1 Naɛumi tuɣa ɣares ijjen zi řaǧ n weryaz nnes, ijj n weryaz s waṭṭas n wagřa, zi řaǧ n Alimalik, ttřaɣan as Buɛaz. ^■   2 Tenna Raɛut Tamu’abect i Naɛumi: “Ejj ayi ad ffɣeɣ ɣar iyyar ad ssmuneɣ tidrin awarni i wenni i ɣa yafeɣ arḍa di tiṭṭawin nnes.” Uca nettat tarra-dd xas: “Uyur, yeǧi!”

3 Raɛut tuyur uca tusa-dd din, tessmuna awarni i yenni imejjaren. Uca imsar, tewḍa as-dd tesɣart n yeyyar n Buɛaz wenni zi řaǧ n Alimalik. 4 U xzar, yusa-dd Buɛaz zi Bayt-Laḥm, inna i yenni imejjaren: “SIDI akidwem!” Nitni arrin-dd xas: “SIDI ad cek ibarek!” 5 Xenni inna Buɛaz i uḥudri nnes wenni tuɣa x yenni imejjaren: “Umi tegga yeǧis taḥenjirt nni?” 6 Aḥudri wenni tuɣa x yenni imejjaren, yarra-dd xas, inna: “Nettat d tabřiɣt Tamu’abect i dd-yusin ak-d Naɛumi zeg iyyaren n Mu’ab. 7 Nettat tenna: ‘Ejj ayi ad ssmuneɣ tidrin u ad yarweɣ tidrin ɣar icewwafen n imendi awarni i yenni imejjaren!’ Ammu tusa-dd uca teqqim zeg weffu n řḥař ɣares ař řexxu. Drus waha i teqqim di taddart.”

8 Buɛaz inna i Raɛut: “Ma war d ayi tessḥessed, a yeǧi? War ggur ad třeqḍed uřa ɣar ijj n yeyyar nneɣni, war taggʷej zi ssa, maca qqim tudsed ɣar txeddamin inu. 9 Tebbet tiṭṭawin nnem deg iyyar-a mani mejjaren uca tuyured awarni asen. Necc ɛeřmeɣ i iḥudriyyen inu, war cem ttḥidin. Mařa teffuded, tzemmared ad tuyured ɣar iqubac ad teswed zi min d yuymen iḥudriyyen.”

10 Nettat tudar zzat i wudem nnes uca teɣnes ɣar temmurt, tenna as: “Mayemmi ufiɣ arḍa di tiṭṭawin nnek, aqa cek tbedded akidi, waxxa necc maca d abarrani?”

11 Buɛaz yarra-dd xas, inna: “Aqa nnan ayi nican marra min teggid i lallam awarni i řmewt n weryaz nnem, mammec teggid tsemḥed di babam d yemmam d temmurt nnem mani txeřqed uca tuyured ɣar ijj n řgens wenni tuɣa war t tessined qbeř.

12 Ad cem ixeǧeṣ SIDI n Israil tasexxart nnem taṣebḥant i teggid uca ad am dd-tas řmunet teccur zi SIDI, AREBBI n Israil, sadu ifriwen nnes i dd-tusid maḥend ad dinni tedduryed .”

13 Nettat tenna: “Ejj ayi ad afeɣ arḍa di tiṭṭawin nnek, a sidi inu, minzi tessfewwjed xafi, tessiwřed ɣar wuř n txeddamt nnek, waxxa necc war ǧiɣ amecnaw uřa d ict zi txeddamin nnek.”

14 Ɣar řḥař n macca inna as Buɛaz: “As-dd da uca ecc zeg weɣrum, sisen ařeqqʷuz nnem di řxeǧ!” Nettat teqqim zzat i icewwařen uca iwca as netta tiɣwawin, tecca tejjiwen, iceṭṭ xas ɛad.

15 Ařami tekkar ḥima ad tessmun tidrin, iɛřem Buɛaz i iḥudriyyen nnes: “Ejj i-tt ad tessmun jar icewwafen n imendi u war tt tesseḥqaram ca!

16 Ɣeḍřem as-dd cwayt cwayt zi tqebbiḍin uca jjem tt di tammurt, uca jjem tt ad tt tessmun, war tt tzawarem.”

17 Uca nettat tuɣa třeqqeḍ deg iyyar nni ɣares ař tameddit. Xenni tṣeffa min tuɣa teřqeḍ. Tuɣa ɛřaḥař řqedd n ijj n ifa n imendi.

18 Nettat tessmun i-t, tudef ɣar tendint uca teẓra lallas min tuɣa teřqeḍ. Tejbed ɛawed min tuɣa iceṭṭen zi macca nnes tameqqrant uca tewca as t.

19 Xenni lallas tesseqsa: “Mani třeqḍed ass-a u mani txedmed? Ad ittwabarek wenni tuɣa akidem ibedden!” Uca nettat tḥaja as i lallas wi i ɣar tuɣa texdem, tenna: “Aryaz i ɣar xedmeɣ ass-a ttřaɣan as Buɛaz.” 20 Xenni tenna Naɛumi i tesřift nnes: “Ad ittwabarek SIDI wenni war ikkisen tamexsiwt nnes icewwaren zeg yenni iddaren d yenni immuten!” Tenna as Naɛumi ɛawed: “Aryaz nni zzayneɣ, netta d ijj zeg imefdiyyen nneɣ inni zemmaren ad sɣen afedday.” ^□   21 Raɛut, Tamu’abect, tenna: “Netta inna ayi ɛad: ‘Qim ɣar iḥudriyyen nni ɣari iǧan, ɣares ař ɣa kemmřen ad ssmunen marra tamegra nni ɣari iǧan.’ ” 22 Tenna Naɛumi i tesřift nnes Raɛut: “Mliḥ, a yeǧi, mařa teffɣed cem ak-d txeddamin nnes, xenni war iǧi wi cem i ɣa ihewřen deg iyyar nneɣni.” 23 Raɛut teqqim tudes i txeddamin n Buɛaz ḥima ad tessmun tidrin, ɣares ařami teqḍa tmeyra n imendi d tmeyra n irden uca teqqim tezdeɣ ɣar lallas.