1 Xenni iffeɣ-dd Naḥac, Aɛammuni, uca inneḍ s řɛeskar nnes i tendint n Yabic di Jilɛad. Marra iryazen n Yabic nnan i Naḥac: “Egg ijj n řɛahd akidneɣ uca xenni ad ac nsexxar.” ^□   2 Maca Aɛammuni Naḥac, inna asen: “X webrid-a necc akidwem ggeɣ řɛahd, necc ad awem-dd qeřɛeɣ marra tiṭṭ tafusect, ad tt ggeɣ d řefḍiḥet x marra Israil.” 3 Imɣaren n Yabic nnan: “Ejj aneɣ sebɛa n wussan, ḥima ad dd-nessekk ireqqasen ɣar marra tammurt n Israil. Mařa war nufi uřa d ijj i d aneɣ ɣa issnejmen, xenni ad ɣarek dd-neffeɣ.”

4 Umi dd-iwḍen ireqqasen ɣar Jibɛa n Cawul, ssiwḍen-dd nitni awařen-a ɣar imezzuɣen n řgens u marra řgens issgeɛɛed tmijja nnes uca run nitni. 5 U xzar, Cawul yusa-dd awarni i ifunasen nnes zeg iyyar, inna: “Min yuɣin řgens ittru ammu?” Nitni ḥajan as awařen n yeryazen n Yabic. 6 Ihwa-dd Arruḥ n AREBBI x Cawul umi isřa awařen-a uca yarɣa uxeyyeq nnes aṭṭas. 7 Netta iksi ijj n uzayřu n ifunasen, iqeṭṭes i-ten d iceǧiqen, issekk iceǧiqen s ufus n ireqqasen ɣar marra tammurt n Israil, inna: “Wenni war iffiɣen awarni i Cawul u awarni Camwil ɣar umenɣi, xzar, ammu i ɣa ittwagg ak-d ifunasen d tfunasin nnes.” Xenni tewḍa-dd tiggʷudi n SIDI x marra řgens uca ffɣen munen am ijj n weryaz. ^■   8 Isedd i-ten Cawul di Bazaq. Tuɣa-ten di teřt-mya-ařef zeg ayt n Israil u třatin-ařef n yeryazen zi Yahuda. 9 Nitni nnan i ireqqasen nni tuɣa dd-yusin: “Ad tinim aya i yeryazen n Yabic di Jilɛad: ‘Tiwecca, xmi i ɣa tiři tfuct tařɣa, ad tᵉttwasnejmem.’ ” Umi iwḍen ireqqasen, ɛawden tt i yeryazen n Yabic uca farḥen nitni.

10 Nnan yeryazen n Yabic: “Tiwecca ad ɣarek dd-neffeɣ uca xenni tzemmarem akidneɣ tᵉtteggem, min tᵉttwařam kenniw mliḥ.”

11 Tiwecca nnes imsar, aqa Cawul ibḍa řgens x třata n tmunitin u ɣar tuffut n ṣṣbeḥ udfen di řmargeḥ n řɛeskar, wtin ayt n Ɛammun, ɣar tuffut n wass. imsar aqa inni iqqimen ttwabezzɛen ařami war iqqim uřa d tyuya zzaysen ak-d wayawya.

12 Xenni inna řgens i Camwil: “Man wen i innan: ‘Ma Cawul ad xaneɣ yiři d ajeǧid?’ Awyi ten-dd danita, ḥima ad ten neneɣ.” ^■  

13 Maca Cawul inna: “Deg wass-a uřa d ijjen war ittwaneɣ, maɣar ass-a SIDI issiweḍ-dd asenjem ɣar Israil.”

14 Inna Camwil i řgens: “Ejj aneɣ ad nuyur ɣar Jiljal, ad dinni nřeqqeḥ tagelda.”

15 Xenni yuyur marra řgens ɣar Jiljal u nitni ggin dinni di Jiljal Cawul d ajeǧid zzat i wudem n SIDI. Ɣarṣen tiɣarṣa n řehna zzat i wudem n SIDI uca ifarḥ Cawul aṭṭas ak-d marra iryazen n Israil.