Lmalak n SIDI di Bukim
2
1 Lmalak n SIDI igeɛɛed zi Jiljal ɣar Bukim, inna: “Necc ssuffɣeɣ-dd kenniw zi Miṣra uca iwyeɣ-dd kenniw ɣar temmurt nni x jjuǧeɣ i ibabaten nwem, nniɣ: ‘Necc ɛemmarṣ war ttareẓẓiɣ Řɛahd inu akidwem i řebda. ■ 2 Uca kenniw, wah kenniw, war tzemmarem ad teggem řɛahd ak-d imezdaɣ n temmurt-a, u ittxeṣṣa awem ad tɣeḍřem iɛalṭaren nsen!’ Maca kenniw war tesřim ca i tmijja inu. Mayemmi teggim aya? ■ 3 U Necc nniɣ awem ɛawed: ‘Aqa war xasen taẓẓřeɣ zzat i wudem nwem, maca nitni ad iřin am isennanen deg iɣezdisen nwem uca irebbiten nsen ad awem dewřen d taxceft.’ ” ■ 4 Umi Lmalak n SIDI tuɣa issiweř awařen-a ɣar marra ayt n Israil, imsar, aqa řgens issgeɛɛed di tmijja nnes uca trun nitni. 5 Nitni qqaren as i wemcan nni ‘Bukim’ uca nitni qeddmen din taɣarṣt i SIDI. □ Awarni i řmewt n Yacuwa iffeɣ ayt n Israil zeg webrid n SIDI
6 Umi Yacuwa issekk řgens, ffɣen ayt n Israil, kuř aryaz ɣar tesɣart nnes, maḥend ad ṭṭfen tammurt d řwart. ■ 7 Tuɣa řgens isexxar i SIDI marra ussan n Yacuwa d marra ussan n imɣaren, inni ɛad iqqimen ddaren aṭṭas awarni i Yacuwa u inni iẓrin marra řxedmet tameqqrant n SIDI tenni igga ak-d Israil. 8 Yacuwa, mmis n Nun, amsexxar n SIDI, immut am ijj n bnadem d bab n mya u-ɛecra n iseggʷusa. 9 Neḍřen t daxeř i weymir n tesɣart nnes di Timnat-Ḥaras, di temmurt n idurar n Ifrayim, ɣar uɣezdis n ccamal n wedrar n Jaɛac.
10 U ɛawed ittwasmun marra jjiř nni ɣar řejdud nnes. Awarni asen ikkar-dd ijj n jjiř nneɣni, jjiř nni war issin ca SIDI u war issin ca řxedmet i igga ak-d Israil.
11 Xenni ggin ayt n Israil min tuɣa iǧan d aɛeffan di tiṭṭawin n SIDI uca sexxaren i ‘ibaɛalen’
12 Nitni jjin SIDI, AREBBI n ibabaten nsen, wenni ten-dd issuffɣen zi Miṣra uca nitni ḍfaren irebbiten nneɣni, irebbiten n řegnus i d asen-dd innḍen, uca uḍaren asen u ammu i sɛaren SIDI.
13 Maɣar nitni jjin SIDI uca dewřen sexxaren i Baɛal u i Ɛactarutin
14 X uya yarɣa weɣḍab n SIDI x Israil. Netta igga i-ten deg ufus n iceffaren i ten ikeccḍen u igga i-ten deg ufus n řɛedyan nsen i d asen dd-innḍen uca dewřen war zemmaren ad qqimen bedden zzat i wudem n řɛedyan nsen. ■
15 Mani ma ffɣen nitni, tuɣa afus n SIDI ḍidd nsen i řɣar, am mammec tuɣa issiweř SIDI u am mammec tuɣa i d asen ijjuǧ SIDI. Aqa ttwaḥṣaren ař aneggar. ■
16 SIDI issekkar ɛawed řquḍat, inni ten issnejmen zeg ufus n yinni ten ikeccḍen.
17 Nitni war sřin ca uřa ɣar řquḍat nsen, maca ssfesden ixef nsen umi uyuren awarni irebbiten nneɣni uca uḍaren asen. Deɣya ḥeyyden x webrid nni tuɣa di uyuren ibabaten nsen, inni tuɣa isřin i tweṣṣa n SIDI. Nitni maca war ggin amenni!
18 Umi d asen dd-issekkar SIDI řquḍat, tuɣa SIDI ak-d řqaḍi uca issenjem i-ten zeg ufus n řɛedyan nsen, marra ussan n řqaḍi nni, maɣar SIDI tuɣa indem zi ssibbet n iɣuyyan nsen zzat i wudem n yinni ten iḥṣaren d yenni i xasen ittaẓẓřen.
19 Uca imsar umi immut řqaḍi, aqa nitni dewřen ɣar ḍeffar uca dewřen ɛeffnen ktar zeg ibabaten nsen umi uyuren awarni irebbiten nneɣni u sexxaren asen uca uḍaren ɣarsen. Nitni war jjin zi tmegga nsen tiɛeffanin u zi webrid nsen i tuɣa ḍeffaren s tɣennant. ■ 20 Xenni yarɣa weɣḍab n SIDI x Israil uca Netta inna: “Minzi řgens-a iɛedda Řɛahd inu min xef weṣṣiɣ ibabaten nsen u war sřin i tmijja inu, 21 uřa d Necc war qqimeɣ ɛad ad aẓẓřeɣ zzat i wudem nsen x řegnus nni ijja Yacuwa, umi immut, ■ 22 ařami Necc ad zzaysen qeǧbeɣ Israil, ma ad ḥḍan nitni abrid n SIDI maḥend ad dayes uyuren am mammec t ḥḍan ibabaten nsen, niɣ lla.” 23 Uca ijja SIDI řegnus-a ad areyyḥen uca war xasen yuẓẓiř deɣya u ɛawed netta war ten iggi deg ufus n Yacuwa.