1 Camwil inna i Cawul: “SIDI tuɣa issekk ayi-dd ḥima ad cek dehneɣ d ajeǧid x řgens nnes, x Israil. Seř xenni ɣar wawařen n SIDI. 2 Ammu i iqqar SIDI n řɛeskarat: ‘Necc ad xeǧṣeɣ min igga Ɛamaliq i Israil, aqa ibedd as deg webrid umi dd-igeɛɛed Israil zi Miṣra. ^■   3 Kkar řexxu u wwet Ɛamaliq. Ḥarrem marra min ɣares i uteḥḥi u war xas ttḥiwiř ca, maca neɣ marra, zeg weryaz ař temɣart, zeg uḥenjir ař aseymi, zeg ufunas ař uǧi, zeg weřɣem ař aɣyuř!’ ”

4 Iřaɣa-dd Cawul x řgens. Isedd i-ten di Ṭalayim. Tuɣa-ten di mitayen-ařef n yeryazen x iḍaren d tenɛac ařef n yeryazen n Yahuda. 5 Umi yiweḍ Cawul ɣar tendint n Ɛamaliq, igga ict n texceft di teɣzurt 6 uca netta ijja ad inin i ayt n Iqiniyyen: “Ffɣem, beɛɛdem, semḥem di řwest n Ɛamaliq, ḥima necc war kenniw tteḥḥiɣ akidsen, maɣar kenniw teggim s tmexsiwt icewwaren ak-d ayt n Israil umi dd-ffɣen zi Miṣra.” Xas uca ffɣen Iqiniyyen zi řwest n Iɛamaliqiyyen. ^■   7 Xenni iɣřeb Cawul x Iɛamaliqiyyen zi Ḥawila ař Cur i iǧan arendad n Miṣra. 8 Ajaj, ajeǧid n Ɛamaliq, iṭṭef i-t iddar, maca marra řgens iḥarrem i-ten i uteḥḥi s řeqḍeɛ n ssif. ^■   9 Maca Cawul d řgens ḥawřen x Ajaj uřa x řemxeyyer n wuǧi d ifunasen d tfunasin u x min iǧan iṣebḥen awarni as u marra izmaren daysen tadunt d marra min tuɣa d aṣebḥan qaɛ. War xsen ad ten ḥarrmen i uteḥḥi, maca marra min iǧan drus d min iḍeɛfen, ḥarrmen t i uteḥḥi.

10 Xenni yusa-dd wawař n SIDI ɣar Camwil, inna:

11 “Necc nedmeɣ, aqa ggiɣ Cawul d ajeǧid, maɣar netta iḥeyyed zi ḍeffar inu u war isseqfeř awařen inu.” Iffugem Camwil uca isɣuyy tameddit tmun ɣar SIDI.

12 Tiwecca nnes zic ikkar Camwil, yuyur ad iřqa Cawul. Ittwanna as i Camwil, nnan: “Cawul yusa-dd ɣar Karmil u issbedd dinni ijj n uqellij n řidaret i yixef nnes, xenni iɛdu, ihwa ɣar Jiljal.”

13 Yusa-dd Camwil ɣar Cawul u Cawul inna as: “Aqa cek tᵉttwabarked zi SIDI! Necc ssqefřeɣ awař n SIDI.”

14 Xenni yarra-dd xas Camwil: “D min ixs ad yini řḥess-a n wuǧi i d ayi ittadfen deg imezzuɣen inu d řḥess n ifunasen d tfunasin i ttesřiɣ?”

15 Cawul inna: “Awyen ten-dd akidsen zi Ɛamaliq minzi řgens iḥaweř x mummu n wuǧi u n ifunasen d tfunasin ḥima ad ten qeddmen d taɣarṣt i SIDI, AREBBI nnek. Min iqqimen nḥarrem i-t i uteḥḥi.”

16 Xenni inna Camwil i Cawul: “Cfa! Necc ad cek iniɣ min i d ayi inna SIDI di ǧiřet-a.” Inna as Cawul: “Siweř!”

17 Uca inna Camwil: “Umi teǧid ɛad d ameẓyan di tiṭṭawin nnek, ma war tdewřed ca d azeǧif n tqebbař n Israil, u ma war cek idhen SIDI ad tdewřed d ajeǧid x Israil?

18 SIDI issekk i cek ɣar webrid, inna: “Uyur, ḥarrem imednab nni, Iɛamaliqiyyen, i uteḥḥi u mneɣ akidsen ɣares ař ten ɣa teqḍid qaɛ.

19 Mayemmi war tesřid ca ɣar tmijja n SIDI uca tewḍiḍ cek x tkeccaḍt u teggid min iǧan d řɣar di tiṭṭawin n SIDI?”

20 Xenni inna Cawul i Camwil: “Necc sřiɣ maca ɣar tmijja n SIDI u necc kkeɣ abrid i x i d ayi dd-issekk SIDI. Necc iwyeɣ-dd danita Ajaj, ajeǧid n Ɛamaliq uca Iɛamaliqiyyen ḥarrmeɣ ten i uteḥḥi. 21 Řgens iksi uǧi d ifunasen d tfunasin zi tkeccaḍt, mummu n min ittwaḥarrmen i uteḥḥi, ḥima ad qeddmen aya i SIDI, AREBBI nnek, di Jiljal.” 22 Maca Camwil inna: “Ma teɛjeb as i SIDI tiɣarṣa n wecmaḍ d tiɣarṣa ktar zeg useǧi i tmijja n SIDI? Xzar aseǧi ḥsen zi tɣarṣt u asḥessi s taynit ḥsen zi tadunt n icarriyyen. ^■   23 Minzi aɣewweɣ aqa-t d ddenb n uɛezzem u taɣennant aqa-tt d aɛbad n ṣṣanam u am uweqqar n řexyařat imeẓyanen n ṣṣanam. Minzi cek tenḍared awař n SIDI, inḍar netta i cek am ujeǧid.”

24 Xenni inna Cawul i Camwil: “Necc xḍiɣ, maɣar necc ttɛeddiɣ x řumur i dd-iffɣen zeg uqemmum n SIDI u x wawařen nnek, minzi necc ggʷedeɣ zi řgens u sřiɣ ɣarsen. ^□   25 S uyenni, ɣfar ayi ddenb inu u dweř akidi, xenni ad sejdeɣ i SIDI.” 26 Maca Camwil yarra-dd x Cawul: “Necc war kidek dikkʷiřeɣ ca, maɣar cek tenḍared awař n SIDI u SIDI inḍar i cek am ujeǧid x Israil.”

27 Umi Camwil inneqřeb ḥima ad yuyur, icebbar as netta di tma n useřham nnes, maca wanita icarreg. 28 Xenni inna as Camwil: “Deg wass-a icarreg ac SIDI tagelda n Israil u iwca i-tt i umqarreb nnek wenni iǧan ḥsen zzayek.^□   29 Uřa Lɛaḍim n Israil n řebda war issxarriq ca u war indim, maɣar Netta war iǧi d bnadem ařami i ɣa indem.” ^■   30 Xas uca inna as: “Necc xḍiɣ. Ewc ayi maca aweqqar zzat i imɣaren n řgens u zzat i Israil u dweř akidi, xenni ad sejdeɣ i SIDI, AREBBI nnek.” 31 Uca idweř Camwil, yareddef Cawul u Cawul isjed i SIDI.

32 Xas uca inna Camwil: “Awi-dd ɣari Ajaj, ajeǧid n Ɛamaliq. Ajaj yuyur ɣares s arratuḥ u inna Ajaj ak-d ixef nnes: “S tidett, tarzugi n řmewt tᵉttwaḥeyyed xafi.” 33 Maca Camwil inna: “Am mammec issḥarrem ssif nnek timɣarin x iḥenjiren nsent, ammu i ɣa tᵉttwaḥarrem yemmac jar timɣarin x tarwa nnes.” U Camwil iqeṭṭes Ajaj d iceǧiqen zzat i wudem n SIDI di Jiljal. 34 Xenni yuyur Camwil ɣar Rama d Cawul igeɛɛed ɣar taddart nnes di Jibɛa n Cawul. 35 Camwil war iẓri ɛad Cawul ɣares ař ass n řmewt nnes, maca Camwil icḍen x Cawul. Uca indem SIDI řami igga Cawul d ajeǧid x Israil.