1 Umi Ttabut n SIDI tekka sebɛa n iyuren di temmurt n Ifilisṭiniyyen, 2 řaɣan Ifilisṭiniyyen x ikehhanen d igezzanen, nnan: “Min i ɣa negg ak-d Ttabut n SIDI? Secnem aneɣ, mammec tt i ɣa nessekk ɣar wemcan nnes.” 3 Nitni arrin-dd xasen: “Mařa kenniw tessekkem Ttabut n AREBBI n Israil, xenni war tt tessekkem texwa, minzi ittxeṣṣa ad txeǧṣem ict n tewhibt n umarwas i weɛdař. Xenni ad teggenfam uca ad tessnem, mayemmi afus nnes war zzaywem ittekkes.” 4 Xenni nnan nitni: “Man tawhibt n umarwas i d as ɣa nqeddem i weɛdař?” Nitni arrin-dd xasen: “Xemsa n tḥebba n wureɣ d xemsa n iɣardayen n wureɣ, x qedda n řbacat n Ifilisṭiniyyen, minzi kenniw marra teřqef kenniw jjriḥect d icten uřa d řbacat nwem. 5 Ggem řexyařat n tḥebba d řexyařat n iɣardayen nwem, inni yareddǧen tammurt, uca sɛuǧem AREBBI n Israil. Ad taɣ ad issefses afus nnes xawem, x arebbi nwem u x temmurt nwem. 6 Mayemmi i ɣa tessqesḥem uř nwem, am ssqesḥen Imiṣriyyen d Firɛun uř nsen? Umi xasen Netta izeyyar ař aṭṭas, ma nitni war d arxun i ayt Israil u ma nitni war dd-ffiɣen ca xenni? ^■   7 Xenni  řexxu, ksim ijj n ukarru d amaynu, swejdem t s tnayen n tyenduzin ssuṭṭuḍent, war xasent temmars ɛad azayřu u qqnem tiyenduzin ɣar zzat i ukarru u kksem asent zi ḍeffar nsent imeẓyanen nsent u awyem ten ɣar taddart. ^□   8 Xenni ksim Ttabut n SIDI uca sarsem tt x ukarru u sarsem x uɣezdis nnes, deg ict n tecyart, řeqcuɛ n wureɣ i texsem ad as txeǧṣem am tawhibt n umarwas i weɛdař. Sekkem tt, ad traḥ. 9 Ḥḍam maca, mařa Ttabut tgeɛɛed-dd deg webrid ɣar weymir nnes, ɣar Bayt-Cams, xenni d Netta i d aneɣ iwtin s tecti aya tameqqrant, mařa lla, xenni nessen neccin, aqa war iǧi d afus nnes i d aneɣ iřeqfen: aqa tusa-dd amenni waha.”

10 Iryazen ggin tt ammu. Nitni ksin tnayen n tyenduzin ssuṭṭuḍent, qqnen tent ɣar zzat i ukarru uca qqnen imeẓyanen nsen deg uyennir n taddart.

11 Nitni ssarsen Ttabut n SIDI x ukarru, uřa d tacyart n iɣardayen n wureɣ d řexyařat n tḥebba nsen.

12 Tiyenduzin uyurent nican ɣar webrid, uyurent deg webrid n Bayt-Cams, abrid iseggmen. Nitenti qqiment ggurent, am ssmuhrutent, war ḥeyydent x webrid ɣar yeffus uřa ɣar uzeřmaḍ. Řbacat n Ifilisṭiniyyen areddfen tent ɣares ař aymir n Bayt-Cams.

13 Imezdaɣ n Bayt-Cams tuɣa mejjaren ṣṣabet n irden di řewḍa n teɣzurt. Umi ssgeɛɛden nitni tamuɣři nsen, ẓrin Ttabut u farḥen aṭṭas umi tt ẓrin.

14 Akarru tuɣa yiweḍ ɣares ař iyyar n Yacuwa, wenni zi Bayt-Cams, uca ibedd ukarru dinni. Tuɣa dinni ijj n weẓru d ameqqran. Nitni zedmen tifeřwin n ukarru u ssgeɛɛden tiyenduzin d taɣarṣt n wecmaḍ i SIDI.

15 Ilawiyyen ksin Ttabut n SIDI d ṣṣenduq immarsen x uɣezdis nnes i di tuɣa řeqcuɛ n wureɣ u ssarsen aya x weẓru nni ameqqran. Deg wass nni simant nnes ssgeɛɛden yeryazen n Bayt-Cams tiɣarṣa n wecmaḍ i SIDI u qeddmen ɛawed tiɣarṣa.

16 Umi ẓrin xemsa n řbacat n Ifilisṭiniyyen man aya, dewřen-dd ɣar Ɛaqrun deg wass nni simant nnes.

17 Tina d tiḥebba n wureɣ nni ixeǧṣen Ifilisṭiniyyen am tewhibt n umarwas i weɛdař i SIDI: ict i Acdud, ict i Ɣaza, ict i Acqilun, ict n Jat, ict i Ɛakrun.

18 Uřa d iɣardayen n wureɣ x qedda n marra tineddam n Ifilisṭiniyyen tinni iqqnen i xemsa n řbacat, zi tneddam ifaryen s řeḥyuḍ ař dcurat i d as dd-innḍen. Yiweḍ ukarru ɣares ař Abil, aẓru ameqqran min xef tuɣa ssarsen Ttabut n SIDI, tenni i din iqqimen ɣares ař ass-a deg iyyar n Yacuwa zi Bayt-Cams.

19 Netta maca iwta iryazen n Bayt-Cams, minzi nitni tuɣa xzaren Ttabut n SIDI. Netta iwta zi řgens sebɛin n yeryazen xemsin-ařef n yeryazen. Uca icḍen řgens, minzi SIDI tuɣa igga i řgens ict n tecti d tameqqrant. 20 Xenni nnan iryazen n Bayt-Cams: “Wi izemmaren ad iqqim ibedd zzat i wudem n SIDI, AREBBI d amqeddes wa? D ɣar man wen zzayneɣ i ɣa yuyur netta?” 21 Nitni ssekken ireqqasen ɣar imezdaɣ n Qaryat-Yaɛarim, nnan: “Ifilisṭiniyyen arrin-dd Ttabut n SIDI. Hwam uca ssgeɛɛdem tt ɣarwem sennej!”