1 Tuɣa din ijj n weryaz i war isekkwin. Tuɣa qqaren as Cabaɛ, mmis n Bikri, ijj n Ubinyamini. Netta iṣuḍ deg uyicc n icarri, inna: “Neccin war ɣarneɣ tasɣart di Dawud u neccin war ɣarneɣ řwart ak-d mmis n Yassa. Ejj kuř aryaz ad yuyur ɣar iqiḍan nnes, a Israil!” 2 Uca kuř aryaz iffeɣ zi ḍeffar n Dawud, iruḥ awarni i Cabaɛ, mmis n Bikri. Maca iryazen n Yahuda qqimen řesqen ak-d ujeǧid nsen, zi L'Urdun ɣares ař Urcalim.

3 Umi yudef Dawud ɣar taddart nnes di Urcalim, iksi ujeǧid ɛecra n temɣarin, tiyya nnes tinni tuɣa ijja awarni as ḥima ad ḥḍant taddart. Netta igga i-tent deg ict n taddart tᵉttwaḥḍa u netta itthilla daysent, maca war ɣarsent yudif. Nitenti qqiment bellɛent ař ass n řmewt nsent, am tijjař ař aneggar n tudart nsent.

4 Inna ujeǧid ɛawed i Ɛamasa: “Řaɣa-dd x yeryazen n Yahuda ad munen ɣari di třata n wussan uca xenni bedd cek da!” 5 Ɛamasa iffeɣ ḥima ad iřaɣa-dd x Yahuda ad ssmunen, maca netta iɛeṭṭeř x řweqt i tuɣa akides igga ujeǧid. 6 Xenni inna Dawud i Abicay: “Řexxu ad aneɣ igg Cabaɛ, mmis n Bikri, tuɛeffna mahu x Abcalum. Ksi akidek imsexxaren n sidi u ḍfar i-t, ḥima netta war izemmar ad yaf i yixef nnes tineddam ifaryen uca ad iweddar zi tiṭṭawin nneɣ.” 7 Ffɣen yeryazen n Yuwab, uyuren awarni as, ak-d iɛessasen n arrimet d ireqqasen n tazřa d marra ayt n bu-teɣruḍt. Nitni ffɣen-dd zi Urcalim ḥima ad ḍfaren Cabaɛ, mmis n Bikri.

8 Umi ten tuɣa nitni ɣar weẓru ameqqran n Jibɛun, tuɣa Ɛamasa zzat i wudem nsen. Yuwab tuɣa ittḥezzam arruḍ nnes n umenɣi i yarḍ. Tuɣa xas ijj n uḥezzam ak-d ssif deg ufurrun n weɣřaf i xas ittwaggen ɣar tejɛinna nnes. Umi yuyur netta ɣar zzat, iwḍa as ssif zzayes. 9 Inna Yuwab i Ɛamasa: “Aqa cek mliḥ, uma?” Icebbar Yuwab s ufus afusi di tmart n Ɛamasa ḥima ad t issudem.

10 Ɛamasa war iḥekkar i ssif i tuɣa deg ufus n Yuwab uca netta iřqef i-t zzayes ɣar tɣezdist wiss xemsa n idmaren uca ffɣen as-dd wadan ɣar temmurt. Netta immut břa ma iřqef i-t ict n twařa nneɣnit. U Yuwab ak-d umas Abicay iḍfar Cabaɛ, mmis n Bikri. ^■  

11 Ijj n weryaz ibedd ɣares ɣar Amasa. Tuɣa netta zeg imsexxaren n Yuwab, inna: “Ejj kuř ijjen i iǧan ak-d Yuwab uřa d wenni i iǧan ak-d Dawud, ad iḍfar Yuwab!” ^□  

12 Ɛamasa maca tuɣa izzeř ittwanneḍ deg idammen nnes deg webrid ameqqran. Umi iẓra aryaz, aqa marra řgens iqqim ibedd, ijarr netta Amasa zeg webrid ɣar yeyyar u inḍar ijj n warruḍ tiwa nnes, minzi iẓra qaɛ wi ɣares dd-iwḍen, iqqim ittbedda.

13 Ařami tuɣa netta ittwaggʷej x webrid, ɛdun marra iryazen awarni i Yuwab, ḥima ad ḍfaren Cabaɛ, mmis n Bikri,

14 wenni tuɣa ikka x marra tiqebbař n Israil ɣares ař Abal, u ɣar Bayt-Maɛka u ɣar marra Ibiriyyen. Nitni munen uca ruḥen ɛawed awarni as.

15 Ammu dd-usin uca nnḍen as-dd di Abal-Bayt-Maɛka. Nitni ssefyen ijj n lbaraj x tendint u lbaraj nni ibedd ɣar řḥiḍ n zzat i dd-innḍen i tendint. Marra řgens i tuɣa ak-d Yuwab, ggin ad areddǧen řḥiḍ ḥima ad as ssɣeḍřen.

16 Xenni třaɣa ict n temɣart d tmiɣist zi tendin:t “Sřem, sřem, inim i Yuwab: ‘As-dd da, ades-dd, ařami zemmareɣ akidek ssiwřeɣ.’ ”

17 Umi dd-yusa netta, yudes-dd ɣares, tenna temɣart: “Ma cek d Yuwab?” Netta inna: “D necc.” Tenna as nettat: “Seř ɣar wawařen n tayya nnek.” Netta inna: “Necc ttesřiɣ.”

18 Xenni tenna: “Zic tuɣa ssiwřen di kuř amcan, nnan: ‘Ittxeṣṣa asen ad tt sseqsan nican di Abal!’, uca ammu i kemmřen nitni tamesřact nni mliḥ.

19 Necc zeg inni n ayt n řehna d imtiqqan di Israil u cek texsed ad tenɣed ict n tendint, tenni d yemmas di Israil. Mayemmi i ɣa tṣarḍed řwart n SIDI?” 20 Yuwab yarra-dd xas, inna: “Aya iggʷej xafi aṭṭas belli necc ad ṣarḍeɣ u ad nɣeɣ! 21 Tamesřact war teǧi amenni. Maca ijj n weryaz zeg idurar n Ifrayim, qqaren as Cabɛa, mmis n Bikri, iksi afus nnes x ujeǧid, x Dawud. Netta waha ittxeṣṣa ad tewcem, xenni ad ḥeyydeɣ zi tendint.” Tenna temɣart i Yuwab: “Xzar, azeǧif nnes ad ac dd immenḍar tiwa i řḥiḍ.” 22 Tusa-dd temɣart s tiɣit nnes ɣar marra řgens u nitni qessen i Cabɛa, mmis n Bikri, azeǧif, nḍaren t i Yuwab. Xenni iṣuḍ Yuwab deg uyicc n icarri u nitni bezzɛen ixef nsen, ggʷejen x tendint u kuř aryaz yuyur ɣar iqiḍan nnes u Yuwab iɛqeb ɣar Urcalim, ɣar ujeǧid.

23 Yuwab ittwagg d azeǧif x marra řɛeskar n Israil, u Banaya, mmis n Yahuyadaɛ, tuɣa x iɛessasen n arrimet u x ireqqasen n tazřa. 24 Aduram ibedd x ljizya u Yahucafaṭ, mmis n Axilud, tuɣa-t d amarir n umezruy. 25 Ciwa tuɣa d amarir, u Ṣaduq d Abyatar tuɣa aten d ikehhanen. 26 Uřa d Ɛira zi Ya’ir tuɣa d ijj n umtiqqi n Dawud.