1 Tuɣa din ijj n weryaz zi Binyamin, qqaren as Qis, mmis n Abiyil, mmis n Ṣarur, mmis n Bakurat, mmis n Afiyaḥ, ijj n Ubinyamini, ijj n weryaz s wagřa aṭṭas. ^■   2 Netta tuɣa ɣares ijj n mmis, qqaren as Cawul. Tuɣa-t d ameẓyan u dayes aẓri. Uřa d ijj n weryaz jar ayt n Israil war tuɣi dayes aẓri am netta. Netta yujar marra řgens s tiddi n uzeǧif. 3 Tuɣa tiɣyař n Qis, babas n Cawul, weddarent. Xenni inna Qis i mmis Cawul: “Ksi ijjen zeg iḥudriyyen, awyi t akidek uca kkar, arzu x teɣyař.” 4 Netta ikka x idurar n Ifrayim uca ikka x temmurt n Calica, war tent ufin maca. Xas uca kkin nitni x temmurt n Caɛalim, uřa war tent ufin dinni. Xenni kkin x temmurt n Binyamin, war tent ufin dinni ɛawed. 5 Umi iwḍen nitni ɣar temmurt n Ṣuf, inna Cawul i uḥudri nnes nni tuɣa akides: “As-dd, ad neɛqeb, niɣ baba war ikessi ɛad s wemnus di teɣyař, maca dayneɣ.” 6 Wanita yarra-dd xas: “Xzar xenni, aqa ijj weryaz n AREBBI izeddeɣ di tendint-a. Aqa-t d ijj n weryaz d amcenneɛ. Marra min iqqar, itteffeɣ-dd nican. Ejj aneɣ ad ɣares nraḥ dinni, xenni ad taɣ ad aneɣ isscen abrid i ittxeṣṣan ad dayes nuyur.” 7 Xenni inna Cawul i uḥudri nnes: “Maca xzar, mařa nraḥ, min ɣa nawi xenni i weryaz nni? Maɣar aɣrum jar řeḥwayej nneɣ iruḥ. Neccin war ɣarneɣ aɣiralut i nzemmar ad newc i weryaz n AREBBI. Niɣ min ɣarneɣ nneɣni?” 8 Yarra-dd uḥudri ɛawed x Cawul, inna: “Xzar, necc ɣari da ɛad ijj n arbeɛ n uciql n nnuqart. Ad t wceɣ i weryaz n AREBBI, maḥend netta ad aneɣ isscen abrid.” 9 - Zic tuɣa iqqar weryaz di Israil, mařa tuɣa iffeɣ ḥima ad isseqsa AREBBI: “Asem-dd, ad nuyur ɣar umwařaw!”, maɣar anabi n wass-a, zic qqaren as ‘amwařaw’. - ^□  ■  

10 Inna Cawul i uḥudri nnes: “Awař nnek iṣbeḥ! As-dd, ejj aneɣ ad nuyur!” Nitni uyuren ɣar tendint mani iǧa aryaz n AREBBI.

11 Umi geɛɛden nitni tsawent n tendint msagaren ak-d tḥenjirin tinni dd-iffɣen maḥend ad ayment aman uca nnan asent: “Ma amwařaw da?”

12 Nitenti arrin tt-i-dd xasen, nnant: “Xzar, netta aqa-t diha ɣar zzat. Deɣyat maca, maɣar netta yusa-dd ass-a ɣar tendint, minzi řgens ass-a ad igg ict n tɣarṣt x řgeɛɛdet.

13 Xmi i ɣa tadfem ɣar tandint, ad t tafem qbeř ma ad igeɛɛed ɣar řgeɛɛdet ḥima ad imun i macca, maɣar řgens war ittett mařa war dd-yusi netta, minzi netta ad igg lbaraka di tɣarṣt, xenni ɛad ad ccen inewjiwen. Řexxu xenni, geɛɛdem, minzi ass-a aqa-t d lfurṣa, ad t tafem nican!” ^□  

14 Nitni geɛɛden ɣar tendint uca umi iwḍen ɣar řwest n tendint, xzar, iffeɣ-dd ɣarsen Camwil, imsagar akidsen maḥend ad iggur ɣar řgeɛɛdet.

15 Minzi ijj n wass qbeř ma ad dd-yas Cawul, SIDI issargeb as i Camwil deg umezzuɣ, inna: ^■  

16 “Tiwecca ammu di řweqt-a, ad ɣarek ssekkeɣ ijj n weryaz zi temmurt n Binyamin. Ad t tdehned d ameḥday i řgens inu Israil. Netta ad ifekk řgens inu zeg ufus n Ifilisṭiniyyen, maɣar necc ẓriɣ řgens inu Israil u tɣuyyit nsen i usɣati tiweḍ-dd ɣari.”

17 Umi Camwil iẓra Cawul, yarra-dd xas SIDI: “Xzar, d wa d aryaz i x i d ac nniɣ: ‘Wa ad iḥkem x řgens inu.’ ”

18 Yuyur Cawul ɣar Camwil di řwest n tewwart n tendint inna: “Scen ayi mani teǧa taddart n umwařaw.”

19 Yarra-dd Camwil x Cawul, inna: “Necc d amwařaw. Uyur ɣar zzat i wudem inu x řgeɛɛdet, ḥima kenniw ad kidi teccem ass-a. Tiwecca zic ad cek jjeɣ ad teɛdud u necc ad cek ssargbeɣ x marra min iǧan deg wuř nnek. 20 X teɣyař i d ac iweddaren ass-a ɛad třata n wussan zeg wami, war dayek ittiři bu wemnus. Nitenti ttwafent. Maca wi i ɣar ittraḥ marra meẓri n Israil? Ma war iǧi ɣarek u ɣar marra taddart n babac?” 21 Xenni yarra-dd Cawul, inna: “Ma war ǧiɣ necc zeg ayt n Binyamin, zi tmeẓyant qaɛ n tqebbař n Israil? Ma war teǧi řaǧ inu tamuqřiřt qaɛ zi marra řaǧat n teqbič n Binyamin? Mayemmi i d ayi tessawařed awařen am ina?” 22 Camwil iksi Cawul d uḥudri nnes akides, issidef i-ten deg wexxam n arwa, issɣim i-ten deg wemcan amezwaru jar inewjiwen. Tuɣa nnyarwen amenni třatin n yeryazen.

23 Xenni inna Camwil i ugezzar: “Awi-dd řexxu tasɣart i d ac wciɣ, tenni x d ac nniɣ: ‘Ejj i-tt ɣarek!’ ” 24 D agezzar issgeɛɛed taɣruḍṭ ak-d marra min xas iǧan, issars i-tt zzat i Cawul, inna: “Xzar, aya min iceṭṭen. Egg i-tt zzatek ad tecced, minzi ittwaḥḍa i tsaɛɛet-a, umi nniɣ: ‘Necc ɛarḍeɣ x řgens.’ ” Uca icca Cawul ak-d Camwil deg wass nni. 25 Xenni hwan-dd nitni zi řgeɛɛdet ɣar tendint u netta issiweř ak-d Cawul x tzeqqa.

26 Kkaren zic, uca imsar, ɣar řefjar n wass, aqa iřaɣa-dd Camwil x Cawul i tuɣa iǧan x tzeqqa, inna: “Kkar, necc xseɣ ad cek ssqebbḍeɣ!” Xenni ikkar Cawul uca ffɣen s tnayen idsen ɣar barra, netta ak-d Camwil. 27 Umi dd-hwan nitni ař ṭṭarf n tendint, inna Camwil i Cawul: “Ini i uḥudri ad ibeɛɛed zzat i wudem nneɣ!” Xenni iggʷej netta. Xenni inna Camwil: “Qqim řexxu, bedd da u necc ad ac iniɣ awař n AREBBI.”