1 Ifilisṭiniyyen ksin Ttabut n AREBBI uca iwyen tt zi Abin-Haɛizir ɣar Acdud. 2 Ifilisṭiniyyen ksin Ttabut n AREBBI uca ssiwḍen tt di taddart n Dajun uca ssarsen tt x uɣezdis n Dajun. 3 Tiwecca nnes umi imezdaɣ n Acdud kkaren zic, Dajun tuɣa iwḍa x uɣembub nnes x temmurt zzat i Ttabut n SIDI. Ksin nitni Dajun, ssbedden t ɛawed deg wemcan nnes. 4 Tiwecca nnes umi dd-kkaren nitni zic ɛawed, xzar, Dajun tuɣa iwḍa ɛawed x uɣembub nnes x temmurt zzat i Ttabut n SIDI, maca azeǧif n Dajun d ifassen nnes s tnayen mmarsen qessen ɣar tnebdat. Mɣir arrimet n Dajun tuɣa teqqim deg wemcan nnes. 5 S uyenni war ɛfisen ikehhanen n Dajun d marra inni i dd-ittasen ɣar taddart n Dajun x tnebdat n Dajun di Acdud ɣares ař ass-a.

6 Afus n SIDI idqeř x imezdaɣ n Acdud. Netta issarɛeb i-ten uca iwta ten s tḥebba, tandint n Acdud d jjwayeh nnes. ^■   7 Umi iryazen n Acdud ẓrin, aqa ammu i imsar, nnan nitni: “Ttabut n AREBBI n Israil war izemmar ad ɣarneɣ iqqim, maɣar afus nnes igga xaneɣ ddqeř uřa x arebbi nneɣ Dajun.” 8 Nitni ssekken iryazen uca ggin ad ssmunen marra řbacat n Ifilisṭiniyyen, nnan: “Min i ɣa negg s Ttabut n AREBBI n Israil?” Nnan nitni: “Ttabut n AREBBI n Israil ad tᵉttwasmuṭṭiy ɣar Jat.” Xenni ssmuṭṭiyen Ttabut n AREBBI n Israil ɣar Jat.

9 Maca awarni i umi t ssmuṭṭiyen, issiweḍ ufus n SIDI ijj n uxarweḍ d ameqqran x tendint nni uca iwta iryazen n tendint, zeg umeẓyan ɣares ař ameqqran, s tḥebba war izemmar ad tent ittwařa ḥed.

10 Xenni ssekken nitni Ttabut n AREBBI ɣar Ɛaqrun. Umi dd-tusa Ttabut n AREBBI ɣar Ɛaqrun, imsar, aqa imezdaɣ n Ɛaqrun sɣuyyen, nnan: “Nitni iwyen-dd Ttabut n AREBBI n Israil ɣari danita, ḥima ad ayi nɣen uřa d řgens inu.”

11 Ssekken iryazen uca ggin ad ssmunen marra řbacat n Ifilisṭiniyyen, nnan: “Siggʷejem Ttabut n AREBBI n Israil, jjem tt ad dd-tedweř ɣar wemcan nnes, ḥima war d ayi ineqq uřa d řgens inu!”, minzi tuɣa din ijj n uqezzeb imɣar di marra tandint uca afus n AREBBI idqeř aṭṭas x Ɛaqrun.

12 Iwdan, inni war immuten, tuɣa ttwawten s tḥebba, ařami aɣuyyi n usɣati n tendint igeɛɛed ɣar ujenna sennej.