1 Xenni usin-dd yeryazen n Qaryat-Yaɛarim uca iwyen Ttabut n SIDI ɣarsen sennej. Nitni ssidfen tt di taddart n Abinadab, x tewrirt, uca qeddsen mmis Aliɛazar ḥima ad iḥḍa x Ttabut n SIDI. ^■   2 Zeg wass nni imsar aqa Ttabut teqqim di Qaryat-Yaɛarim. Tuɣa ɛdun aṭṭas n wussan ařami ɛdun ɛicrin n iseggʷusa. Marra taddart n Israil tuyur awarni i SIDI tᵉttcetca. 3 Xenni inna Camwil i marra taddart n Israil, inna: “Mařa kenniw texsem ad dd-tdewřem ɣar SIDI s marra uř nwem, xenni nḍarem xawem irebbiten iɣriben zi řwest nwem, uřa d Ɛactarutin, u arrem uř nwem ɣar SIDI, xedmem as i Netta weḥḥdes, xenni Netta ad kenniw issenjem zeg ufus n Ifilisṭiniyyen.” ^■  

4 Uca nḍaren ayt n Israil Ibaɛlen d Actarutin uca ɛebden i SIDI weḥḥdes. 5 Inna Camwil: “Smunem marra Israil di Miṣfat, xenni necc ad ẓẓaǧeɣ i SIDI i kenniw.” 6 Munen di Miṣfa uca uymen nitni aman, farrɣen ten zzat i wudem n SIDI. Deg wass nni ẓummen uca nnan din: “Aqa nexḍa ak-d SIDI!” Ammu i iḥkem Camwil ayt n Israil di Miṣfa. 7 Umi Ifilisṭiniyyen sřin, aqa ayt n Israil tuɣa munen di Miṣfat, ffɣen řbacat n Ifilisṭiniyyen ḍidd i Israil. Řami sřin ayt n Israil i mana wenni, ggʷeden nitni zeg Ifilisṭiniyyen. 8 Nnan ayt n Israil i Camwil: “War sbeddi s uřaɣi di ṭṭweɛ nneɣ i SIDI, AREBBI nneɣ, maḥend Netta ad aneɣ ifekk zeg ufus n Ifilisṭiniyyen.” 9 Xenni iksi Camwil ijj n izmar iṭṭeḍ u iqeddem i-t qaɛ d taɣarṣt n wecmaḍ i SIDI u Camwil iřaɣa ɣar SIDI di ṭṭweɛ n Israil u SIDI isřa as.

10 Umi iqeddem Camwil taɣarṣt n wecmaḍ, imsar, aqa usin-dd Ifilisṭiniyyen i umenɣi ak-d Israil. Uca igga SIDI aduqqez n wajjaj iwɛaren deg wass nni x Ifilisṭiniyyen, issarjef i-ten ařami ttwaɣeřben zzat i wudem n Israil. ^■  

11 Ffɣen yeryazen n Israil zi Miṣfa, ḍfaren Ifilisṭiniyyen uca wtin ten ɣares ař sadu Bayt-Kar.

12 Iksi Camwil ijj n weẓru, issbedd i-t jar Miṣfa d San. Netta igga as isem ‘Abin-Haɛizir’, inna: “Ɣares ař danita i d aneɣ iwca SIDI afus nnes.” ^□  ■  

13 Ammu i ttwaseḥqaren Ifilisṭiniyyen uca war udifen ca ɛad daxeř i iymiren n Israil, minzi tuɣa afus n SIDI ḍidd i Ifilisṭiniyyen marra ussan n Camwil.

14 Tineddam zi Ɛaqrun ař Jat, i tuɣa ṭṭfen Ifilisṭiyyen, dewřent-dd ɣar Israil uca jjwayeh i ɣarsen dd-iqqnen, iqřeɛ i-tent Israil zeg ufus n Ifilisṭiniyyen uca idweř din řehna jar Israil d Imuriyyen.

15 Tuɣa Camwil d řqaḍi x Israil marra ussan n tudart nnes.

16 Aseggʷas x useggʷas tuɣa netta itteffeɣ, iggur di Bayt-Il d Jiljal d Miṣfa. Di marra imucan nni tuɣa netta d řqaḍi x Israil.

17 Awarni aya idweř netta ɣar Rama, maɣar dinni i tuɣa taddart nnes u dinni i tuɣa netta řa d řqaḍi x Israil uca ibna dinni ijj n uɛalṭar i SIDI. ^■