1 Deg wussan n Dawud tuɣa din ijj řaẓ, třata n iseggʷusa, aseggʷas awarni useggʷas. U Dawud yarzu udem n SIDI u SIDI inna: “D man aya x Cawul u x idammen i iřeṣqen di taddart nnes, minzi netta inɣa ayt n Jibɛun.” 2 Xenni iřaɣa-dd ujeǧid x Ijibɛuniyyen, issiweř akidsen. Ayt n Jibɛun maca war dd-qqarṣen ca zeg ayt n Israil, maca zi min iqqimen zeg Imuriyyen. Ayt n Israil tuɣa jjuǧen asen, maca Cawul tuɣa yarezzu ad ten iwwet deg wecḍar nnes i ayt n Israil d Yahuda. ^■   3 Dawud inna i ayt n Jibɛun: “Min d awem i ɣa ggeɣ u s min zi ɣa ggeɣ aṣřaḥ maḥend ad tbarkem řwart n SIDI?” 4 Ayt n Jibɛun nnan as: “War d aneɣ icqi nnuqart niɣ d wureɣ zi Cawul niɣ zi taddart nnes. Ɛawed war d aneɣ-dd ikkar ad neneɣ ca n ijj di Israil.” U netta inna: “Min i ɣa tinim, ad awem t ggeɣ.” 5 Nitni nnan i ujeǧid: “Icqa aneɣ weryaz nni ixsen ad xaneɣ iqḍa u tuɣa inwa ad imḥa aɣimi nneɣ di marra tammurt n Israil. 6 Ad aneɣ mmewcen sebɛa n yeryazen zeg iḥenjiren nnes ḥima ad ten ayřen zzat i SIDI di Jibɛa n Cawul, wenni ittwafarzen zi SIDI!” Uca ajeǧid inna: “Necc ad ten wceɣ.” 7 Maca ajeǧid issɛizz x Mafibucat, mmis n Yunatan, mmis n Cawul, di ṭṭweɛ n tjaǧit i SIDI, tenni tᵉttwagg jar asen, jar Dawud d Yunatan, mmis n Cawul. ^■  

8 Ajeǧid iksi tnayen n iḥenjiren n Riṣfa, yeǧis n Aya, i dd-turuw i Cawul, Armuni d Mafibucat, d xemsa n iḥenjiren n učmas n Mixal, yeǧis n Cawul, i dd-turuw i Ɛadriyil, mmis n Barzillay zi Maḥulay. 9 Netta iwca i-ten deg ifassen n ayt n Jibɛun inni ten ayřen x wedrar zzat i wudem n SIDI. Sebɛa nni wḍan deg ict n twařa. Nitni ttwanɣen deg wussan n tmeyra, deg wussan imezwura, ɣar beddu n tmeyra n imendi.

10 Xenni teksi Riṣfa, yeǧis n Aya, ict n txancet tessu tt zzat i ixef nnes x ijj n jjarf. Zi beddu n tmeyra ɣares ařami i xasen-dd zeǧɛen waman zeg ujenna. Nettat war tejji ijḍaḍ n ujenna ad xasen areyyḥen s uziř uřa d řewḥuc n řexřa s ǧiřet.

11 Ḥajan as i Dawud min tuɣa tegga Riṣfa, yeǧis n Aya, tayya n Cawul.

12 Iṭṭef Dawud abrid maḥend ad iksi zeg imezdaɣ n Yabic di Jilɛad iɣussan n Cawul d iɣussan n mmis Yunatan nni dd-kksen nitni zeg wazzaɣ n Bayt-San, mani ten yuyřen Ifilisṭiniyyen deg wass i di ɣeřben Ifilisṭiniyyen Cawul x idurar n Jilbuɛa. ^■  

13 Netta issgeɛɛed ssenni ixsan n Cawul d ixsan n mmis Yunatan. Nitni ssmunen ɛawed ixsan n yinni ittwayřen.

14 Neḍřen ixsan n Cawul d mmis Yunatan di temmurt n Binyamin di Ṣaylaɛ deg wenḍeř n babas Qis u nitni ggin marra min d asen yumur ujeǧid. Awarni man aya ijja AREBBI ad ittwaseṣřeḥ ixef nnes di ṭṭweɛ n temmurt s tẓaǧit nsen yuǧɣen.

15 Ifilisṭiniyyen mmenɣen ɛawed ak-d Israil. Dawud ihwa d imsexxaren nnes akides. Nitni menɣen ak-d Ifilisṭiniyyen uca idweř Dawud yuḥeř aṭṭas.

16 Yicbi-Banub, ijj zeg ayt n Rafa, wenni lansa nnes tewzen teřt-mya n iciqlen n nnḥas u wenni tuɣa ibyes s yijj n ssif d amaynu, iṭṭɣiř as ad iwwet Dawud.

17 Maca Abicay, mmis n Ṣaruya, iwca as afus u iwta Afilisṭini, inɣa i-t. Xenni jjuǧen as yeryazen n Dawud, nnan: “Cek war akidneɣ teffɣed ɛad ɣar umenɣi, maḥend war txessyid řefnar n Israil.”

18 Awarni as imsar, aqa ikkar ɛawed umenɣi ak-d Ifilisṭiniyyen di Jub. Řexdenni Sabkay, Aḥucayi, iwta Saf, wenni d ijj zeg ayt n Rafa. ^■  

19 Uca ɛawed tuɣa din umenɣi ak-d Ifilisṭiniyyen di Jub. Ilḥanan, mmis n Yaɛri-Arjim, zi Bayt-Laḥm, iɣřeb x učmas n Julyat zi Jat. Akeccuḍ n lansa igga am ijj n weɛmud n ukeccuḍ n uxeyyeḍ.

20 Uca ikkar ɛawed umenɣi di Jat. Tuɣa din ijj n weryaz d azirar, s setta n iḍewḍan ɣar ifassen nnes u setta n tfednin ɣar iḍaren nnes, marra řqedd nsen arebɛa u ɛicrin. Uřa d netta ittwaxřeq-dd di Rafa. 21 Netta isstehza zi Israil, maca Yunatan, mmis n Cimɛa, umas n Dawud, iɣřeb xas.

22 Arebɛa aya ttwaxeřqen-dd di Rafa di Jat u nitni wḍan s ufus n Dawud u s ufus n imsexxaren nnes.