1 Uca xas iksi Camwil taziyyat n zzect, iseyyeb i-tt x uzeǧif nnes, issudem i-t, inna: “Ma xenni SIDI war cek idhin d ameḥḍay x řwart nnes? ^■   2 Xmi xafi i ɣa tuyured ass-a, ad tafed ɣar wenḍeř n Raḥil di Ṣalṣaḥ di temmurt n Binyamin tnayen n yeryazen u nitni ad ac inin: ‘Tiɣyař i x tuɣa tarezzud, ttwafent uca babac ismeḥ di tmesřact n teɣyař, maca netta dayes řexxu amnus xawem, iqqar: Min i ɣa ggeɣ x mmi?’ ” 3 Ssenni ad tarnid ad tuyured uca ad tawḍed ɣar tcejjart n yigg n Tabur. Dinni i ɣa temmeřqid ak-d třata n yeryazen nni ittgeɛɛaden ɣar SIDI ɣar Bayt-Il. Ijjen iggur ad yarbu třata n iɣayḍen imeẓyanen, ijjen iggur ad yarbu třata n tecnifin u ijjen iggur ad yarbu ijj n txancet n binu. 4 Nitni ad sseqsan x umeddur nnek uca ad ac wcen tnayen n tecnifin i ɣa tᵉṭṭfed zeg ufus nsen. ^■   5 Awarni as ad dd-tased ɣar tendint n Jibɛa n AREBBI mani beddent tecbarin n tɛessast n Ifilisṭiniyyen. Xmi dinni i ɣa tawḍed ɣar tendint, ad imsar ad temmeřqid ak-d ict n kula n inabiyyen, inni dd-ihwan zi řgeɛɛdet, uca zzatsen lharpa d ubendir d tẓamart d řgambri am ttnebban nitni. ^■   6 Ad xak dd-ihwa Arruḥ n SIDI u cek ad tnebbad akidsen uca ad tdewřed d ijj n bnadem nneɣni. 7 Ad imsar xmi ɣarek i dd ɣa yasen řeɛřamat-a, aqa ad xak yiři ḥima ad tegged min ɣa yaf ufus nnek, minzi AREBBI aqa-t akidek. 8 Ad ayi tizwared ad dd-tehwid ɣar Jiljal, u xzar, necc ad dd-hwiɣ ɣarek ḥima ad din ssgeɛɛdeɣ tiɣarṣa n wecmaḍ d tɣarṣa n řehna. Sebɛa n wussan i din i ɣa trajid ɣares ař dd ɣarek i ɣa yaseɣ, ad ac dd-barrḥeɣ min ɣa tegged.” ^■  

9 Umi issneqřeb aɛrur nnes ḥima ad yuyur x Camwil, imsar aqa AREBBI ibeddeř uř nnes deg ijj n wuř nneɣni. Marra řeɛřamat-a imsaren deg wass nni simant nnes.

10 Umi iwḍen nitni ɣar Jibɛa, aqa iřqa i-t ijj n kula n inabiyyen uca Arruḥ n AREBBI ihwa-dd xas uca netta innebba di řwest nsen. ^■  

11 Uca imsar, aqa marra inni tuɣa t issnen iḍennaḍ d fariḍennaḍ, ẓrin, tuɣa-t ittnebba ak-d inabiyyen, uca řgens inna jar asen: “Min yuɣin mmis n Qic? Ma uřa d Cawul jar inabiyyen?”

12 Ijj n weryaz ssenni yarra-dd, inna: “Man wen iǧan d babatsen?” Ammu i iqqim wawař-a ittwassnen: “Ma uřa d Cawul jar inabiyyen?” ^■  

13 Umi issbedd ittnebba, yusa-dd ɣar řgeɛɛdet.

14 Ɛzizis n Cawul inna as uřa i uḥudri nnes: “Mani tuɣa tᵉttrahem kenniw?” Netta yarra-dd xas: “Narezzu x teɣyař. Xenni neẓra, aqa nitenti war dinni ǧint, niweḍ ɣar Camwil.”

15 Xenni inna ɛemmis n Cawul: “Ini ayi, ɛafak, min d awem inna Camwil?”

16 Cawul yarra-dd x ɛzizis: “Netta inna aneɣ nican, aqa tiɣyař ttwafent.” Tamesřact n tgelda maca i x tuɣa issiweř Camwil, war d as tt iɛiwed ca.

17 Camwil iřaɣa-dd i řgens ɣar SIDI di Miṣfa.

18 Netta inna i ayt n Israil: “Ammu i iqqar SIDI AREBBI n Israil: ‘Necc ssufɣeɣ-dd Israil zi Miṣra u fekkeɣ kenniw zeg ufus n Imiṣriyyen u zeg ufus n marra tigeldiwin nni kenniw iḥṣaren.

19 Kenniw maca tenḍarem SIDI nwem ass-a, wenni tuɣa kenniw ifekken zi marra zzɛaf nwem u zi marra řeḥṣarat. Kenniw tennam as: Egg ijj n ujeǧid xaneɣ! Xenni řexxu, beddem zzat i wudem n SIDI ɛlaḥsab tiqebbař nwem d řuřuf nwem!’ ” ^■   20 Camwil ijja marra tiqebbař n Israil ad dd-qarrbent uca taqbič n Binyamin tᵉttwakkes zzaysent ^■   21 Xas uca tessqarreb-dd teqbič n Binyamin ɛlaḥsab řaǧat nnes uca tᵉttwakkes zzayes řaǧ n Matri u xenni ittwakkes zzayes Cawul, mmis n Qic. Arzun xas, maca war zemmaren ad t afen. 22 Nitni sseqsan SIDI ict n twařa nneɣnit: “Ma dd-yusa danita ca n ijj nneɣni?” SIDI yarra-dd: “Xzar, netta iffar jar ɣar řeqcuɛ n usafar.” 23 Nitni uẓẓřen din, iwyen t-i-dd ssenni. Umi dd-yusa netta ibedd jar řgens, yujar netta marra řgens s tiddi n uzeǧif. ^■   24 Inna Camwil i marra řgens: “Ma teẓrim řexxu man wen ifarz SIDI? Uřa d ijjen zi řgens war dayes yarwis.” Uca isřiwřew marra řgens, nitni nnan: “Tudart i ujeǧid!”

25 Camwil isscen i řgens řḥeqq n tgelda, yura i-t deg ijj n wedlis uca issars i-t zzat i wudem n SIDI. Xenni yarxu Camwil i marra řgens, kuř ijj ɣar taddart nnes. 26 Uřa d Cawul yuyur ɣar taddart nnes ɣar Jibɛa uca iruḥ akides wezyen n řɛeskar nni tuɣa iḥada SIDI uř nsen. ^■   27 Maca ayt i war isekkwin nnan: “Mammec i d aneɣ ɣa ifekk weryaz-a?” U nitni sseḥqaren t u war d as dd-iwyen ca tarzeft. Netta maca igga axmi war ittesři. ^■