1 Tuɣa ɣar Cawul ... n iseggʷusa umi idweř d ajeǧid. Netta iḥkem tnayen ... n iseggʷusa x Israil. 2 Cawul ifarz teřt-ařaf n yeryazen zi Israil. Ařfayen zzaysen tuɣa aten ɣar Cawul di Mixmas u x idurar n Bayt-Il u ařef zzaysen tuɣa aten ɣar Yunatan di Jibɛa di temmurt n Binyamin. Min iqqimen zi řgens yarxu as ijjen ijjen ad yuyur ɣar uqiḍun nnes.

3 Yunatan iɣřeb x tecbart n řɛeskar n Ifilisṭiniyyen di Jibɛa. Uca sřan Ifilisṭiniyyen xas. Xenni Cawul igga ad ṣuḍen deg uyicc n icarri di marra tammurt, inna: “Ejj Iɛibraniyyen ad t sřen!” 4 D marra Israil isřa abarreḥ: “Cawul iɣřeb x ict n tecbart n řɛeskar n Ifilisṭiniyyen u zi man aya issarzeg Israil ixef nnes ɣar Ifilisṭiniyyen.” Ittwařaɣa řgens maḥend ad uyuren awarni i Cawul ɣar Jiljal.

5 Ifilisṭiniyyen ssmunen i umenɣi ak-d Israil. Nitni tuɣa ɣarsen teřt-ařaf n ikarruten d setta-ařaf n imnayen, uca řgens n řɛeskar tuɣa deg waṭṭas amecnaw ijdi ɣar tma n řebḥar. Nitni geɛɛden u wtin iqiḍan nsen ɣar Mixmas, ɣar ccarq n Bayt-Awin. ^□   6 Kuř aryaz di Israil tuɣa ittwařa aqa nitni di řeḥṣaret, minzi ittwaẓẓeř x řgens. Innufar řgens deg ifran u deg ufeǧeq n teṣḍart u di tṣuḍar u deg imucan n tnuffra u deg wanuten. 7 Ẓwan Iɛibraniyyen L'Urdun ɣar temmurt n Jad d Jilɛad. Tuɣa Cawul s yixef nnes ɛad di Jiljal u marra řgens tuɣa ittarjiji awarni as. 8 Netta iraja di Jiljal sebɛa n wussan ař řweqt i igga Camwil. Umi maca Camwil war dd-yusi, aqa ibezzeɛ řgens ixef nnes, uyuren xas. 9 Řexdenni inna Cawul: “Awyem ayi-dd da ict n tɣarṣt n wecmaḍ d tɣarṣa n řehna!” Xenni iqeddem i-tt din d taɣarṣt n wecmaḍ.

10 Umi ikemmeř s tewhibt n tɣarṣt n wecmaḍ, imsar, aqa yusa-dd Camwil. Cawul iffeɣ ad t iřqa ḥima ad as ibarek.

11 Xenni inna Camwil: “Min teggid cek?” Inna Cawul: “Minzi necc ẓriɣ, aqa řgens yuyur ayi u cek war dd-tusid ɛad deg wussan ittwaggen uca Ifilisṭiniyyen nnjarwen ɣar Mixmas,

12 nniɣ necc: ‘Řexxu ad ɣari dd-hwan Ifilisṭiniyyen u necc war zawgeɣ ɛad zzat i wudem n SIDI!’. X uya uciɣ aqa din aɣiř xafi ḥima ad ssgeɛɛdeɣ ict n tɣarṣt n wecmaḍ.”

13 Camwil yarra-dd x Cawul: “Cek teggid tubbuheřya. War teḥḍid ca tawṣeyyet n SIDI, AREBBI nnek, tenni d ac yumur, minzi xenni iři aqa SIDI icedd řexxu tagelda nnek x Israil i řebda.

14 Řexxu maca tagelda nnek war tᵉttɣimi ca. SIDI ifarz i yixef nnes ijj n weryaz x wuř nnes u SIDI yumur as ad yiři d řḥakem x řgens nnes, maɣar cek war teḥḍid ca min i d ac yumur SIDI.”

15 Ikkar Camwil, igeɛɛed zi Jiljal ɣar Jibɛa di Binyamin uca Cawul isedd řgens i tuɣa ɣares iǧan, ca n setta-mya n yeryazen.

16 Cawul, mmis n Yunatan d řgens i ɣarsen iǧan, qqimen di Jibɛa di temmurt n Binyamin. Uca Ifilisṭiniyyen wtin iqiḍan nsen di Mixmas.

17 Uca ffɣen iqṭaṭɛiyyen zi řmargeḥ n řɛeskar n Ifilisṭiniyyen di třata n terbiɛin. Ict n terbiɛt tarra azeǧif ɣar webrid n Ɛufra ɣar temmurt n Cuɛal,

18 u ict n tmunet nneɣni tarra azeǧif ɣar webrid n Bayt-Ḥurun u ict n tmunet nneɣni tarra azeǧif ɣar webrid n weymir nni ixezzaren di teɣzurt n Ṣabuɛim ɣar řexřa.

19 Di marra Israil war ittwifi uřa d ijj n wemziř, minzi Ifilisṭiniyyen tuɣa nnan: “Ḥima Iɛibraniyyen war tteggen ssif niɣ lansa.” ^■   20 X uya marra Israil iqqim ihekkwa ɣar Ifilisṭiniyyen ḥima ad isseqḍeɛ kuř aryaz uzzař n wesɣar nnes d dduzan nnes d wuzzař n uzeddam nnes d wuzzař n tsiřit nnes. 21 Tuɣa ɣarsen izeynaten war iqḍiɛen ɣar wuzzař n isuɣar u ɣar dduzan u ɣar tazzarin s třata n tceqruḍin u ɣar isennanen ibedden n řmacam n iyenduzen. 22 Umi dd-yiweḍ wass n umenɣi war ittwifi uřa d ijj n ssif uřa d ijj n uḥric di marra řgens nni tuɣa iǧan ɣar Cawul d Yunatan, aqa ttwafen mɣir ɣar Cawul d Yunatan. 23 Ict n terbiɛt n řɛeskar n Ifilisṭiniyyen teɛdu x webrid n Mixmas.