1 Ijj n wass imsar, aqa Yunatan, mmis n Cawul, inna i uḥudri wenni d as yarebbun řesnaḥ: “As-dd, ejj aneɣ ad neẓwa ɣar tecbart n iɛessasen n Ifilisṭiniyyen nni din iǧan x ujemmaḍ!”, maca netta war t inni i babas.

2 Tuɣa Cawul iqqim ɣar tma n Jibɛa sadu ict n tcejjart n aremmam nni ibedden di Miɣrun uca řgens i tuɣa akides iǧan, dayes ɛřaḥař setta-mya n yeryazen. ^■   3 Tuɣa Axiya, mmis n Axiṭub, umas n Ixabud, mmis n Finaḥas, mmis n Ɛali, d akehhan n SIDI di Cilu. Tuɣa yarḍ apalṭu n ukehhan. Řgens war issin aqa Yunatan tuɣa yuyur.

4 Jar imucan n uẓekkʷu x idurar i x tuɣa Yunatan yarezzu ad iẓwa ɣar tecbart n iɛessasen n Ifilisṭiniyyen, tuɣa din ict n teṣḍart iqeḍɛen i dd-iffɣen ɣar uɣezdis-a uřa d ict teṣḍart iqeḍɛen i dd-iffɣen ɣar uɣezdis nneɣni. Ict ttřaɣan as Buṣayṣ d ict nneɣnit ttřaɣan as Sana. 5 Ict n ṭṭarf iqeḍɛen tuɣa ɣar ccamal arendad n Mixmas d ict n ṭṭarf nneɣni tuɣa ɣar ljanub arendad n Jibaɛ.

6 Inna Yunatan i uḥudri wenni d as yarebbun řesnaḥ: “As-dd, ejj aneɣ ad neẓwa ɣar tecbart n iɛessasen n yinni war ittwaxetnen, ad taɣ ad igg SIDI ca di ṭṭweɛ nneɣ, minzi war iwɛar i SIDI ḥima ad ifekk s ufus n waṭṭas niɣ s ufus n drus.” 7 Aḥemmař n řesnaḥ nnes yarra-dd xas: “Egg marra min ɣarek deg wuř nnek. Uyur, xzar, necc akidek am wuř nnek.” 8 Yunatan inna: “Xzar, neccin ad neẓwa ɣar yeryazen nni, ad asen nesscen ixef nneɣ. 9 Mařa nitni xenni ad aneɣ inin: ‘Beddem ař ɣarwem dd ɣa nas!’, xenni ad neqqim nbedd deg wemcan nneɣ, war ɣarsen nettgeɛɛid ca.

10 Maca mařa nitni ad inin: ‘Geɛɛdem-dd ɣarneɣ!’, xenni ad ɣarsen-dd ngeɛɛed, minzi SIDI igga aneɣ ten deg ufus nneɣ. Aya ad aneɣ yiři d řeɛřamet.”

11 Řami dd seccnen nitni ixef nsen s tnayen idsen ɣar tecbart n iɛessasen n Ifilisṭiniyyen, nnan Ifilisṭiniyyen: “Xzarem, Iɛibraniyyen ffɣen-dd zeg ixubac nsen i di tuɣa nnuffaren.”

12 Iryazen n tɛessast arrin-dd x Yunatan u x wenni d as yarebbun řesnaḥ: “Gaɛɛdem-dd ɣarneɣ, neccin ad awem dd-nessiweḍ řexbar!” Uca inna Yunatan i uḥemmař n řesnaḥ nnes: “Gaɛɛed awarni as, maɣar SIDI igga i-ten deg ufus n Israil.”

13 Xenni igeɛɛed Yunatan x ifassen d iḍaren ɣar sennej u aḥemmař n řesnaḥ nnes iḍfar i-t uca nitni wḍan zzat i wudem n Yunatan u awarni as inɣa i-ten uḥemmař n řesnaḥ nnes.

14 Ticti aya tamezwarut i zi iwta Yunatan d uḥemmař n řesnaḥ nnes ɛřaḥař ɛicrin n yeryazen, tuɣa teǧa x ijj n yeyyar i tuɣa anect n ijj n wezyen n yeyyar i izemmar ijj n uzayřu n iyenduzen ad t icarz deg ijj n wezyen n wass.

15 Amenni temsar ict n tarjijet d tameqqrant di řmargeḥ n řɛeskar, x yeyyar u jar marra řgens. Uřa d yenni n tecbart n iɛessasen d iqṭaṭɛiyyen ttarjijen s yixef nsen, wah, uřa d tammurt tenhezz. Tuɣa-tt d ict n tarjijet temɣar n AREBBI.

16 Iɛessasen n Cawul di Jibɛa di Binyamin ẓrin aqa ittwabezzeɛ řɣaci uca nitni dewřen ttmenɣan ak-d wayawya.

17 Xenni inna Cawul i řgens i tuɣa ɣares iǧan: “Ḥesbem xenni u xzarem man wen i zzayneɣ iffɣen.” Nitni ḥesben u xzar, aqa Yunatan d uḥemmař n řesnaḥ nnes war din ǧin.

18 Uca inna Cawul i Axiya: “Awi-dd Ttabut n AREBBI danita!” Maɣar Ttabut tuɣa-tt deg wussan nni ɣar ayt n Israil di řmargeḥ n řɛeskar.

19 Umi tuɣa ɛad issawař Cawul ak-d ukehhan, imsar, aqa řɣaci di řmargeḥ n řɛeskar n Ifilisṭiniyyen idweř innehweř aṭṭas. Xenni inna Cawul i ukehhan: “Fekk afus nnek!” 20 Cawul d marra řgens nni tuɣa ɣares ttwařaɣan-dd maḥend ad munen uca usin-dd ɣar wazzay n umenɣi u xzar, ssif n ijjen tuɣa x wenneɣni. Aqa ikkar ijj n uxarweḍ d ameqqran. 21 Tuɣa din Iɛibraniyyen inni aṭṭas zeg wami tuɣa ibedden x uɣezdis n Ifilisṭiniyyen, ffɣen-dd akidsen immṭarrcen jar řɛeskar. Uřa d nitni munen ɣar Israiliyyen inni iǧan ak-d Cawul d Yunatan. 22 Umi marra iryazen n Israil, inni tuɣa innuffaren x idurar n Ifrayim, sřan, aqa Ifilisṭiniyyen tuɣa arewřen, munen uřa d nitni ɣarsen maḥend ad ḍfaren Ifilisṭiniyyen deg umenɣi. 23 Deg wass nni ifekk SIDI Israil uca amenɣi iffeɣ uřa ɣar Bayt-Awin.

24 Ttwaɛarrnen iryazen n Israil deg wass nni ar ṭṭarf, minzi Cawul ijjuǧ i řgens, inna: “Wenni i ɣa iccen macca qbeř tameddit u qbeř i ɣa ntaqmeɣ necc x řɛedyan inu, ad yiři ittwanɛeř!” X uya war icci marra řgens. 25 Řgens yusa-dd ɣar ijj n wezɣar uca tuɣa din tamment tewseɛ deg iyyar. ^□   26 Umi dd-yudef řgens ɣar wezɣar, aqa din tamment s ufeyyeḍ, maca uřa d ijj war ɣares isswiẓẓeḍ s ufus ɣar uqemmum nnes, maɣar řgens iggʷed tjaǧit n Cawul.

27 Yunatan maca tuɣa war isři řami issjuǧ babas řgens. Netta isswiẓẓeḍ s uneggar n uzeǧaḍ nnes nni iǧan deg ufus nnes uca issisen i-tt deg ict n teɣraṣt n tamment. Řami yiwi afus nnes ɣar uqemmum nnes, aqa dewřent tiṭṭawin nnes izdigent aṭṭas. 28 Xenni yarra-dd ijj n weryaz zi řgens, inna: “Babac issjuǧ řgens s ict n tjaǧit, inna: ‘Aryaz wenni i ɣa iccen ass-a aɣrum, ad yiři ittwanɛeř!’ S uyenni ittwafna řgens.” 29 Xas uca inna Yunatan: “Baba iɣḍeř řgens n tammurt di arrẓiyyet. Xzarem waha, tiṭṭawin inu ttceɛɛřent, minzi necc qqaseɣ drust zi tamment-a. 30 Mecḥař ɛad mři icca řgens mliḥ ass-a zi tkeccaḍt i iṭṭef zi řɛedyan nnes, minzi řexxu ticti i zi wtin Ifilisṭiniyyen war teǧi d tameqqrant ɛad.”

31 Deg wass nni wtin nitni Ifilisṭiniyyen zi Mixmas ař Ayalun u řgens tuɣa ifna aṭṭas. 32 Řgens iɛemmed x tkeccaḍt u nitni ksin uǧi d ifunasen d tfunasin d iyenduzen d tyenduzin uca ɣarṣen asen x temmurt u řgens icca aysum s idammen. 33 Uca ssargben man aya i Cawul uca inna: “Aqa řgens ixḍa ak-d SIDI umi nitni ccin aysum s idammen.” Netta inna: “Kenniw tuɣa tɣeddarem. Seqnunniyem-dd kenniw ass-a ict n teṣḍart ɣari.” 34 Inna Cawul ɛawed: “Bezzɛem ixef nwem jar řgens u tinim asen: ‘Ejj kuř aryaz ad ayi dd-yawi afunas nnes, u kuř aryaz ɛawed ijjen zeg wuǧi nnes. Ɣarṣem asen da, ccem zzaysen u war txeṭṭim ak-d SIDI umi ɣa teccem s idammen.” Uca kuř aryaz zi marra řgens yiwi-dd afunas nnes s ufus di ǧiřet uca ɣarṣen as dinni. 35 Uca Cawul ibna ijj n uɛalṭar i SIDI. Tuɣa-t d aɛalṭar amezwaru i issbedd i SIDI.

36 Xenni inna Cawul: “Ejj aneɣ ad nehwa ǧiřet-a, ad neḍfar Ifilisṭiniyyen u ad ten nkecceḍ ɣares ař tuffut n ṣṣbeḥ u war zzaysen nettejji uřa d ijjen ad iddar ɛad.” Nnan nitni “Egg marra min tᵉttwařid nican di tiṭṭawin nnek.” Maca akehhan inna: “Jjem aneɣ ad dd-nqarreb ɣar AREBBI.” 37 Xenni isseqsa Cawul AREBBI “Mma ad hwiɣ ad ḍfarɣ Ifilisṭiniyyen? Ma ad ten tegged deg ufus n Israil?” SIDI maca war xas dd-yarri deg wass nni. 38 Xas uca inna: “Asem-dd da, marra imḍebbaren n řgens, snem u xzarem, min di iǧa ddnub-a i ittwaggen ass-a. ^■   39 Minzi s tidett am iddar SIDI wenni ifekken Israil, waxxa tuɣa-t d mmi Yunatan, netta ad immet nican.” Maca uřa d ijj zi řgens war dd-yarri ca.

40 Inna ɛawed i marra ayt n Israil: “Ittxeṣṣa ad tbeddem ɣar ijj n uɣezdis, necc d mmi Yunatan ad nbedd ɣar uɣezdis nneɣni.” Řgens yarra-dd x Cawul: “Egg min tᵉttwařid cek nican di tiṭṭawin nnek.” 41 Xas uca issiweř Cawul ak-d SIDI, AREBBI n Israil “Ewc aneɣ nnican ikmeř!” Xenni ittwaṭṭef Yunatan d Cawul uca řgens iffeɣ d amezdag. 42 Cawul inna: “Nḍarem taqedduḥt jar ayi necc d mmi Yunatan!” Xenni ittwaṭṭef Yunatan. 43 Inna Cawul i Yunatan: “Ini ayi, min teggid cek!” Yunatan iḥaja as t, inna: “Necc qqaseɣ mɣir cwayt n tamment s uneggaru n uẓeǧaḍ nni iǧan deg ufus inu. Aqa ayi da, ma ittxeṣṣa ayi ad mmteɣ?” 44 Xenni inna Cawul: “Iři ad dayi igg AREBBI amenni u ad as yarni ɛad, minzi cek, Yunatan, ittxeṣṣa ac ad temmted nican.” 45 Maca řgens inna i Cawul: “Ma ittxeṣṣa ad immet Yunatan, wenni iwyen asenjem-a ameqqran i Israil? Aya war ittiři! S tidett am iddar SIDI, mařa zzayes iwḍa uřa d ict n uẓeṭṭu n ucewwaf n uzeǧif nnes ɣar temmurt, minzi netta igga i-t ass-a ak-d AREBBI.” Ammu i isseṣřeḥ řgens i Yunatan uca tuɣa war ittxeṣṣi ad immut ca.

46 Cawul ismeḥ deg weḍfar n Ifilisṭiniyyen uca Ifilisṭiniyyen ɛeqben ɣar imucan n tzeddiɣt nsen.

47 Uca Cawul iṭṭef tagelda x Israil, imneɣ ak-d marra řɛedyan nnes i d as dd-innḍen: ak-d Mu’ab u ak-d ayt n Iɛamuniyyen u ak-d Idum u ak-d ijeǧiden n Ṣuba u ak-d Ifilisṭiniyyen. Mani ma yarra s uzeǧif, yiwi-dd řeḥkam. 48 Netta igga s teryast, iɣřeb x Iɛamaliqiyyen u ifekk Israil zeg ufus n yinni t ikeccḍen.

49 Iḥenjiren n Cawul tuɣa aten d Yunatan d Yicwi d Malkicuɛa. Ismawen n tnayen n yessis d Mirab, tenni d tamenzut, u isem n tmeẓyant Mixal. 50 Tamɣart n Cawul qqaren as Axinuɛam, yeǧis n Aximaɛaz. Isem n ukumandar nnes n řɛeskar aqa d Abnir, mmis n Nayr, ɛzizis n Cawul. 51 Qic, wenni d babas n Cawul, u Nayr, wenni d babas n Abnir, tuɣa aten d iḥenjiren n Abiyil.

52 Tuɣa din ijj n umenɣi iwɛar ak-d Ifilisṭiniyyen marra ussan min ikka iddar Cawul. Kuř ijj n weryaz bu-teɣruḍt d kuř ijj n mmis n umenɣi i iẓra Cawul, iksi i-t ɣares.