1 Awař n Camwil yiweḍ ɣar marra Israil uca iffeɣ Israil ɣar umsagar ak-d Ifilisṭiniyyen i umenɣi akidsen. Nitni wtin iqiḍan nsen ɣar Abin-Haɛizir, uca Ifilisṭiniyyen wtin iqiḍan nsen ɣar Afiq. ^□   2 Ifilisṭiniyyen sedden ixef nsen i umenɣi ak-d Israil uca umi imeyyeř umenɣi da d diha, ittwaɣelleb Israil zzat i wudem n Ifilisṭiniyyen uca nitni nɣin ɛřaḥař arebɛa-ařaf n yeryazen zi řeṣfuf n řɛeskar nsen deg wazzay n umenɣi. 3 Umi iɛqeb řgens ɣar řmargeḥ n řɛeskar, nnan imɣaren n Israil: “Mayemmi i d aneɣ iwta SIDI ass-a zzat i wudem n Ifilisṭiniyyen? Ejj aneɣ ad neksi Ttabut n Řɛahd n SIDI zi Cilu, ad dd-tas di řwest nneɣ, ḥima ad aneɣ tfekk zeg ufus n řɛedyan nneɣ.” 4 Řgens issekk iryazen ɣar Cilu, iwyen-dd ssenni Ttabut n Řɛahd n SIDI n řɛeskarat, wenni ittɣiman sennej ikiruben. Tuɣa dinni tnayen n iḥenjiren n Ɛali, Ḥufni d Finaḥas, ak-d Ttabut n Řɛahd n AREBBI. ^□  ■   5 Umi dd-tusa Ttabut n Řɛahd n SIDI ɣar řmargeḥ n řɛeskar, imsar, aqa marra Israil isřiwřew s yijj n usřiwřew s jjhed, ařami tarjiji temmurt.

6 Umi sřan Ifilisṭiniyyen i řḥess n usřiwřew, nnan: “Mana řḥess n usřiwřew-a ijehden di řmargeḥ n řɛeskar n Iɛibraniyyen?” Uca nitni fehmen, aqa Ttabut n SIDI tusa-dd di řmargeḥ. 7 Ggʷeden Ifilisṭiniyyen aṭṭas, maɣar nitni nnan: “AREBBI yusa-dd ɣarsen ɣar řmargeḥ n řɛeskar.” Uca nnan: “Ayyaw xaneɣ, maɣar aya ammu ɛemmarṣ war tuɣi imsar! 8 Uct xaneɣ, man wen i d aneɣ ɣa ifekken zeg ufus n irebbiten ijehden? Ina d irebbiten i iwtin Imiṣriyyen s marra jjrayeḥ di řexřa? 9 Iřim tmeḥḍem u iřim d iryazen, kenniw Ifilisṭiniyyen, maḥend war tᵉttsexxarem i Iɛibraniyyen, am mammec nitni i ɣarwem sexxaren. Iřim d iryazen u menɣem!” ^■  

10 Uca ffɣen Ifilisṭiniyyen ɣar umenɣi u ittwaɣřeb Israil. Arewřen nitni, kuř ijj ɣar uqiḍun nnes. Tuɣa d ict n taxessart d tameqqrant aṭṭas, ařami wḍan třatin-ařef n yeryazen x iḍaren zi Israil.

11 Ttabut n AREBBI tᵉttwaḥewwes u tnayen n iḥenjiren n Ɛali, Ḥufni d Finaḥas, mmuten. ^■  

12 Xenni yuẓẓeř ijj n Ubinyamini zeg wazzay n umenɣi, yiweḍ ɣar Cilu deg wass nni simant nnes s warruḍ icarreg uca acař tuɣa x uzeǧif nnes. ^■  

13 Řami yiweḍ netta, iqqim Ɛali x řkursi nnes ɣar tma n webrid, iqceɛ, minzi uř nnes tuɣa ittarjiji zi ssibbet n Ttabut n AREBBI. Umi dd-yusa weryaz maḥend ad t iḥaja di tendint, tesɣuyy tendint marra

14 Umi isřa Ɛali řḥess n usɣuyyi, inna: “Mana řḥess n řharaj-a n řɣaci nni?” Xenni iqeǧeq weryaz uca yusa-dd, iḥaja t i Ɛali.

15 Tuɣa ɣar Ɛali tmenya u-tesɛin n iseggʷusa. Tiṭṭawin nnes dewřent arxunt, ařami war ittwiři ɛad. ^■  

16 Aryaz inna i Ɛali: “Necc usiɣ-dd zeg wazzay n umenɣi. Ass-a arewřeɣ zi řeṣfuf n řɛeskar.” Xenni inna netta: “Min imsaren, a mmi?”

17 Areqqas yarra-dd xas, inna: “Israyil yarweř zzat i wudem n Ifilisṭiniyyen u řgens igga ict n txessart d tameqqrant aṭṭas. Uřa d tnayen n iḥenjiren nnek, Ḥufni d Finaḥas, ttwanɣen u Ttabut n AREBBI tᵉttwaḥewwes.”

18 Umi netta yidar Ttabut n AREBBI, imsar, aqa Ɛali iwḍa ɣar ḍeffar zi řkursi zzat i tewwart. Netta yarreẓ zeg yiri uca iffeɣ as buḥbeř, maɣar aryaz tuɣa iwsar u idqeř. Netta tuɣa d řqaḍi x Israil arebɛin n iseggʷusa.

19 Tasřit nnes, tamɣart n mmis Finaḥas, tuɣa teksi s ddeyset, tuɣa ggur ad dd-taruw. Umi nettat tesřa aqa Ttabut n AREBBI tᵉttwaḥewwes d ɛemmis tuɣa immut uřa d aryaz nnes, xenni tekmummec uca turuw-dd aḥenjir nnes, minzi tuɣa iṭṭef i-tt-i-dd řewjeɛ nnes n tarut. 20 Umi dd-tiweḍ řweqt n řmewt, nnant temɣarin tinni ɣares ibedden: “War tteggʷed ca, cem turwed-dd ijj n uḥenjir.” Maca nettat war xasent tarri ca u uř nnes war tḥekkar. 21 Nettat tegga as i uḥenjir ‘Ikabud’, inna: “Ittwakkes uɛuǧi zi Israil!”, minzi tᵉttwaḥewwes Ttabut n AREBBI uca tegga as ammu uca uřa di ssibbet n ɛemmis nnes d weryaz nnes. 22 Nettat tenna: “Ittwakkes uɛuǧi zi Israil, maɣar Ttabut n SIDI tᵉttwaḥewwes.”