1 Xenni nnan as yeryazen n Ifrayim: “Manawya min i d aneɣ da teggid, aqa cek war xaneɣ-dd třiɣid umi teffɣed ḥima ad temmenɣed ak-d Midyan?” Uca nitni mmcubbecen akides aṭṭas. ^■   2 Jidɛun yarra-dd xasen: “Mani i dd ɣa yas min ggiɣ ak-d min teggim? Ma war iǧi ařqaḍ n min iyuran n uḍiř n ayt n Ifrayim xar zi řɣiǧet n binu n ayt n Abiɛazar? ^□   3 Deg ufus nwem igga SIDI Ɣurab d Di’ab, řḥukkam n Midyan. Min zemmareɣ ad ggeɣ ad t ssemquddeɣ akidwem?” Umi netta inna awař-a yarsa uxeyyeq nsen.

4 Umi dd-yusa Jidɛun ɣar L'Urdun, iẓwa netta ak-d teřt-mya n yeryazen nni tuɣa ɣares iǧan. Nitni fnan řami ten qqimen ḍeffaren. 5 Inna netta i yeryazen n Sukkut: “Ttzawgeɣ, wcem i řgens i dd ayi iḍfaren x iḍaren ticnifin n weɣrum, maɣar nitni fnan u necc aqa ḍeffareɣ Zabaḥ d Ṣalmunnaḥ, ijeǧiden n Midyan.” 6 Maca řḥukkam n Sukkut nnan: “Zabaḥ d Ṣalmunnaḥ ma aqa aten deg ufus nnek, maḥend ad newc aɣrum i řɛeskar nnek?” 7 Inna Jidɛun: “Xenni řexxu, xmi d ayi ɣa igg SIDI Zabaḥ d Ṣalmunnaḥ deg ufus inu, xenni ad awem ssarewteɣ aysum n arrimet nwem ak-d isennanen d tzeggʷart zi řexřa.” 8 Uca igeɛɛed-dd ssenni ɣar Fanuwil uca issiweř amenni ak-d yeryazen nnes. Arrin-dd xas yeryazen n Fanuwil amecnaw mammec i dd-arrin yeryazen n Sukkut. ^□   9 S uyenni issiweř ɛawed ak-d yeryazen n Fanuwil, inna: “Mařa necc ɛeqbeɣ-dd di řehna, ad hedmeɣ ṣṣumɛet-a ta.”

10 Tuɣa Zabaḥ d Ṣalmunnaḥ ak-d řɛeskar nsen di Karkur, tuɣa aten ɛřaḥař di xemmesṭac-ařef n yeryazen, marra inni tuɣa iqqimen zi marra řɛeskar n ayt n ccarq. Aqa mya u-ɛicrin-ařef n yeryazen inni izemmaren x ssif tuɣa ttwanɣen ɛad.

11 Uca Jidɛun igeɛɛed ak-d webrid n yinni izeddɣen deg iqiḍan, ɣar ccarq n Nubaḥ d Yujbaha u netta iɣřeb x řɛeskar nni, umi iɛeskariyyen di řmargeḥ ittɣiř asen aqa aten di řaman.

12 Zabaḥ d Ṣalmunnaḥ arewřen uca netta iḍfar i-ten. Iṭṭef tnayen n ijeǧiden n Midyan, Zabaḥ d Ṣalmunnaḥ, d imeḥbas uca issiggʷed marra řɛeskar. ^■  

13 Umi dd-iɛqeb Jidɛun, mmis n Yuwac, zeg umenɣi, ikka x tsunta n Ḥaras,

14 iṭṭef ijj n webřiɣ zeg yeryazen n Sukkut d ameḥbus uca isseqsa t. Wanita yura as marra ismawen n řḥukkam n Sukkut d imɣaren nsen, sebɛa u-sebɛin n yeryazen.

15 Umi dd-yiweḍ netta ɣar yeryazen n Sukkut, inna: “Ina d Zabaḥ d Ṣalmunnaḥ, inni zi i d ayi tessbarrqem umi tennam: ‘Ma Zabaḥ d Ṣalmunnaḥ aqa aten deg ufus nnek ař ɣa newc aɣrum i yeryazen nnek nni yuḥřen?’ ”

16 Xenni iṭṭef imɣaren n tendint d isennanen d tzeggʷart zi řexřa uca igga iryazen n Sukkut ad zzayes acan.

17 Lburj n Fanuwil ihdem i-t u inɣa iryazen n tendint.

18 Xenni inna i Zabaḥ d Ṣalmunnaḥ: “Mammec iǧan yeryazen nni tenɣim di Tabur?” Nitni arrin-dd xas: “Nitni tuɣa aten am cek, ɣarsen addud d ijjen ak-d iḥenjiren n ujeǧid.”

19 Xenni inna: “Nitni tuɣa d aytma, iḥenjiren n yemma. S tidett am iddar SIDI, mři ten tejjim ad ddaren, iři war kenniw neqqeɣ!” 20 Xenni inna i Yatar, amenzu nnes: “Kkar, neɣ i-ten!” Maca abřiɣ war dd-ikkis ssif nnes, minzi netta iggʷed umi ɛad d abřiɣ. 21 Xenni nnan Zabaḥ d Ṣalmunnaḥ: “Kkar cek simant nnek uca neɣ aneɣ, maɣar mammec aryaz, ammu tizemmar nnes.” Uca ikkar Jidɛun, inɣa Zabaḥ d Ṣalmunnaḥ uca iksi tiziriwin timeẓyanin i d yuyřen ɣar irawen n iřeɣman nsen. ^■  

22 Uca iryazen n Israil nnan i Jidɛun: “Ḥekmet xaneɣ, cek uřa d mmic d wayyaw nnek, maɣar cek tfekked aneɣ zeg ufus n Midyan.” 23 Inna asen Jidɛun: “Necc war xawem ḥekkmeɣ uřa d mmi war xawem iḥekkem. SIDI d wenni i xawem i ɣa iḥekmen.” 24 Jidɛun yarni inna asen: “Necc xseɣ ad zzaywem ttareɣ ca. Ad ayi iwc kuř ijj n weryaz ict n texrazt zi tkeccaḍt nnes, minzi ttwafen ɣarsen texrazin n wureɣ, maɣar nitni tuɣa aten d ayt n Ismaɛil. 25 Nitni nnan: “Neccin ad ac tent newc s řxaḍar!” Nitni bezzɛen ijj n werruḍ uca kuř aryaz inḍar xas ict n texrazt zi tkeccaḍt nnes. 26 Tixrazin n wureɣ nni ittar weznent sbeɛṭac-mya n iciqlen n wureɣ, nhřa tiziriwin timeẓyanin d texrazin di ṣṣifet n tuddimin d werruḍ arjuwani i tuɣa yarḍen ijeǧiden n Midyan, nhřa tiseddyin i yuyřen ɣar irawen n iřeɣman nsen. 27 Jidɛun igga zzayes ijj n upalṭu n ukehhan uca igga i-t di tendint nnes, di Ɛafra, u marra Israil yuyur awarni as am awarni i yict n temɣart n farq-ccɣeř. Aya idweř d tisendect i Jidɛun d taddart nnes. 28 Ammu tuɣa innbehdeř Midyan zeg ayt n Israil uca war zemmaren ad ssgeɛɛden azeǧif nsen ɛad. Tuɣa tammurt tareyyeḥ arebɛin n iseggʷusa deg wussan n Jidɛun.

29 Uca Yarubbaɛl, mmis n Yuwac, yuyur uca izdeɣ ɛawed di taddart nnes. 30 Jidɛun tuɣa ɣares sebɛin n iḥenjiren inni dd-iffɣen zi tmeṣṣaḍt nnes, minzi tuɣa ɣares aṭṭas n temɣarin. 31 Uřa d tayya nnes tenni tuɣa iǧan di Cakim, tejja as-dd ijj n uḥenjir i netta u netta igga as Abimalik. 32 Jidɛun, mmis n Yuwac, immut umi acewwaf nnes tuɣa icab aṭṭas uca nḍřen t deg wenḍeř n babas Yuwac, di Ɛafra, tandint n Abiɛazra.

33 Awarni řami immut Jidɛun, imsar, aqa ayt n Israil dewřen-dd uca ssfesden ixef nsen am uyuren awarni i Ibaɛlen uca ggin Baɛl-Barit d arebbi nsen. 34 Ayt n Israil war fekkaren ɛad di SIDI, AREBBI nsen, wenni ten ifekken zeg ufus n marra řɛedyan i d asen dd-innḍen 35 uca war ssecnen tamexsiwt icewwaren i taddart n Yarubbaɛl, d tenni n Jidɛun, x marra řxar i igga di ṭṭweɛ n Israil.