwem issiweř SIDI, AREBBI nwem, ammu i xawem i ɣa isseqfeř SIDI uřa d kuř awař iɛeffnen ɣares ař Netta kenniw iteḥḥa zi temmurt-a taṣebḥant i d awem iwca SIDI, AREBBI nwem.

16 Mařa kenniw tɛeddam x Řɛahd n SIDI, AREBBI nwem, Řɛahd nni x d awem yumur Netta uca kenniw ad tuyurem ad tsexxarem irebbiten nneɣni uca ad asen taḍarem, xenni ad xawem yareɣ weɣḍab n SIDI uca kenniw ad tᵉttwateḥḥam deɣya zi temmurt taṣebḥant i d awem iwca Netta.