1 Umi tuɣa Ihud immut, arnin ayt n Israil ad ggen min iǧan d aɛeffan di tiṭṭawin n SIDI. 2 SIDI igga i-ten SIDI deg ufus n Yabin, ajeǧid n Ikenɛaniyyen, wenni tuɣa iḥekkem di Ḥaṣur. Tuɣa Sisara d akumandar n řɛeskar nnes. Wa tuɣa izeddɣen di Harucit-Haxuyim. ^■   3 Xenni sɣuyyen ayt n Israil i SIDI, maɣar Sisara ɣares tesɛa-mya n ikarruten n umenɣi u netta tuɣa issdeǧ ayt n Israil s lɛunf řmijař n ɛicrin n iseggʷusa. 4 Tuɣa Dabura, tanabit, tamɣart n Lappidut, teḥkem Israil di řweqt nni. 5 Nettat tuɣa tzeddeɣ swadday i tcejjart n tini n Dabura, jar Rama d Bayt-Il, x idurar n Ifrayim uca ayt n Israil geɛɛden ɣares maḥend ad as awyen ddeɛwat nsen. 6 Nettat tessekk, třaɣa i Baraq, mmis n Abinuɛam zi Qadac di Naftali, tenna as: “Ma war yumur SIDI, AREBBI n Israil: ‘Uyur, ffeɣ ɣar wedrar n Tabur u tawyed akidek ɛecra ařef n yeryazen zeg ayt n Naftali u zeg ayt n Zabulun! ^■   7 Ɣar teɣzart n Qicun necc ad ɣarek nedheɣ Sisara, akumandar n řɛeskar n Yabin, ak-d ikarruten nnes d ubarru nnes n yeryazen uca ad ac t-i-dd wceɣ deg ifassen nnek!’ ” ^■   8 Baraq inna as: “Mařa cem tuyured akidi, ad uyureɣ, maca mařa cem war kidi tuyured, war ggureɣ.” 9 Nettat tenna: “Necc ad kik uyureɣ nican, mɣir war d ac ittiři ccan deg webrid i ɣa tuyured, minzi SIDI ad izzenz Sisara ɣar ufus n ict temɣart.” Xenni Dabura tekkar uca tuyur ak-d Baraq ɣar Qadac.

10 Xenni Baraq iřaɣa-dd i Zabulun d Naftali ɣar Qadac uca igeɛɛed x iḍaren ak-d ɛecra-ařaf n yeryazen uca uřa d Dabura tuyur akides.

11 Ḥabir, Aqini, wenni tuɣa ittnejřa x Qayin, netta d ijj n zeg ayt n Ḥubab, aḍeggʷař n Musa, aqa iwta iqiḍan nnes ɣar tcejjart n yigg di Ṣaɛanayim nni iǧan ɣar Qadac. ^■  

12 Xebbaren i Sisara, aqa Baraq, mmis n Abinuɛam, igeɛɛed ɣar wedrar n Tabur.

13 Xenni issmun-dd Sisara marra ikarruten nnes, tesɛa-mya n ikarruten n wuzzař, d marra řgens i tuɣa ɣares iǧan, zi Ḥarucat-Haxuyim ař teɣzart n Qicun.

14 Uca tenna Dabura i Baraq: “Kkar, minzi wa d ass i di iwca SIDI Sisara deg ufus nnek. Ma war dd-itteffeɣ SIDI simant nnes ɣar zzat i cek!” Xenni ihwa-dd Baraq zeg wedrar n Tabur u ɛecra-ařaf n yeryazen ḍfaren t.

15 SIDI yaẓẓeř x Sisara u x marra ikarruten nnes u x marra řɛeskar nnes s řeqḍeɛ n ssif zzat i wudem n Baraq, ařami iḍra x ukarru, yarweř x iḍaren. ^■  

16 Uca Baraq iḍfar ikarruten d řɛeskar ař Ḥarucat-Haxuyim. Marra řɛeskar n Sisara iwḍa s řeqḍeɛ n ssif, ařami war iqqim uřa d ijj.

17 Sisara yarweř x iḍaren ɣar uqiḍun n Yaɛil, tamɣart n Ḥabir, Aqini, maɣar tuɣa řehna jar Yabin, ajeǧid n Ḥaṣur d taddart n Ḥabir, Aqini.

18 Yaɛil teffeɣ ɣar Sisara, tenna as: “Ejj abrid, a sidi, ejj abrid ɣari, war teggʷed!” Uca netta iffeɣ zeg webrid, yuyur ɣares ɣar uqiḍun uca nettat tedřa i-t s ict n tmaltat.

19 Netta inna as: “Ewc ayi aman ad sweɣ, necc dayi afadi!” Nettat tarzem ict n txancet n uɣi u tewca as ad isu, xenni tedřa i-t twařat nneɣnit. ^■   20 Xenni inna as ɛawed: “Bedd ɣar tewwart n uqiḍun uca mařa yusa-dd ijjen isseqsa cem, iqqar: ‘Ma da ca n ijj?’, xenni arr xas: ‘Uřa d ijj!’ ” 21 Teṭṭef Yaɛil, tamɣart n Ḥabir, ijj n řewted n uqiḍun uca teksi ijj n wefḍis deg ufus nnes uca tudef ɣares nhřa řḥess uca tewta as řewted deg uɣezdis n uzeǧif nnes ařami yiweḍ řewted ɣar temmurt. Tuɣa netta yuǧeɣ deg yiḍeṣ s řweḥřan, uca ammu i immut.

22 U xzar, Baraq tuɣa iḍeffar Sisara uca teffeɣ Yaɛil, truḥ ad kis temmeřqa, tenna as: “As-dd, ad ac ssecneɣ aryaz wenni x tarezzud!” Netta yudef akides uca aqa Sisara ittazzeř x temmurt u řewted deg uɣezdis n uzeǧif nnes. 23 Ammu i issdeǧ SIDI Yabin, ajeǧid n Kenɛan, zzat i wudem n ayt n Israil deg wass nni. 24 Afus n ayt n Israil yarenni ad iṭṭef uca idqeř aṭṭas x Yabin, ajeǧid n Kenɛan, ɣares ařami tuɣa teḥḥan Yabin, ajeǧid n Kenɛan.