1 Uca lallas Naɛumi tenna as: “A yeǧi, ma tuɣa war ttexseɣ ad am afeɣ amcan n řaman ḥima ad tiřid mliḥ? 2 Řexxu xenni, ma Buɛaz, mani wi ɣar cem tuɣa jar txeddamin nnes, war iǧi d ijjen zi raǧ nneɣ? Xzar, ass-a ɣar tmeddit, ad izzuzzar imendi deg unedrar. 3 Sird, dhen ixef nnem uca yarḍ taqendurt nnem, xenni hwa-dd ɣar unedrar! War sscan maca ixef nnem i weryaz ař ɣa yiři icca iswa. 4 Mařa iraḥ ad iṭṭes, ad tiři ad tarzud amcan mani izzeř. Adef xenni din, tɛarrid x dduri x iḍaren nnes uca zzeř dinni! Netta ad am yini xenni, min ittxeṣṣa ad t tegged.” 5 Nettat tarra-dd xas: “Marra min d ayi teqqared, ad t ggeɣ.”

6 Nettat tehwa ɣar unedrar uca tegga amenni qaɛ min tuɣa d as tenna lallas. 7 Řami icca iswa Buɛaz, ifarḥ wuř nnes, ikkar yuyur, ḥima ad izzeř ɣar ṭṭarf n ijj n uɛurric n tqebbiḍin n imendi. Xenni tusa-dd břa řḥess, tɛarra x dduri ɣar iḍaren nnes uca tezzeř. 8 Ɣar wezyen n ǧiřet innexřeɛ weryaz nni, ifafa, uca xzar, ict n temɣart tuɣa tezzeř ɣar iḍaren nnes. 9 Netta inna: “Min teɛnid cem?” Nettat tarra-dd xas: “Necc d Raɛut, tayya nnek. Egg maca afriw nnek x tayya nnek, maɣar cek d wenni izemmaren ad ayi ifdi umi cek d amefdi .” ^□  

10 Inna netta: “Tettwabarked cem zi SIDI, a yeǧi! Řexxu deg uneggar teggid tamexsiwt nnem icewwaren mahu s min teggid deg umezwaru, maɣar cem war tuzziřed awarni i iɛezriyyen, imezřaḍ niɣ ɣar ayt n bu wagřa.

11 Xenni řexxu, a yeǧi, war teggʷed ca! Marra min ɣa tinid, ad am t ggeɣ, maɣar qaɛ wi da jar řeḥyuḍ issen, aqa cem d ict n temɣart temḥeḍ.

12 Řexxu xenni, d tidett necc d ijj n umefdi, maca din ɛad ijj n umefdi nneɣni, wenni d am itteɛnan ktar xafi necc.

13 Seɛdu ǧiřet-a da. Mařa imsar tiwecca di ṣṣbeḥ, netta ixs ad xam ifdi, mliḥ, xenni ejj i-t ad ifdi, maca mařa netta war ixs ad cem ifdi, xenni necc ad xam fdiɣ, s tidett xenni am iddar SIDI. Qqim zzeř ař tiwecca.”

14 Ammu i teqqim tezzeř ɣar iḍaren nnes ɣares ař tiwecca uca qbeř ma izemmar ad ttwaẓaren, tekkar, maɣar netta inna: “War tᵉttiři tᵉttwassnen, aqa ict n temɣart tuɣa tusa-dd ɣar unedrar”

15 Netta inna ɛawed: “Ksi tacḍaḍt i zi třeḥḥfed, ṭṭef i-tt!” Uca netta iccur i-tt s setta n řmudat n imendi uca issarbu tt xas. Xenni yudef ɣar tendint.

16 Tusa-dd nettat ɣar lallas u tanita tesseqsa: “Min teɛnid cem, a yeǧi?” Nettat tḥaja as marra min kis igga weryaz nni. ^□  

17 Tenna: “Setta n řmudat-a n imendi iwca ayi ten, maɣar netta inna: ‘Cem war teggured ca ɣar lallam s ifassen ixwan.’ ”

18 Xenni tenna Naɛumi: “Raja, a yeǧi, qqim da ař ɣa tessned, mammec i ɣa teffeɣ tmesřact. Minzi aryaz nni war ittareyyiḥ ca ař dd-issufeɣ tamesřact ɛad ass-a ɣar uneggar nnes.”