1 Xenni inna Camwil i marra Israil: “Xzar, necc sřiɣ ɣarwem di marra min i d ayi tennam u necc ggiɣ ijj n ujeǧid xawem. ^□   2 Uca řexxu, xzar, ajeǧid iruḥ zzat i wudem nwem. Necc wsareɣ, dewřeɣ cabeɣ, u xzar, iḥenjiren inu aqa aten jar awem. Zi temẓi inu ɣares ař ass-a necc ggureɣ zzat i wudem nwem. 3 Aqa ayi necc da. Cehdem xafi zzat i SIDI u zzat i lmasiḥ nnes. I umi iwyeɣ ca n ufunas? I umi iwyeɣ ijj n weɣyuř? Man wen i ḥṣareɣ u man wen i ɣezziɣ u zi man wen i ṭṭfeɣ ṭṭmeɛ maḥend ad qqneɣ tiṭṭawin inu? Necc ad awem t arreɣ.” 4 Nitni arrin-dd xas: “Cek war d aneɣ teḥṣared ca u war d aneɣ tɣezzid u war tᵉṭṭifed uřa d ict n řḥajjet zi ca n yijjen.” 5 Xenni inna asen: “SIDI d acehhad xawem u lmasiḥ nnes d acehhad ass-a, aqa kenniw war tufim uřa d ict n řḥajjet deg ufus inu!” Inna řgens: “Aqa-t d acehhad!”

6 Inna Camwil i řgens: “D SIDI i tuɣa iggin Musa d Harun u Netta i dd-issuffɣen ibabaten nwem zi Miṣra. 7 Xenni řexxu, beddem-dd ɣari maḥend ad awem ssecneɣ řḥeqq zzat i wudem n SIDI, marra timegga iseggden n SIDI tinni igga i kenniw u i ibabaten nwem. 8 Umi dd-yusa Yaɛqub ɣar Miṣra, sɣuyyen ibabaten nwem ɣar SIDI u SIDI issekk-dd Musa d Harun uca nitni ssuffɣen-dd ibabaten nwem zi Miṣra u sszedɣen ten deg wemcan-a. ^■   9 Maca nitni ttun SIDI, AREBBI nsen. Xenni netta izzenz i-ten i Sisara, akumandar n řɛeskar, di Ḥaṣur, u i Ifilisṭiniyyen u i ujeǧid n Imu’abiyyen, inni tuɣa akidsen immenɣen. ^■  

10 Uca sɣuyyen ɣar SIDI, nnan: ‘Neccin nexḍa, maɣar neccin nesmeḥ di SIDI, nsexxar i Ibaɛlen d Actarutin. U řexxu, senjem aneɣ zeg ufus n řɛedyan nneɣ uca ggur ad Cek nsexxar.’

11 Xas uca issekk-dd SIDI Yarubaɛal d Badan d Yaftaḥ d Camwil u Netta issenjem kenniw zeg ufus n řɛedyan nwem i d awem dd-innḍen, ařami tzeddɣem kenniw di řaman. ^■  

12 Umi teẓrim kenniw Naḥac, ajeǧid n ayt n Ɛammun, iffeɣ-dd ɣarwem, tennim ayi kenniw: ‘Lla, minzi ad xaneɣ yiři ijj n ujeǧid!’, waxxa maca SIDI, AREBBI nwem, d Ajeǧid nwem. ^■  

13 Řexxu, xzar, aqa ajeǧid nwem wenni i tixḍarem, wenni tuɣa tᵉttrajam. Aqa SIDI igga i-t d ajeǧid xawem. ^■  

14 Mařa kenniw tᵉtteggʷedem SIDI, ad as tsexxarem u ad tesřam i tmijja nnes u war ttɣewwɣem x min dd-iffɣen zeg uqemmum n SIDI, xenni kenniw, iwa kenniw d ujeǧid nwem wenni i xawem i ɣa iḥekmen, ad tiřim di řaman ɣar ḍeffar n SIDI, AREBBI nwem. ^■  

15 Mařa kenniw maca war tesřim ɣar tmijja n SIDI, ad tɣewwɣem x min dd-iffɣen zeg uqemmum n SIDI, xenni afus n SIDI ad xawem yiři am t tuɣa x ibabaten nwem.

16 Xenni řexxu, beddem kenniw, u xzarem řxedmet tameqqrant i d ɣa igg SIDI zzat i tiṭṭawin nwem.

17 Ma war iǧi ass-a ṣṣabet n irden? Necc ad řaɣiɣ ɣar SIDI u Netta ad iwc ajjajen d wenẓar ař ɣa tessnem u ad tẓarem mechař imɣar řɣar i teggim zzat i tiṭṭawin n SIDI maḥend ad as tᵉttarem ijj n ujeǧid i yixef nwem.”

18 U Camwil iřaɣa ɣar SIDI u SIDI issekk-dd deg wass nni ajjajjen d wenẓar uca marra řgens teřqef i-t tiggʷudi d tameqqrant zi SIDI u zi Camwil.

19 Marra řgens inna i Camwil: “Ẓaǧ i imsexxaren nnek ɣar SIDI, AREBBI nnek, maḥend war nettmetti ca, maɣar neccin ɣar marra ddnub nneɣ ɛad narni-dd tuɛeffna-ya, belli narzu ijj n ujeǧid i neccin.”

20 Xenni inna Camwil i řgens: “War teggʷdem ca! Kenniw teggim marra tuɛeffna-ya, maca war ttḥeyyadem ɛad x umeḍfur n SIDI, maca sexxarem i SIDI s marra uř nwem. 21 War ttḥeyyadem ca, minzi xenni ad taf tḍaffarem min ixřan, timesřayin nni war ineffɛen u war ssenjiment, minzi nitenti xwant. 22 Minzi SIDI war isemmeḥ di řgens nnes di ṭṭweɛ n Yisem nnes ameqqran, maɣar SIDI igga ad kenniw igg d řgens i yixef nnes. 23 Min d ayi icqan, ɛemmarṣ ad xḍiɣ ak-d SIDI umi ssbeddeɣ tẓaǧit akidwem, maca necc ad awem ssecneɣ abrid iṣebḥen d wenni iseggmen. 24 Ɣar, mařa ggʷedem SIDI waha u sexxarem xas s řmanet s wuř nwem marra, maɣar ma war iggi Netta jar awem marra timesřayin nni imɣaren! 25 Maca mařa kenniw ad tarnim ad teggem tuɛeffna, xenni řa d kenniw uřa d ajeǧid nwem ad tᵉttwahellkem.”