1 Maca ayt n Israil ggin min iǧan d aɛeffan di tiṭṭawin n SIDI uca isellem i-ten SIDI deg ufus n Midyan, ijj n řmijař n sebɛa n iseggʷusa. 2 Umi tuɣa afus n Midyan ijhed x Israil, ggin ayt n Israil i yixef nsen ifran deg idurar d ixerdusen d lqelɛat ḍidd i Midyan. 3 Awarni řami izarɛ Israil, xenni Midyan tuɣa ittgeɛɛed, uca uřa d Iɛamaliqiyyen d ayt n ccarq geɛɛden ḍidd nsen. 4 Nitni wtin iqiḍan nsen ḍidd nsen uca areddǧen řɣiǧet n temmurt ař jjwayeh n Ɣazza. Nitni war jjin di Israil i zi ɣa iddar bnadem, řa d uǧi, řa d afunas uřa d aɣyuř, 5 maɣar nitni geɛɛden s tḥimriwin nsen d iqiḍan nsen uca usin-dd am ijj n weyřaf n tmurɣi. War izemmar ad ttwaḥesben ak-d iřeɣman nsen uca nitni udfen tammurt ḥima ad tt areddǧen. 6 Ammu iẓřeḍ Israil aṭṭas zi ssibbet n Midyan. Uca xenni sɣuyyen ayt n Israil ɣar SIDI.

7 Xmi sɣuyyen ayt n Israil ɣar SIDI di ssibbet n Midyan, imsar, 8 aqa SIDI issekk-dd ijj n weryaz, ijj n unabi, ɣar ayt n Israil. Netta inna asen: “Ammu i iqqar SIDI, AREBBI n Israil: ‘Necc ssgeɛɛdeɣ kenniw zi Miṣra u ssuffɣeɣ-dd kenniw zi taddart n tesmuɣi. 9 Necc fekkeɣ-dd kenniw zeg ufus n Imiṣriyyen u zeg ufus n marra inni kenniw iḥṣaren. Necc uẓẓřeɣ xasen zzat i wudem nwem u wciɣ awem tammurt nsen.

10 Necc nniɣ awem: Necc d SIDI, AREBBI nwem, war teggʷdem zi irebbiten n Imuriyyen, inni di temmurt nsen tzeddɣem!’ Maca kenniw war tesřim ɣar tmijja inu.” ^■  

11 Xenni yusa-dd Lmalak n SIDI uca iqqim sadu tcejjura n yigg nni ɣar Ɛafra, tenni n Yuwac, Abiɛazari. Mmis Jidɛun tuɣa-t din issarwat irden di tsirt n uḍiř ḥima ad ten issarweř ammu zzat i wudem n Midyan. ^□  

12 Řexdenni iban as-dd Lmalak n SIDI, inna as: “SIDI akidek, a cek, bu-teɣruḍt imeḥḍen!”

13 Jidɛun inna as: “A, Sidi, mařa SIDI aqa-t akidneɣ, mayemmi i d aneɣ iřqef xenni marra uya u mani ǧant marra řeɛjayeb i x d aneɣ ssiwřen ibabaten nneɣ, umi nitni nnan: ‘Ma war d aneɣ-dd issuffeɣ SIDI zi Miṣra?’ Maca řexxu inḍar aneɣ SIDI, isellem aneɣ deg ifassen n Midyan.”

14 Rexdenni idweř-dd ɣares SIDI, inna: “Uyur di jjehd nnek wanita uca ad tfekked Israil zeg ufus n Midyan. Ma Necc war cek-dd ssekkeɣ?” ^■  

15 Maca netta yarra-dd xas: “A, Sidi, s minzi i ɣa fekkeɣ Israil? Xzar řwacun inu d tamezřuḍt qaɛ di Manassa u necc d amudrus qaɛ di taddart n baba.”

16 Inna as SIDI: “Minzi Necc ad iřiɣ akidek, ad tɣeřbed Midyan, axmi d ijj n weryaz waha.”

17 Xenni inna as netta: “Mařa xenni ufiɣ arḍa di tiṭṭawin nnek, xenni iwca ayi ict n řeɛřamet, aqa d Cek simant nnek i dd kidi issawařen.

18 War ssa ttraḥ ca, ař ɣarek dd ɣa ɛeqbeɣ ad tiři iwyeɣ-dd tarzeft inu u ad tt-i-dd-ssarseɣ zzatek.” Netta inna: “Ad qqimeɣ ɣares ař dd ɣa tɛeqbed.”

19 Uca yudef Jidɛun, issewjed ijj n iɣayḍ d ameẓyan d iɣrumen břa aɣrum zeg yijj n ifa n waren. Netta issars aysum di tṣuǧet, igga arrwa deg ict n teydurt uca yiwi man aya ɣares ɣar barra sadu tcejjart n yigg uca issars as man aya. 20 Maca inna as Lmalak n SIDI: “Ksi aysum d iɣrumen břa antun u tessarsed ten da x teṣḍart uca zeǧeɛ xas arrwa!” Uca ammu i t igga. 21 Xas uca isarreḥ Lmalak n SIDI taɣɣarct i tuɣa ɣares deg ufus nnes, ihada zzayes aysum d iɣrumen břa antun. Řexdenni tgeɛɛed tmessi zi teṣḍart tecca aysum d iɣrumen. Xenni innufseř Lmalak n SIDI x tiṭṭawin n Jidɛun.

22 Umi Jidɛun iẓra, aqa tuɣa-t d Lmalak n SIDI, inna Jidɛun: “A Sidi inu, SIDI, aqa necc ẓriɣ Lmalak n SIDI aɣembub deg uɣembub.” 23 Maca SIDI yarra-dd xas: “Ad kidek yiři řehna, war tteggʷed ca, cek war ttmettid.” 24 Uca Jidɛun ibna dinni ijj n uɛalṭar i SIDI, igga as: “SIDI d řehna!” Aqa-t di Ɛafra n ayt n Abiɛazari ɣares ař ass-a.

25 Di ǧiřet nni simant nnes, imsar aqa SIDI inna as: “Ksi ijj n uyenduz d ameẓyan n ifunasen i iǧan n babac, ayenduz wiss tnayen nni ɣares iǧa sebɛa n iseggʷusa uca ɣḍeř aɛalṭar n Baɛl i iǧan n babac u zdem tarebbit n cwarti nni zzates! 26 Bna xenni ijj n uɛalṭar i SIDI, AREBBI nnek, x tqiccat n lqelɛa aya, sewjed i-t, uca ksi ayenduz wiss tnayen uca awyi t-i-dd d tɣarṣt n wecmaḍ s ukeccuḍ n trebbit n cwarti nni ittxeṣṣa ad tzedmed.”

27 Xenni iksi Jidɛun ɛecra n yeryazen zeg imsexxaren nnes uca igga am mammec i d as inna SIDI. Maca umi netta iggʷed zi řwacun n taddart n babas u zeg yeryazen n tendint ad t igg s wass, imsar belli igga i-t di ǧiřet. 28 Umi dd-kkaren yeryazen n tendint tiwecca zic, ẓrin nitni aqa aɛalṭar n Baɛl ittwahdem uca tᵉttwazdem trebbit n cwarti nni zzates u ayenduz wiss tnayen ittwabexxar x uɛalṭar i din ittwabnan. 29 Uca nnan i wayawya: “Man wen iggin aya?” Nitni sseqsan, arzun uca nnan: “Jidɛun, mmis n Yuwac, i-t iggin.” 30 Xenni nnan yeryazen n tendint i Yuwac: “Sufeɣ-dd mmic ḥima ad immet, minzi netta iɣḍer aɛalṭar n Baɛl u minzi netta izdem tarebbit n cwarti i zzates iǧan.” 31 Yuwac yarra-dd x marra inni i dd ɣares ibedden: “Ma texsem ad tmenɣem i Baɛl? Ma texsem ad t tessnejmem? Wenni akides i ɣa ibedden, ad ittwaneɣ di ṣṣbeḥ-a wanita. Mařa netta d ijj n arebbi, ejj i-t ad imneɣ i yixef nnes nnit, minzi ɣeḍřen aɛalṭar nnes.” 32 Deg wass nni iřaɣa as-dd i Jidɛun Yarabbaɛl, min ixs ad yini: “Baɛl imneɣ akides, maɣar netta iɣḍeř aɛalṭar nnes.”

33 Marra Midyan d Ɛamaliq d ayt n ccarq munen uca ẓwan-dd L’Urdun uca wtin iqiḍan nsen di řewḍa n teɣzurt n Yazraɛil. 34 Arruḥ n SIDI issyarḍ i Jidɛun uca netta iṣuḍ deg uyicc n icarri uca iřaɣa-dd x ayt n Abiɛazar maḥend ad bedden awarni as. 35 Issekk ireqqasen di marra Manassa uca ittwařaɣa Manassa maḥend ad bedden nitni awarni as. Xenni issekk ireqqasen ɣar Acir u ɣar Zabulun u ɣar Naftali uca nitni geɛɛden maḥend ad ten mmeřqan.

36 Xas uca inna Jidɛun i AREBBI: “Mařa Cek texsed s tidett ad tfekked Israil s ufus inu am mammec i d ayi tennid, 37 xzar, xenni necc ad ssarseɣ tahiḍurt n taḍuft x unedrar. Mařa iwḍa nnda mɣir x taḍuft waha u tammurt marra teqqim tuzeɣ, xenni ssneɣ necc, aqa Cek ad tessnejmed Israil s ufus inu, am mammec i d ayi tennid.” 38 U ammu i temsar. Tiwecca nnes netta ikkar zic uca izři tahiḍurt uca iẓemm-dd nnda zi thiḍurt, ict n ṭṭawya teccur s waman.

39 Xas uca inna Jidɛun i AREBBI: “Ttzawgeɣ war xafi yareqq weɣḍab nnek mařa necc ssiwřeɣ ict n twařa nneɣnit. Ejj ayi ad qeǧbeɣ s thiḍurt ɛad ict n twařa nneɣni waha uca ad teqqim thiḍurt tuẓeɣ u x marra tammurt ad din yiři nnda.” ^■   40 Uca di ǧiřet nni igga i-t SIDI ammu: tahiḍurt waha i iqqimen tuẓeɣ u tuɣa nnda x marra tammurt.