1 Umi idweř Camwil iwsar, imsar, aqa igga iḥenjiren nnes d řquḍat x Israil. 2 Mmis amezwaru tuɣa qqaren as Yuwil u wenni wiss tnayen qqaren as Abiya. Nitni tuɣa aten d řquḍat di Bi’r-Sebɛa. 3 Maca iḥenjiren nnes war aredfen ibriden nnes. Nitni arezzun x arbeḥ i yixef nsen, ṭṭfen arriɣalut u ssfarrɣen řḥeqq. ^■   4 Xenni munen marra imɣaren n Israil, usin-dd ɣar Camwil di Rama. 5 Nitni nnan as: “Xzar, cek tewsared u iḥenjiren nnek war gguren ca x tebridin nnek. S uya egg řexxu ijj n ujeǧid xaneɣ maḥend ad xaneɣ iḥkem, am mammec iǧa ɣar marra řegnus nneɣni.” ^■  

6 Awař-a iǧa d aɛeffan di tiṭṭawin n Camwil, řami nnan: “Ewc aneɣ ijj n ujeǧid maḥend ad xaneɣ iḥkem!” Uca Camwil iẓẓuǧ i SIDI. ^■   7 Inna SIDI i Camwil: “Seř ɣar řgens di marra min i d ac ɣa inin, maɣar war iǧi d cek i inḍaren nitni, maca d Necc i inḍaren nitni, ḥima Necc war ttiřiɣ d ajeǧid xasen. ^□   8 Nitni tteggen akides am mammec kidi ggin s marra timegga nsen zeg wass i ten dd-ssgeɛɛdeɣ Necc zi Miṣra ɣares ař ass-a. Nitni semḥen d ayi uca sexxaren i irebbiten nneɣni. Ammu i dayek tteggen nitni ɛawed. 9 Seř řexxu ɣarsen, maca ɛřem asen nican uca sargeb i-ten s řḥeqq n ujeǧid wenni i xasen i ɣa iḥekmen.” ^□  

10 Issiweř Camwil marra awařen n SIDI ak-d řgens nni i zzayes ittaren ijj n ujeǧid.

11 Netta inna: “Aya i ɣa yiři d řḥeqq n ujeǧid i xawem i ɣa iḥekmen: netta ad yawi iḥenjiren nwem, ad ten yarr i yixef nnes ɣar ikarruten nnes u d imnayen nnes u ḥima ad uyuren ɣar zzat i ikarruten nnes.

12 Netta ad ten igg i yixef nnes d imeqqranen x ařef uřa d imeqqranen x xemsin, u ḥima ad carzen iyyaren nnes u ḥima ad mjaren ṣṣabet nnes, u ḥima ad ggen dduzan n umenɣi nnes d dduzan n ikarruten nnes.

13 Yessitwem ad tent-i-dd yawi maḥend ad as ggent fumaḍat, ad ssnennant u ad ggʷent.

14 Ad iksi mummu n iyyaren nwem d n imarjaɛen nwem n uḍiř d iḥwicen n tazart nwem, ad ten iwc i imsexxaren nnes.

15 Ad iksi řeɛcur n zzariɛet nwem u n imarjaɛen nwem n uḍiř u ad ten iwc i imsexxaren nnes icenɛen u i imsexxaren nnes inneɣni.

16 Ad iksi isemɣan d tiyyiwin nwem d iḥudriyyen nwem iṣebḥen d iɣyař nwem uca ad ten yejj ad as xedmen.

17 Ad iksi řeɛcur n tḥimriwin nwem u kenniw ad tiřim d imsexxaren nnes.

18 Deg wass nni ad tesɣuyyem zzat i wudem n ujeǧid nwem i texḍarem kenniw, maca SIDI war d awem ittesři ca deg wass nni.”

19 Maca řgens war ixs ad iseř ɣar Camwil, nnan: “Lla, ittxeṣṣa ad xaneɣ yiři ijj n ujeǧid.” 20 Uřa d neccin ad niři am řegnus nneɣni marra, u ajeǧid nneɣ ad xaneɣ iḥkem s řḥeqq. Netta ad yizwar zzat i wudem nneɣ uca ad issuyur imenɣan nneɣ.” 21 Umi isřa Camwil i marra awařen n řgens, inna ten deg imezzuɣen n SIDI. 22 SIDI inna i Camwil: “Seř ɣarsen, egg xasen ijj n ujeǧid!” Xas uca inna Camwil i yeryazen n Israil: “Ejj ad yuyur kuř ijj ɣar tendint nnes.” ^□