1 Xenni teẓẓuǧ Ḥanna, tenna:

“Uř inu ittesřiwřiw s řefraḥet di SIDI.

Icc inu ittwasgeɛɛed zi SIDI.

Aqemmum inu yarzem d arzam x řɛedyan inu,

maɣar farḥeɣ x usenjem nnek. ^■  

2 Uřa d ijj ma d amqeddes am SIDI,

maɣar war din iǧi ḥed mɣir Cek

u war din teǧi Teṣḍart am AREBBI nneɣ! ^■  

3 War tarennim tessawařem ammu s nnfaxet,

war dd-tteffiɣ uřa d ca n tuffet n wawař zeg uqemmum nwem,

maɣar SIDI d ijj n AREBBI issen marra,

u timegga nnes ttwaweznent.

4 Řqews n ayt n bu-teɣruḍt ttwarẓen,

maca inni inqarḍen ḥezzmen s jjhed.

5 Inni ijjiwnen arehnen ixef nsen i weɣrum,

maca inni iǧuẓen, war qqimen ɛad ǧuzen.

Tenni war ittirwen turuw-dd sebɛa n iḥenjiren,

maca tenni i ɣar iǧa ubarru n iḥenjiren, tisřaw.^■  

6 AREBBI ineqq u ittic tudart.

Netta isshekkʷwa ɣar řaxart

u issgeɛɛad-dd ssenni. ^■  

7 SIDI ittarra ijj d amezřuḍ u ijj nneɣni yarra i-t d bu-wagřa,

isshekkwa u dd-issgeɛɛad.

8 Řmeskin issekkar i-t zi tɛejjajt

uca řmeskin ijebd i-t-i-dd zeg wefraḍ

maḥend ad t issɣim ɣar tarwa n taṣiřet

u maḥend ad ten ssecnen ijj n řkursi n řɛezz,

minzi dsusa n temmurt iǧan n SIDI

u Netta issbedd xasen ddunect. ^■  

9 Netta i issřeqqan x iṣuraf n imtiqqan nnes,

maca iɛeffanen ad ttwasbekmen di taǧest,

minzi aryaz war ittiři ca d bu teɣruḍt zi tzemmar n yixef nnes.

10 Wenni ittemcubbucen ak-d SIDI, ad ittwarẓ.

Ad xasen isshemhem deg ujenna.

SIDI ad iḥkem tineggura n ddunect.

Ad iwc tizemmar i ujeǧid

uca ad issgeɛɛed icc n lmasiḥ nnes.” ^■  

11 Iɛqeb Ilqana ɛawed ɣar taddart nnes ɣar Rama, maca aḥenjir isexxar i SIDI zzat i wudem n ukehhan Ɛali.

12 Maca tarwa n Ɛali tuɣa d tarwa i war isekkwin. Nitni war ssinen ca SIDI.

13 Ikehhanen nnumen ad ggen ak-d řgens ammu: mařa yiwi ijj n weryaz ict n tɣarṣt, xenni, umi tuɣa ittnenna weysum, yusa-dd ijj n uḥudri n ikehhanen ak-d ict n furcita n třata n icukḍan deg ufus,

14 ijju tt di řburmet niɣ deg uṭenjir niɣ di marmita niɣ di teydurt u marra min ɣa teksi furcita, iksi t ukehhan i yixef nnes. Ammu i t ggin ɣar marra ayt n Israil inni dd-yusin ɣar Cilu.

15 Ammu ɛawed, qbeř ma i ɣa bexxaren tadunt, yusa-dd ijj n uḥudri n ikehhanen, inna i weryaz nni dd-iwyen taɣarṣt: “Ewc ayi aysum ḥima ad t qřiɣ i ukehhan, minzi netta war xak iksi ca aysum ittwanennan, maca mɣir aziza.” ^□  

16 Mařa yarra-dd xas weryaz: “Amezwar ittxeṣṣa ad bexxaren tadunt marra. Xenni ksi min ixs wuř nnek i yixef nnek!”, xenni inna as: “Lla, ittxeṣṣa ad t tewced řexxu, mařa lla, ad t ksiɣ s uɣiř!”

17 Ddenb n iḥudriyyen tuɣa imɣar aṭṭas zzat i wudem n SIDI, maɣar iryazen sseḥqaren tawhibt n řɣiǧet n SIDI.

18 Camwil tuɣa ittsexxar zzat i wudem n SIDI. Netta d ijj n uḥenjir iḥezzmen s yijj n upalṭu n ukehhan n řeqṭen.

19 Yemmas tegga as ijj n useřham uca tᵉttawyi as t-i-dd zeg useggʷas ɣar useggʷas, xmi tgeɛɛad ak-d weryaz nnes ḥima ad tawi din taɣarṣt n kuř aseggʷas. 20 Ibarek Ɛali Ilqana d temɣart nnes, inna: “Iři ad ac iwc SIDI zi temɣart-a ijj n uḥenjir deg wemcan n uḥenjir i ittwattaren, i umi ittwattar i SIDI.” Xenni ɛeqben nitni ɣar wemcan n tzeddiɣt nnes. ^□   21 SIDI maca ixzar ɣar Ḥanna u nettat teksi s ddeyset uca turuw-dd třata n iḥenjiren d tnayen n tḥenjirin, am tuɣa imeqqar Camwil ɣar SIDI.

22 Idweř Ɛali iwsar aṭṭas. Netta isřa x marra min ggin iḥenjiren nnes i marra Israil uca isřa ɛawed aqa nitni ṭṭṣen ak-d temɣarin i tuɣa ittsexxaren ɣar wadaf n Uqiḍun n Umsagar. 23 Netta inna asen: “Mayemmi teggem aya ammu, ařami i ttesřiɣ zi marra řgens-a x tmegga nwem tiɛeffanin? 24 Lla, a iḥenjiren inu, aya war iǧi d ijj n řexbar iḥřa i sřiɣ. Kenniw tᵉttarram řgens-a n SIDI ad iwḍa di xeṭṭu. 25 Mařa ijj n bnadem ixḍa ak-d ijj bnadem nneɣni, xenni ad xas iḥkem AREBBI, maca mařa ijj n bnadem ad ixḍa x SIDI, wi i xas i ɣa iwten?” Maca nitni war sřin ca ɣar babatsen, maɣar SIDI tuɣa ixs ad ten ineɣ. ^□   26 Camwil ameẓyan tuɣa imeqqar uca yarni ittas-dd x řxaḍar i SIDI uřa ɣar iwdan. ^■  

27 Uca yusa-dd ijj n weryaz n SIDI ɣar Ɛali, inna as: “Ammu i iqqar SIDI: ‘Ma war dd-ssecneɣ ixef inu nican i taddart n babac, umi ten tuɣa di Miṣra, di taddart n Firɛun? ^■  

28 Necc farzeɣ t zi marra tiqebbař n Israil d akehhan i Necc maḥend ad igeɛɛed ɣar uɛalṭar inu ḥima ad din issarɣ řebxur u maḥend ad yarḍ apalṭu n ukehhan zzat i wudem inu u Necc wciɣ ɛawed i taddart n babac marra tiɣarṣa n tmessi n ayt n Israil. ^■   29 Mayemmi tɛeffsem kenniw x tɣarṣt inu d tewhibt n řɣiǧet i zi umureɣ maḥend ad tent twehhbem di Tzeddiɣt inu u mayemmi tᵉttweqqarem iḥenjiren nwem aṭṭas xafi umi tmesřem kenniw ixef nwem s mummu n marra tiwhibin n řɣiǧet n řgens inu Israil? ^■   30 S uyenni iqqar SIDI, AREBBI n Israil: ‘Necc nniɣ nican: Taddart nnek d taddart n babac ad uyurent zzat i wudem inu i řebda!’, maca řexxu iqqar SIDI: ‘Aya aqa iggʷej xafi, maɣar inni d ayi ittweqqaren, ad ten weqqareɣ, inni maca i d ayi isseḥqaran, ad ttwaḥesben d imuqřiřen.’ ^■   31 Xzar ad asen wussan, ad qeḍɛeɣ aɣiř nnek d uɣiř n taddart n babac ařami war ittiři ɛad d awessar di taddart nnek. 32 Cek ad texzared belli ad dd-yas ijj n weɣrim n Tzeddiɣt waxxa marra tcuni nni ittegg Netta i Israil, uca ɛemmarṣ ad yiři ijj n uwessar di taddart nnek ɛad, marra ussan. 33 Uca kuř aryaz zzayek, wenni war qeṭṭɛeɣ ca x uɛalṭar inu, ad issiḥeř tiṭṭawin nnek u ad iqqes i řeɛmar nnek u marra tyumi n taddart nnek ad mmten d iryazen.

34 D ta i d ak i ɣa tiři d řeɛřamet, tenni i dd ɣa tas x tnayen n iḥenjiren nnek, Ḥufni d Finaḥas: ad mmten s tnayen deg ijj n wass. 35 Necc maca ad ggeɣ i ixef inu ijj n ukehhan d amtiqqi. Netta ad igg ɛlaḥsab uř d řeɛmar inu. Necc ad as ssbeddeɣ ict n taddart temten uca netta ad yuyur řebda zzat i wudem n lmasiḥ inu. 36 Uca ad imsar, belli marra wi i ɣa iqqimen zi taddart nnek, ad dd-yas ad as yaḍer i yict n tuqiyyat n nnuqart niɣ i yict n tecnift n weɣrum, ad yini: ‘Arni ayi mɣir ɣar ict n řxedmet n tsexxart n ikehhanen, maḥend ad ɣari yiři ijj n uřeqqim n weɣrum i macca.’ ”