1 Buɛaz igeɛɛed ɣar tewwart n tendint uca iqqim dinni. U xzar, iɛdu-dd umefdi, wenni xef tuɣa issiweř Buɛaz. Xenni netta inna as: “A cek, diha, as-dd ɣar ṭṭarf n webrid u teqqimed danita!” Yusa-dd ɣar ṭṭarf n webrid uca iqqim. 2 Yiwi-dd Buɛaz ɛecra n yeryazen zeg imɣaren n tendint, inna: “Qimem-dd danita!” uca qqimen. 3 Xenni inna i umefdi: “Naɛumi tenni dd-iɛeqben zi temmurt n Mu’ab texs ad tezzenz takirat n yeyyar i tuɣa ɣar umatneɣ Alimalik. 4 Necc xemmeɣ, xseɣ ad cek xas xebbareɣ uca ad ac iniɣ: ‘Seɣ i-tt zzat n imezdaɣ n tendint u zzat n imɣaren n řgens. Mařa texsed ad tt tefdid, fdi tt u mařa war texsed ad tt tefdid, ini ayi t ḥima ad ssneɣ, minzi war da ḥed izemmar ad tt ifdi mɣir cek niɣ d necc u necc i iǧan awarni ac.’ ” Xenni inna netta: “Necc ad tt fdiɣ.”^□  

5 Buɛaz yarni inna: “Deg wass i di i ɣa tesɣed iyyar zeg ufus n Naɛumi, xenni ad tesɣed akides uřa d Raɛut, tamu’abect, tamɣart n wenni immuten, ḥima ad teḥḍid isem n umettin x tesɣart nnes n řwart.” 6 Inna umefdi: “Xenni necc war zemmareɣ ad tt fdiɣ, ḥima war ttḍiyyɛeɣ tasɣart inu. Fdi tt cek i yixef nnek min xafi maḥend ad tt fdiɣ, maɣar necc war zemmarɣ ad tt fdiɣ.”

7 Ammu tuɣa tteggen inni n zman umi ggin ad beddřen iyyar jar asen niɣ umi t fdin, aqa, ḥima ad tewced tamesřact zzat i wudem n marra Israil, aqa aryaz ittekkes sandala nnes uca ittic i-tt i umqarreb nnes. D man aya tuɣa iǧan di Israil. ^■   8 Amefdi inna i Buɛaz: “Seɣ i-t i yixef nnek!” Uca netta ikkes sandala nnes. 9 Xenni Buɛaz inna i marra imɣaren u i marra řgens: “Kenniw d řechud deg wass-a, aqa necc, marra min iǧan n Alimalik u marra min iǧan n Kilyun u n Maḥlun, sɣiɣ t zeg ufus n Naɛumi.

10 Uřa d Raɛut, Tamu’abect, tamɣart n Maḥlun, iwyeɣ tt d tamɣart ḥima ad iqqim isem n wenni immuten x tesɣart n řwart nnes maḥend isem n wenni immuten war ittekkes jar aytmac u zi tewwart n wemcan n tzeddiɣt nnes. Deg wass-a aqa kenniw d řechud.”

11 Marra řgens nni iǧan di tewwart n tendint d imɣaren nnan: “Neccin d řechud! Iři SIDI ad yegg tamɣart nni i d ɣa yadfen taddart nnek am Raḥil d Liya, tinni zzaysent s tnayen tᵉttwagg teddart n Israil. Egg s cḍaret di Ifrata uca ad ittwabarreḥ isem nnek di Bayt-Laḥm! ^□  ■  

12 Taddart nnek tegga am taddart n Fariṣ, wenni turuw-dd Tamar i Yahuda, zeg warraw i d ac ɣa iwc SIDI zi tḥenjirt-a.” ^■  

13 Buɛaz yiwi Raɛut uca nettat tedweř d tamɣart nnes uca yudef xas uca SIDI iwca as ad teksi s ddeyset uca turuw-dd ijj n uḥenjir.

14 Uca nnant timɣarin i Naɛumi: “Ad ittwabarek SIDI wenni war cem ijjin ass-a nhřa ijj n umefdi. Iři ad ittwabarreḥ isem nnes di Israil!

15 Ad ɣarwem yiři am wenni dd-issfaqen řeɛmar nnem uca ad cem iṣun x tewsar nnem, maɣar tasřift nnem, tenni cem ittexsen, turuw i-t-i-dd, aqa nettat teḥřa x sebɛa n iḥenjiren.”

16 Naɛumi teksi aḥenjir, tessars i-t x idmaren nnes u tedweř tessyam i-t.

17 Tajjarin wcint as ijj n yisem, nnant: “I Naɛumi ittwarwuw as-dd ijj n uḥenjir!”, u ggin as Ɛubid. Netta d babas n Yassa, babas n Dawud.

18 Ina d inni dd-ittwarwen zi Fariṣ: Fariṣ ijja-dd Ḥaṣrun, ^■  

19 Ḥaṣrun ijja-dd Ram, Ram ijja-dd Ɛamminadab,

20 Ɛamminadab ijja-dd Naḥcun, Naḥcun ijja-dd Salmun,

21 Salmun ijja-dd Buɛaz, Buɛaz ijja-dd Ɛubid,

22 Ɛubid ijja-dd Yassa d Yassa ijja-dd Dawud.