1 Ina d řegnus i ijja SIDI ad areyyḥen, ḥima ad zzaysen iqeǧeb Israil, ixs ad yini marra inni war issinen ca ɛad x marra garrat ak-d Kenɛan, 2 mɣir ḥima ad dewřen jjiřat n ayt n Israil ad ssnen amenɣi, ḥima ad řemden ad mmenɣen, mɣir inni war issinen ca amenɣi: 3 xemsa n řbacat n ayt n Ifilisṭiniyyen d marra Ikenɛaniyyen d Iṣiduniyyen d Iḥiwiyyen i izeddɣen x idurar n Lubnan, zeg wedrar n Baɛl-Hirmun ař mani i ɣa tiwḍed ɣar Ḥamat. 4 Nitni tuɣa aten din ḥima ad zzaysen ittwaqeǧeb Israil, ḥima ad yiři ittwassnen ma nitni ad sřen i tweṣṣa n SIDI, tinni yumur Netta i ibabaten nsen s ufus n Musa.

5 Ayt n Israil tuɣa zeddɣen di řwest n Ikenɛaniyyen d Iḥittiyyen d Imuriyyen d Ifiriziyyen d Iḥiwiyyen d Iyabusiyyen. 6 Nitni iwyen yessitsen d temɣarin nsen i yixef nsen u tiḥenjirin nsen wcin tent i iḥenjiren nsen uca nitni bdan ad sexxaren i irebbiten nsen.

7 Uca ggin ayt n Israil min iǧan d aɛeffan di tiṭṭawin n SIDI, ttun SIDI, AREBBI nsen, uca uyuren ad sexxaren i Ibaɛalen d tirebbin nsen n cwarti. 8 Xenni yarɣa weɣḍab n SIDI x Israil u netta iwca i-ten deg ufus n Kucan-Ricaɛtayim, ajeǧid n Aram-Nahrayn, aqa-tt d Misubutamya. Xenni sexxaren ayt n Israil tmenya n iseggʷusa i Kucan-Ricaɛtayim. 9 Sɣuyyen ayt n Israil ɣar SIDI uca SIDI igga ad ikkar ijj n umsenjem i ayt n Israil, wenni i ten ifekken, Ɛutniyil, mmis n Qanaz, umas n Kalib, wenni d ameẓyan xas.

10 Tuɣa xas Arruḥ n SIDI u tuɣa-t d řqaḍi x Israil uca iffeɣ ɣar umenɣi. Iwca as SIDI Kucan-Ricaɛtayim, ajeǧid n Aram, deg ufus nnes uca iɣřeb netta x Kucan-Ricaɛtayim.

11 Tareyyeḥ temmurt arebɛin n iseggʷusa. Xenni immut Ɛutniyil, mmis n Qanaz.

12 Ayt n Israil arnin ad ggen min iǧan d aɛeffan di tiṭṭawin n SIDI. Uca SIDI igga jjehd di Ɛijlun, ajeǧid n Mu’ab, ḍidd i Israil, minzi nitni ggin min iǧan d aɛeffan di tiṭṭawin n SIDI.

13 Netta issmun ɣares ayt n Ɛammun d Iɛamaliqiyyen uca iffeɣ, iɣřeb x Israil uca nitni ṭṭfen tandint n tcejjura n tini. ^□  

14 Tmenṭac n iseggʷusa tuɣa ayt n Israil ttsexxaren i Ɛijlun, ajeǧid n Imu’abiyyen.

15 Xenni sɣuyyen ayt n Israil ɣar SIDI uca SIDI igga ad dd-ikkar ijj n umsenjam, Ihud, mmis n Jira, zi teqbič n Binyamin, ijj n weryaz umi farɣen ifassen. Uca ayt n Israil ssekken t ḥima ad as yawi ict n terzeft i Ɛijlun, ajeǧid n Imu’abiyyen.

16 Ihud igga i yixef nnes ijj n ssif ɣares tnayen n řeqduɛ, tuzzeggart nnes anect n ijj n uɣiř, iqqen i-t sadu warruḍ nnes ɣar tmeṣṣaḍt nnes tafusect.

17 Ammu i dd-iqarreb s terzeft ɣar Ɛijlun, ajeǧid n Imu’abiyyen. Ɛijlun tuɣa d aryaz iseḥḥ aṭṭas.

18 Umi tuɣa Ihud ikemmeř timewca n tarzeft, imsar, aqa issneddeh iwdan i tuɣa yarebbun tarzeft ɣar řaggʷaj,

19 maca netta simant nnes iɛqeb zi řexyař ineqcen i din iǧan di Jiljal, inna: “Necc ɣari ijj n ssir xak, ajeǧid!” D wa inna: “Sqarem!” D marra wi tuɣa ibedden ɣares, ffɣen zi ɣares ɣar barra.

20 Yusa-dd ɣares Ihud umi Ɛijlun iqqim deg wexxam n wesqif, wenni tuɣa i netta waha. Xenni inna Ihud: “Necc ɣari ijj n wawař n AREBBI i cek.” Uca ikkar ujeǧid zi řkursi nnes igellden. 21 Xenni isswiẓẓeḍ Ihud s ufus nnes azeřmaḍ, ijbed-dd ssif nni x tmeṣṣaḍt nnes tafusect, icuqq i-t deg uɛeddis nnes, 22 ařami yudef s ufus nni awarni i řmus n ssif uca tadunt tbelleɛ-dd x řmus, maɣar netta war ikkis ssif zeg uɛeddis nnes. Xas uca iffeɣ as-dd zi texbuct n ḍeffar. 23 Xenni iffeɣ Ihud zeg wuffuɣ n wexxam n wesqif. Ibelleɛ tiwwura n wexxam n tɣurfet awarni as u yarra zzekrun.

24 Umi yuyur netta, usin-dd imsexxaren nnes uca umi ẓrin aqa tiwwura n wexxam n nnej ttwabellɛent s zzekrun, nnan: “Netta aqa idřa waha iḍaren nnes deg wexxam n daxeř.” 25 Nitni qqimen ttrajan ařami dewřen ssedḥan, u xzar, netta war yarzim ca tiwwura n wexxam n nnej. Nitni ksin ssarut, arzmen tawwart, uca xzar, siditsen di temmurt immut.

26 Ihud maca tuɣa yarweř, am tuɣa ttrajan nitni. Netta tuɣa ikka x řexyař ineqcen uca yarweř ɣar Siɛirat. 27 Řami dd-yiweḍ netta dinni, iṣuḍ deg uyicc n icarri x idurar n Ifrayim. Xenni hwan ayt n Israil akides zeg wedrar u netta simant nnes yuyur zzat i wudem nsen. 28 Netta inna asen: “Ḍfarem ayi-dd, minzi SIDI iwca awem řɛedyan nwem, Imu’abiyyen, deg ufus nwem.” Uca nitni ḍfaren t uca ṭṭfen imucan n uẓekkwu n L'Urdun ɣar Mu’ab uca war jjin uřa d ijj ad iẓwa. 29 Di řweqt nni wtin nitni Imu’abiyyen, ɛřaḥař tenɛac-ařef n yeryazen, marra nitni jehden, iɛeskariyyen, uřa d ijj n weryaz war injim. 30 Ammu ittwasdeǧ Mu’ab deg wass nni sadu ufus n Israil uca tareyyeḥ temmurt tmenyin n iseggʷusa.

31 Awarni as yusa-dd Camjar, mmis n Ɛanat, wenni inɣin setta-mya n yeryazen zeg Ifilisṭiniyyen s yijj n řmacam n ifunasen. Ammu uřa d netta issenjem Israil.