1 Camwil ameẓyan tuɣa ittsexxar i SIDI zzat i wudem n Ɛali. Deg wussan nni tuɣa awař n SIDI iqqiǧet. War tuɣi tᵉtteffeɣ ca n tmeẓriwt. 2 Ijj n wass, umi Ɛali iṭṭeṣ deg wemcan nnes, -tiṭṭawin nnes dewřent arxunt u netta tuɣa war izemmar ad ittwařa - , imsar, ^■  

3 qbeř ma ixsi řefnar n AREBBI u Camwil tuɣa iṭṭeṣ di Zzawect n SIDI mani teǧa Ttabut n AREBBI, 4 aqa SIDI iřaɣa i Camwil. Uca netta yarra-dd xas: “Necc aqa ayi da!” 5 Netta yuẓẓeř ɣar Ɛali, inna: “Danita i ǧiɣ, cek třaɣid ayi-dd.” Maca netta inna: “Necc war xak-dd řaɣiɣ ca, ɛqeb, ad tezzřed!” Uca iɛqeb, izzeř.

6 Xenni SIDI iřaɣa i Camwil twařa nneɣnit uca ikkar-dd Camwil, yuyur ɣar Ɛali, inna: “Necc aqa ayi da, minzi cek třaɣid ayi-dd.” Yarra-dd xas netta: “Necc war xak-dd řaɣiɣ ca, mmi, ɛqeb, ad tezzřed!” 7 Camwil ɛad war issin SIDI u awař n SIDI tuɣa ɛad war d as ittwassargeb.

8 Xenni iřaɣa-dd SIDI x Camwil ɛawed i twařa wiss třata u netta ikkar-dd, yuyur ɣar Ɛali, inna: “Necc aqa ayi da, cek třaɣid ayi-dd.” Xenni iḥekkar Ɛali, aqa SIDI tuɣa iřaɣa x uḥenjir 9 uca Ɛali inna i Camwil: “Ruḥ, ad tᵉṭṭṣed! Mařa Netta iřaɣa ac-dd ɛawed, xenni arr xas: ‘Siweř, SIDI, maɣar amsexxar nnek ittesřa!’ ” Uca iɛqeb Camwil, izzeř deg wemcan nnes.

10 Xenni yusa-dd SIDI uca ibedd din uca iřaɣa am twařawin nneɣni: “Camwil, Camwil!” Uca inna Camwil: “Siweř, maɣar amsexxar nnek ittesřa!”

11 SIDI inna i Camwil: “Xzar, Necc ad ggeɣ ca di Israil ařami marra wi xas i ɣa isřen, tnayen n imezzuɣen nnes ad ṭneṭnen. ^■  

12 Deg wass nni ad qefřeɣ marra i Ɛali, zeg umezwaru ɣares ař aneggaru, min zi ssiwřeɣ x taddart nnes. ^■  

13 Minzi Necc ɛeřmeɣ as, aqa Necc ad ḥekmeɣ taddart nnes i řebda x řmuɛṣiyyet min xef issen, minzi řami ssiwḍen iḥenjiren nnes nneɛřet x yixef nsen, netta war ten iṭṭif ca.

14 S uyenni Necc jjuǧeɣ i taddart n Ɛali: ‘War tᵉttwafdi i řebda řmuɛṣiyyet n taddart n Ɛali s tɣarṣt uřa s tewhibt n řɣiǧet!’ ”

15 Camwil iqqim izzeř ař ṣṣbeḥ, xenni yarzem tiwwura n Taddart n SIDI. Camwil iggʷed maca ad iḥaja tameẓriwt i Ɛali.

16 Xenni iřaɣa Ɛali x Camwil, inna: “Camwil, mmi!” Netta yarra-dd xas: “Necc aqa ayi da!”

17 Xenni inna: “Man awař i d ac inna? Ttzawgeɣ cek, war xafi snuffar! Ejj ad ac igg AREBBI ammu niɣ mahu, mařa cek tessnuffared xafi ijj n wawař waha zi marra awařen i kidek issiweř Netta.”

18 Xenni iḥaja as Camwil marra awařen u war xas ten iffar. Uca yarra-dd xas Ɛali: “Aqa-t d SIDI, ejj i-t ad igg min iǧan nican di tiṭṭawin nnes!”

19 Camwil tuɣa imeqqar u SIDI tuɣa-t akides u war ijji uřa d ijjen zi marra awařen nnes ad wḍan ɣar temmurt. 20 Marra Israil, zi Dan ɣares ař Bi’r-Sebɛa, tuɣa ittwařa aqa Camwil tuɣa ittwařeqqem d anabi n SIDI. 21 SIDI iqqim ad dd-iḍhar di Cilu, minzi SIDI issargeb ixef nnes i Camwil di Cilu s wawař n SIDI.