1 Xenni iřaɣa-dd Yacuwa i Irubiniyyen d Ijadiyyen d wezyen n teqbič n Manassa, 2 inna asen: “Kenniw teḥḍam marra min xef i d awem yumur Musa, amsexxar n SIDI, u kenniw tesřam ɛawed i tmijja inu di marra min xef d awem umureɣ. ^■   3 Kenniw war tesmiḥem ca deg aytmatwem deg waṭṭas n wussan ař ass-a u teḥḍam aḥeṭṭu n řumur n SIDI, AREBBI nwem. 4 Uca řexxu igga SIDI, AREBBI nwem, i aytmatwem arraḥet, am mammec tuɣa i d asen tt iwaɛd. Ɛeqbem xenni řexxu ɣar iqiḍan nwem di temmurt n řwart nwem nni d awem iwca Musa, amsexxar n SIDI, x ujemmaḍ n L'Urdun. ^■   5 Maca ḥḍam mliḥ ad teggem řumur d Ccariɛa i d awem iwca Musa, amsexxar n SIDI, ḥima ad texsem SIDI, AREBBI nwem, ad tuyurem di marra ibriden nnes, ad teḥḍam marra řumurat nnes uca ad ɣares třeṣqem u ad as tsexxarem s marra wuř d marra řeɛmar nwem.” ^■  

6 Ibarek i-ten Yacuwa, ijja i-ten ad uyuren uca nitni areggʷḥen ɣar iqiḍan nsen. 7 I wezyen n teqbič n Manassa tuɣa iwca Musa ict n tesɣart di Bacan, maca i yijj n wezyen nneɣni iwca as Yacuwa ict n tesɣart ɣar aytmatsen x uɣezdis-a n L'Urdun zi manis tɣeǧi tfuct. Umi i-ten issekk Yacuwa ɣar iqiḍan nsen, ibarek i-ten 8 uca issiweř akidsen, inna: “S wagřa d ameqqran ad tɛeqbem ɣar iqiḍan nwem, s waṭṭas n řebhayem u s nnuqart d wureɣ u s nnḥas d wuzzař u s waṭṭas n warruḍ. Bḍam takeccaḍt n řɛedyan nwem ak-d aytmatwem.” 9 Ɛeqben ayt n Rubin d ayt n Jad d wezyen n teqbič n Manassa, ffɣen zi ɣar ayt n Israil, ggʷejjen x Cilu nni iǧan di temmurt n Kenɛan, ḥima ad raḥen ɣar temmurt n Jilɛad, ɣar temmurt n řmuřk nsen nni iṭṭfen d agřa ɛlaḥsab řumur n SIDI s ufus n Musa.

10 Umi iwḍen nitni ɣar udewwar nni iǧan ɣar L'Urdun di temmurt n Kenɛan, bnan ayt n Rubin d ayt n Jad d wezyen n teqbič n Manassa dinni ijj n uɛalṭar ɣar L'Urdun, ijj n uɛalṭar imɣar aṭṭas. ^■  

11 Uca sřin ayt n Israil aqa qqaren: “Xzarem, ayt n Rubin d ayt n Jad d wezyen n teqbič n Manassa bnan ijj n uɛalṭar ajemmaḍ i temmurt n Kenɛan deg udewwar n L'Urdun, x uɣezdis n L'Urdun n ayt n Israil.”

12 Umi sřin ayt n Israil aya, tmun marra tmesmunt n ayt n Israil di Cilu ḥima ad ffɣen i umenɣi akidsen s ijj n řɛeskar.

13 Uca ssekken ayt n Israil Finaḥas, mmis n ukehhan Aliɛazar, ɣar ayt n Rubin u ɣar ayt n Jad u ɣar wezyen n teqbič n Manassa di Jilɛad,

14 u ssekken akides ɛecra n imeqqranen, ijj n umeqqran zi kuř taddart n ijj n tbabat, zi marra tiqebbař n Israil. Kuř ijj zzaysen tuɣa d azeǧif n taddart n ibabaten nsen i řuřuf n Israil.

15 Usin-dd nitni ɣar ayt n Rubin u ɣar ayt n Jad u ɣar wezyen n teqbič n Manassa di temmurt n Jilɛad, nnan asen:

16 “Ammu i tessiweř marra tmesmunt n SIDI: ‘Min ixs ad yini řeɣdar-a i zi teɣdarem AREBBI n Israil umi tḥeyydem ass-a zi ḍeffar n SIDI, umi tebnam i yixef nwem ijj n uɛalṭar maḥend ad tɣewwɣem x SIDI ass-a?

17 Ma war iǧi cfa aneɣ řmuɛṣiyyet n Faɣur, řmuɛṣiyyet i zi ɣar ass-a ɛad war nettwasizdeg u zzayes i tewḍa jjriḥect x tmesmunt n SIDI?^■  

18 Ma aqa kenniw ass-a tewcim s weɛrur i SIDI uca ad imsar xenni, umi ɣa tɣewwɣem ass-a x SIDI, ad iffugem x marra tmesmunt n Israil?

19 Mařa zeɛma texmej temmurt i iǧan d agřa nwem, xenni ɛdum ɣar temmurt nni iǧan d agřa n SIDI u mani teǧa Tzeddiɣt n SIDI uca ksim i yixef nwem ijj n wegra di řwest nneɣ, maca war tɣewwɣem ca x SIDI u war tɣewwɣem ca xaneɣ umi ɣa tebnam ijj n uɛalṭar i yixef nwen, mɣir aɛalṭar n SIDI, AREBBI nneɣ. 20 Ma tuɣa Ɛaxan, mmis n Zaraḥ, war iɣdar di tmesřact n min ittwaḥarrmen u xenni ma war dd-ittis uduqqez n weɣḍab x marra tamesmunt n Israil? Uca aryaz nni war immut weḥḥḍes waha di řmuɛṣiyyet nnes.’ ”

21 Xenni arrin-dd ayt n Rubin d ayt n Jad d wezyen n teqbič n Manassa uca ssiwřen ak-d izeǧifen x řuřuf n Israil: 22 “AREBBI x marra irebbiten, SIDI, AREBBI x marra irebbiten issen i-t u Israil ad t issen ɛawed! Mařa iffeɣ-dd aya zeg uɣewweɣ niɣ zi řeɣdar x SIDI, xenni war xaneɣ tceṭṭar ca ass-a, ^■   23 mařa tuɣa ḥima ad nebna i neccin ijj n uɛalṭar maḥend ad newc s weɛrur i SIDI niɣ mařa tuɣa ḥima ad nqeddem ict n tɣarṣt n wecmaḍ niɣ ict n tewhibt n řɣiǧet niɣ i usewjed n ict n tɣarṣt n řehna, ejj SIDI simant nnes ad t ibeqqec. 24 Uct xaneɣ, mařa war neggi aya zeg wemnus umi neqqar: ‘Iḥenjiren nwem zemmaren tiwecca ad inin i iḥenjiren nneɣ: Min jar awem-dd ak-d SIDI, AREBBI n Israil? 25 SIDI igga L'Urdun d aymir jar aneɣ d kenniw, ayt n Rubin d ayt n Jad! Kenniw war ɣarwem ca tasɣart di SIDI.’ Ammu zemmaren ad ssbedden iḥenjiren nwem iḥenjiren nneɣ x tiggʷudi n SIDI. 26 X uyenni nenna: ‘Ejj aneɣ ad nebna aɛalṭar-a, war iǧi i tɣarṣt n wecmaḍ uřa i tɣarṣt, 27 maca ḥima ad yiři d acehhad jar neccin d kenniw u jar jjiřat nneɣ awarni aneɣ, ḥima ad nsexxar di tsexxart n SIDI zzat i wudem nnes s tɣarṣi nneɣ n wecmaḍ d tɣarṣi nneɣ nneɣni d tɣarṣi nneɣ n řehna u ḥima iḥenjiren nwem war qqaren i iḥenjiren nneɣ: Kenniw war ɣarwem ca tasɣart di SIDI.’ ^■   28 Neccin nenna: ‘Mařa imsar tiwecca ad inin nitni aya i neccin u i jjiřat awarni aneɣ, xenni ad nini: Xzarem, amedya n řebni n uɛalṭar-a n SIDI nni iggin ibabaten nneɣ, war iǧi i tɣarṣt n wecmaḍ niɣ i tɣarṣt nneɣni, maca ḥima ad yiři d acehhad jar neccin d kenniw.’ 29 Iggʷej xaneɣ aqa neccin ad nɣewweɣ x SIDI niɣ ass-a ad newc s weɛrur i SIDI umi ɣa nebna ijj n uɛalṭar i tɣarṣt n wecmaḍ niɣ i tewhibt n řɣiǧet niɣ i tɣarṣt nneɣni, illa aɛalṭar n SIDI, AREBBI nneɣ, wenni iǧan zzat i Tzeddiɣt nnes.”

30 Akehhan Finaḥas d imeqqranen n tmesmunt d izeǧifen x řuřuf n Israil nni kides iǧan, sřin awařen i issiwřen ayt n Rubin d ayt n Jad d ayt n Manassa u tuɣa aya d lemliḥ di tiṭṭawin nsen. 31 Finaḥas, mmis n Aliɛazar, inna i ayt n Rubin u i ayt n Jad u i ayt n Manassa: “Ass-a ad tessnem belli SIDI aqa-t di řwest nneɣ umi kenniw war teɣdarem ca SIDI. S uya kenniw tfekkem ayt n Israil zeg ufus n SIDI.”

32 Xenni yareggʷeḥ ukehhan Finaḥas, mmis n Aliɛazar, ak-d imeqqranen zeg ayt n Rubin d ayt n Jad, zi temmurt n Jilɛad ɣar temmurt n Kenɛan, ɣar ayt n Israil uca nitni ggin daysen řexbar. 33 Tuɣa tamesřact d lemliḥ di tiṭṭawin n ayt n Israil uca ḥemden ayt n Israil AREBBI u war d asen nnan ɛad ad ffɣen ad mmenɣen maḥend ad areddǧen tammurt i di tuɣa zeddɣen ayt n Rubin d ayt n Jad. 34 Ayt n Rubin d ayt n Jad řaɣan as i uɛalṭar nni: “Ad yiři d acehhad jar aneɣ aqa SIDI d AREBBI.”