1 Xenni ikkar Yarubbaɛl, wa d Jidɛun, zic uřa d marra řgens i ɣares iǧan uca wtin řmargeḥ n řɛeskar nsen ɣar tařa n Ḥarud. Řmargeḥ n Midyan tuɣa iǧan zzates ɣar ccamal, zi tewrirt n Mura di řewḍa n teɣzurt. 2 SIDI inna i Jidɛun: “Řgens i ɣarek iǧan aqa-t deg waṭṭas, ařami war zemmareɣ ad asen ggeɣ Midyan deg ufus nsen, niɣ izemmar Israil ad xafi ifeyyec ad yini: ‘Afus inu issenjem ayi.’ 3 S uya, řaɣa deg imezzuɣen n řgens, ini: ‘Wenni itteggʷeden d wenni ittarjijen ad iɛqeb uca ad iffeɣ deɣya zeg idurar n Jilɛad!’ ” Xenni ɛeqben tnayen u-ɛicrin-ařef n yeryazen zi řgens uca qqimen ɣares ɛecra-ařaf. ^■   4 Maca SIDI inna i Jidɛun: “Řgens aqa-t ɛad deg waṭṭas. Sehwa ten ɣar waman, dinni ad ten ddzeɣ i cek. Ad imsar x wenni d ac i ɣa iniɣ: ‘Wa ad kik iraḥ!’, win ad kik iraḥ, maca kuř ijj x wenni d ac i ɣa iniɣ: ‘Wanita war kik ittriḥ!’, win war kik ittriḥ.” 5 Issehwa řgens ɣar waman. Xenni SIDI inna as: “Kuř ijj wenni i ɣa iwarden aman s yiřes nnes, am mammec i ten iwarred weqzin, ad t tegged ɣar ijj n ṭṭarf. Ammu uřa d marra inni i ɣa yaḍaren x ifadden maḥend ad swen.” 6 Řqedd n yinni iwyen aman s ufus nsen ɣar uqemmum nsen maḥend ad jeɣmen aman s yiřes nsen, tuɣa aten di teřt-mya n yeryazen, maca marra inneɣni uḍaren x ifadden ḥima ad swen aman. 7 Xas uca inna SIDI i Jidɛun: “S ufus n teřt-mya n yeryazen-a, inni ijeɣmen aman s yiřes nsen, ad kenniw ssnejmeɣ u Necc ad ggeɣ Midyan deg ufus nnek. Marra řgens nneɣni i iqqimen ad uyuren, kuř ijj ɣar wemcan nnes. 8 Nitni ksin řeɛweč n řgens d waccawen nsen n icarri deg ufus, umi netta issekk marra iryazen n Israil, kuř ijj ɣar uqiḍun nnes. Maca teřt-mya n yeryazen nni ijja i-ten ɣares. Tuɣa řmargeḥ n řɛeskar n Midyan swadday nnes di řewḍa n teɣzurt. 9 Di ǧiřet nni temsar, aqa SIDI inna as: “Kkar bedd, hwa ɣar řmargeḥ n řɛeskar, maɣar Necc ggiɣ ac ten deg ufus nnek.

10 Mařa cek aqa teggʷded maḥend ad dd-tehwid, hwa-dd xenni ɣar řmargeḥ n řɛeskar ak-d Fura, amsexxar nnek.

11 Ad tesřed min xef ssawařen uca xenni ad ac immewc jjehd deg ifassen nnek ařami i ɣa tehwid ɣar řmargeḥ n řɛeskar.” Xenni ihwa netta ak-d Fura, amsexxar nnes, ařami iwḍen ɣares ař zzat i terbiɛin isswejden i umenɣi ɣar ṭṭarf n řmargeḥ.

12 Uca Midyan d Ɛamaliq d marra ayt n ccarq tuɣa ssun di řewḍa n teɣzurt am ijj n weyřaf n tmurɣi u iřeɣman nsen war zemmaren ad ttwaḥesben, tuɣa aten deg waṭṭas am ijdi ɣar tma n řebḥar. ^■  

13 Umi yiweḍ Jidɛun din, xzar, ijj n weryaz, tuɣa ittḥaja i umeddukkeř nnes ict n tarjit, inna: “Xzar, necc ɣari ict n tarjit uca ẓriɣ mammec ijj n weɣrum n imendi i iwḍan ɣar swadday iqnunni-dd ɣar daxeř n řmargeḥ n řɛeskar n Midyan uca yiweḍ ɣares ař aqiḍun uca iřqef i-t ařami iwḍa u idweř x uzeǧif. Aqa ammu i iwḍa uqiḍun.”

14 Yarra-dd xas umeddukkeř nnes, inna: “Aya war ixs ad yini mɣir ssif n Jidɛun, mmis n Yuwac, aryaz zi Israil. AREBBI iwca Midyan d marra řmargeḥ n řɛeskar deg ufus nnes.”

15 Umi isřa Jidɛun tarjit-a d min texs ad tini, yuḍar iẓẓuǧ uca xenni iɛqeb ɣar řmargeḥ n řɛeskar n Israil, inna: “Kkarem, SIDI igga řmargeḥ n řɛeskar n Midyan deg ufus nwem.”

16 Jidɛun ibḍa teřt-mya n yeryazen x třata n ṭerbiɛin uca iwca kuř ijj ijj n uyicc n icarri deg ufus nnes d iqḍuḥen xwan d iṣefḍawen deg iqḍuḥen.

17 Netta inna asen: “Xzarem-dd ɣari uca ggem amenni. Xzar, mařa iwḍeɣ ɣar ṭṭarf n řmargeḥ, xenni ad teggem uřa d kenniw am mammec i ɣa ggeɣ necc.

18 Xmi i ɣa ṣuḍeɣ necc deg uyicc n icarri uřa d marra inni ɣari iǧan, xenni ad tṣuḍem uřa d kenniw deg waccawen n icarri ɣar marra iɣezdisen n řmargeḥ, ad tinim: ‘I SIDI u i Jidɛun!’ ”

19 Uca Jidɛun d mya n yeryazen nni tuɣa ɣares, iwḍen-dd ɣar ṭṭarf n řmargeḥ n řɛeskar ɣar umezwaru n tɛessast n wezyen n ǧiřet, umi ten tuɣa ɛad ggur ad ssbedden iɛessasen, uca ṣuḍen deg waccawen n icarri u umi wtin arẓin iqḍuḥen nni ɣarsen deg ufus nsen. 20 Třata n terbiɛin ṣuḍent deg waccawen n icarri uca arẓint iqḍuḥen u s ufus aẓeřmaḍ ṭṭfen iṣefḍawen u s ufus afusi accawen n icarri ḥima ad daysen ṣuḍen uca sɣuyyen: “Ssif n SIDI d Jidɛun!” 21 Qqimen bedden ɣar marra iɣezdisen n řmargeḥ kuř ijj deg wemcan nnes. Xenni bdan ad azzřen marra inni iǧan di řmargeḥ, sɣuyyen uca arewřen. 22 Umi ṣuḍen teřt-mya n yeryazen deg waccawen n icarri, issekkar SIDI ssif n ijjen ḍidd i wenneɣni di marra řmargeḥ uca yarweř řɛeskar ɣares ař Bayt-Ciṭṭa di jjihet n Ṣarada ař aymir n Abil-Maḥula, ɣar Ṭabbat. ^■   23 Xenni řaɣan-dd x yeryazen n Israil, zi Naftali u zi Acir u zi marra Manassa uca ḍfaren nitni ayt n Midyan. 24 Ɛawed issekk Jidɛun ireqqasen ɣar marra idurar n Ifrayim, inna: “Hwam, uyurem ɣar umsagar ak-d ayt n Midyan u tekksem as iɣezran ař Bayt-Bara uřa d L'Urdun.” Ttwařaɣan marra iryazen n Ifrayim uca nitni ṭṭfen iɣezran ař Bayt-Bara d L'Urdun. 25 Nitni ḥebbsen tnayen n ikumandaren n řɛeskar n Midyan, Ɣurab d Di’ab, uca nɣin Ɣurab x teṣḍart n Ɣurab u Di’ab nɣin t x tsirt n uḍiř n Di’ab uca nitni ɛerfen x Imidyaniyyen. Izeǧifen n Ɣurab d Di’ab iwyen ten ɣar Jidɛun x ujemmaḍ n L'Urdun. ^■