Izři n uɣelleb n Dabura d Baraq
5
1 Deg wass nni tɣennej Dabura ak-d Baraq, mmis n Abinuɛam, tenna: 2 “Barkem SIDI i ijeṭṭayen n ucewwaf ittwafessyen di Israil,
s uṭewweɛ n řgens s řxaḍar!”
3 Sřem, kenniw, ijeǧiden, sḥessem, kenniw, ayt n jjehd!
Necc ad ɣennjeɣ izřan i SIDI,
necc ad zehhdeɣ i SIDI, AREBBI n Israil.
4 A SIDI, umi Cek dd-teffɣed zi Saɛir,
umi Cek tuɣa dd teggured zeg iyyar n Idum,
tenhezz temmurt, yarjij ujenna,
wah, uřa d iseynuten farrɣen-dd s waman. ■
5 Idurar fesyen zzat i wudem n SIDI,
adrar nni n Sina, ifsi zzat i wudem n SIDI, AREBBI n Israil. ■
6 Deg wussan n Camjar, mmis n Ɛanat,
deg wussan n Yaɛil, qqimen ibriden xřan,
u inni tuɣa igguren x tebridin,
ttekken imesraq iɛarrqen.
7 Imjaheden war qqimen, war qqimen di Israil,
ɣares ařami necc, Dabura,
kkareɣ necc, yemmas n Israil.
8 Umi ifarz řgens irebbiten imaynuten,
xenni tuɣa din ijj n umenɣi ineqqen ɣar tewwura.
Taseddart n uɛeskar d uḥric,
war ttwaẓaren ca jar arebɛa-ařaf di Israil?
9 Uř inu ak-d imgewwaden n Israil,
inni iṭewwɛen ixef nsen jar řgens s řxaḍar,
lbaraka i SIDI!
10 A kenniw, inni innayen x teɣyař d ticemřařin,
kenniw inni ittɣiman x tzarbiyyin
d kenniw inni igguren deg webrid, siwřem x man aya!
11 S tmijja n imjebbaden n řqews, din jar wanuten,
aqa ittwaseř wawař x tmegga iseggden n SIDI,
timegga iseggden n imjahaden n Israil.
Xenni ihwa-dd řgens n SIDI ɣar tewwura n tendint.
12 Faq, faq, Dabura, faq, faq, siweř s yijj n izři!
Kkar, Baraq, ḥebbes imeḥbas nnek,
a cek, mmis n Abinuɛam!
13 Xenni ihwa wi iqqimen n ayt n jjehd jar řgens,
SIDI ihwa-dd ɣ̮ari ak-d ayt n bu-teɣruḍt.
14 Zeg Ifrayim inni aẓwar nsen di Ɛamaliq
u awarni ac Binyamin jar řɛeskarat n yewdan nnek.
Zi Maxir hwan imgewwaden,
u zi Zabulun inni iṭṭfen aɛekkaz n tira.
15 Řḥukkam n Issakar hwan-dd ak-d Dabura
uca amecnaw mammec ittwassekk Issaxar,
ammu i ittwassekk uřa d Baraq di řewḍa n teɣzurt.
Di řeṣfuf n Rubin tuɣa ixarriṣen n wuř d aṭṭas.
16 Mayemmi teqqimed jar iɣendifen,
tessḥessed ɣar wesbuɛriy n tḥimriwin?
Di řeṣfuf n Rubin ggin ad beqqcen deg wuř aṭṭas.
17 Jilɛad iqqim izeddeɣ x ujemmaḍ n L'Urdun
u mayemmi iqqim Dan ɣar tɣarruba am ijj n ubarrani?
Acir iqqim ɣar tma n řebḥar
uca iqqim izeddeɣ ɣar iftasen nnes.
18 Zabulun d ijj n řgens isebbeř tudart nnes ař řmewt,
am t igga uřa d Naftali di řegɛudi n wazzay n umenɣi.
19 Ijeǧiden usin-dd, menɣen.
Řexdenni mmenɣen ijeǧiden n Kenɛan
di Taɛnak ɣar waman n Majiddu.
War ksin maca takeccaḍt n nnuqart.
20 Zeg ujenna mmenɣen,
itran menɣen ak-d Sisara zi tebridin nsen.
21 Iɣzar n Qicun iwyi i-ten,
tiɣzart n mecḥař uya, tiɣzart n Qicun,
uyur s jjehd, a řeɛmar inu.
22 Řexdenni ddzen ticeḍyin n iysan zeg uzerzer
i zi izzerzren inni ijehden s yiysan nsen.
23 Neɛřem Miruz, inna Lmalak n SIDI,
neɛřem imezdaɣ nnes s ict n nneɛřet,
minzi war dd-usin ḥima ad wcen afus i SIDI,
ḥima ad wcen afus i SIDI s ayt n bu-teɣruḍt.
24 Tettwabarek Yaɛil, tamɣart n Ḥabir, Aqini,
sennej i marra timɣarin.
Tettwabarek nettat sennej i marra timɣarin izeddɣen deg iqiḍan.
25 Netta ittar aman, nettat tewca as aɣi,
tiwi as-dd trussi deg ict n ṭṭebṣi d ameqqran aṭṭas.
26 S ufus nnes tesswiẓẓeḍ ɣar řewted
u afusi nnes ɣar wefḍis n ixeddamen.
Nettat tewta Sisara, teřbez as azeǧif nnes,
tɛebbez xas uca tessnuqqeb as aɣezdis n uzeǧif nnes.
27 Ikmummec jar iḍaren nnes, ibbuzzeř, aqa izzeř din.
Aqa ikmummec jar iḍaren nnes, ibbuzzeř.
Umi tuɣa ittekmummuc, iwḍa din, uca iwḍa-dd iřeqqef!
28 Zi řkazi nnes texzar-dd yemmas n Sisara uca tesɣuyy jar iqḍiben n wuzzař
‘Mayemmi iɛeṭṭař ukarru nnes ammu aṭṭas?
Mayemmi ikarruten nnes qqimen war gguren uřa d ict n uṣurif?’
29 Inni d tiɣmisin aṭṭas jar tjeǧidin nnes arrint-i-dd,
uca uřa d nettat simant nnes tarra-dd x min tenna:
30 ‘Ma xenni nitni war ufin walu
uca aqa aten war ggur ad bḍan takeccaḍt?
I kuř aryaz ijehden ict n teɛzarect niɣ tnayen n teɛzariyyin?
Takeccaḍt n ikettanen ittwasqareqcen i Sisara,
takeccaḍt n ikettanen ittwasqareqcen,
aburḍa, řxedmet n umudi ɣar tnayen n iɣezdisen
zeg ukettan ittwasqareqcen i irawen,
am tkeccaḍt?’
31 Ammu i ɣa hellken řɛedyan nnek, a SIDI,
maca inni t ittexsen ad iřin am tfuct
i dd-ineqqaren di jjehd nnes.”
Uca tammurt tareyyeḥ arebɛin n iseggʷusa.